Chɔŋ

9 Mɛɛ Chiisu wa hiouwɔɔ, mbo cha po nda velu o sumɛiyo wo. 2 Mi buɛiyaa nduaa nyuna ndu aa: “Luabai,+ haki nɛɛnɛ tosa yɛ mi poo hoo vialuŋ o sumɛiyo? Haki ndɔɔ ɔɔ haki wanaa velu ndu wa?” 3 Mi Chiisu muli aa: “O cho le haki ndɔɔ kɛlɛŋgaa le haki wanaa velu ndu wa le o suma le, kɛ le mi Mɛlɛka chɔm kpaaya ndɔɔ mi waŋnda che.+ 4 Boondii paaleŋ le cho wɔ wo naŋ nɔ ni miŋ tosa wali wana vem ya wo.+ Nyumndaŋ ma nɔ le tolɔɔ, okoŋ wana tosa lɛ niŋ wali le. 5 Te I cho wɔ pɛ o chieeŋndo niŋ, ya cho nyɛ teŋgaa le chieeŋndo ni.”+ 6 Mɛɛ o chii sɔɔŋ muŋ dimi, mbo tufu lɔluaŋ lɛŋ, mbo linda puuloo a maŋ, okoŋ mbo sui poo looli koŋ o lahɔl.+ 7 Mbo dimul ndu aa: “Kɔ pulu hɔlla o mɛŋma tiilaŋndaŋ Silowam” (Silowam sim ni, “Viomɔɔ”). Mbo kɔ pulu hɔlla. Mɛɛ o miiŋgu, o wa niŋ chɔɔ.+

8 Mɛɛ wanaa nda chiɛɛliaŋ nda, a wanaa ndaa cha ndu paandu piɛileŋ nda che ndu, ma kandu dimioo aa: “O cho po ndoo chal koŋ piɛileŋ ndo le cho hoo le?” 9 Apum wa dimioo aa: “Ndu ni.” Apum aa: “O cho ndu le, velaŋndo ko nda velaŋ ni.” Kɛ mi poo wa dimioo aa: “Ya ni.” 10 Okoŋ ma nyuna ndu aa: “Vɛɛ ŋ looku yɛ chɔ?” 11 Mbo muli aa: “Po nda veelu aa Chiisu wo linda puuloo lɛŋ ni mbo sui ya ndu o lahɔl, okoŋ mbo dimul la aa, ‘Kɔ pulu hɔlla Silowam.’+ Mi kɔ pulu, nduyɛ mi cha.” 12 Ma nyuna ndu aa: “Kuɛɛnɛ po kalaa cho yɛ?” Mbo muli aa: “I sina le.”

13 Ma kua a po wa hoo o sumɛiyo wo o Falisiiya lo. 14 Nduyɛ o Paale Pɛŋgiaaleŋ choo kpeekpei+ Chiisu linda puuloo lɛŋ ni, mbo suu poo hoo o lahɔl mbo cha.+ 15 Mi Falisiiya bɛɛ kandu ndu nyunaa le mbo tɛɛsial nda mɛɛ o looku chɔ yɛ. Mbo dimul nda aa: “Loolioo o suu ya o lahɔl ni, mi kɔ pulu hɔlla, okoŋ mi cha.” 16 Mi Falisiiya apum kandu dimioo aa: “Poo hoo fula o Mɛlɛka lo le, kanifuule o cho sawa Paale Pɛŋgiaaleŋ biyɔɔ le.”+ Mi apum dimi aa: “Vɛɛ wana nɔ hakioo wo nɔla yɛ mbo tosa kaamaala waa nuaa?”+ Le hei, mi piɔuwaŋndo del nda tɛɛŋ.+ 17 Ma nyuna vɛlɛ po wa o sumɛiyo wo aa: “A dimi maa po koŋ tosa ni ma cha, vɛɛ ŋ yiyaŋ yɛ a ndu okɔɔ?” Mbo muli aa: “Wana suaa le Mɛlɛka wo o cho ni.”

18 Kɛ, Chuuwa ndaa laalaŋ maa poo hoo wa paandu o sumɛi mbo wa niŋ chɔɔ le. Lelaŋ, ma veelu wanaa velu ndu wa. 19 Ma nyuna nda aa: “Po nyaa cho hoo ni, o nya dimul naa maa o veluŋ o sumɛiyo wo? Vɛɛ o looku yɛ chɔ?” 20 Mi wanaa velu ndu wa muli aa: “Po naa cho hoo ni, nduyɛ o sumɛiyo naŋ velu ndu ni. 21 Kɛ ŋ sina mɛɛ o looku chɔ yɛ le, nduyɛ ŋ sina wana tosa mbo cha wo le. La nyuna ndu. O cho lɛ chɛlɛkpɛ le. O nɔla mbo soo le ndupila.” 22 Le mɛɛ wanaa velu ndu wa ndaa nɔ siooŋnde le Chuuwa yɛ nda dimi sɔɔŋ muŋ ni.+ Kanifuule, chɛlaŋ Chuuwa wa ni maa, wana o wana chɛl pɛ poo hoo maa ndu cho Kiliti ni, a soli wana koŋ o chiɛi Chuuwa piɛi Mɛlɛka wo niŋ.+ 23 Le saboo hoo wanaa velu ndu wa dimi ni aa: “O cho lɛ chɛlɛkpɛ le. La nyuna ndu.”

24 Okoŋ ma veelu vɛlɛ po wa koŋ o sumɛiyo wo, ma dimul ndu aa: “Mɛlɛka ŋ nɔ ni ma saŋgala, kanifuule ŋ sina maa wana hakioo po koŋ cho ni.” 25 Mbo dimi aa: “O wa wana haki, o wa wana haki le, ya I sina le. O ya sina kinɛiyo cho ni, I wa o sumɛiyo, kɛ I cho niŋ chɔɔ.” 26 Okoŋ ma nyuna ndu aa: “Yɛɛ o tosallɛ num? Vɛɛ o looku yɛ tosa ma cha?” 27 Mbo mulul nda aa: “I dimul nya niŋ hau, kɛ la yeŋ ya lani le. Le yɛɛ nya cho yɛ ya vɛlɛ nyunaa? La yeema mi la simnuŋ buɛiyaa nduaa le, lende le?” 28 Ma yiou ndu, ma dimi aa: “Num cho buɛi po koŋ ni, kɛ naa buɛiyaa Muuse wa naŋ cho ni. 29 Ŋ sina maa mi Mɛlɛka suaa o Muuse lo, kɛ poo hoo ndu, ŋ sina naa o fula wa le.” 30 Mi poo dimul nda aa: “Hei cho bɔɔ suɛi kaamaa, maa la sina naa poo hoo fula wa le, kɛ nduyɛ mbo tosa mi cha. 31 Ŋ sina maa Mɛlɛka muli piɛile wanaa lahakiaa le.+ Kɛ wana nɔ pɛ siooŋii Mɛlɛkɛi, nduyɛ mbo tosa hɛnaŋ ndɔɔ, mbo muli piɛile wana koŋ.+ 32 Kani masindɛ, ŋ tuiyɔ maa waŋndo tosa mi wana veluŋ o sumɛiyo wo cha le. 33 Te ndoo ve o Mɛlɛka lo le poo hoo fula le, ndoo nɔla mbo tosa hei le.”+ 34 Ma dimul ndu aa: “Num veluŋ hoo o hakioo niŋndo huŋ naa pɛɛkoo ni?” Okoŋ ma soli ndu o bɛɛ!+

35 Mi Chiisu tuɛi maa a tou poo hoo. Mɛɛ o che ndu, mbo nyuna ndu aa: “A laalaŋ pa o Po wanachioo niŋ?” 36 Mi poo muli aa: “Nɛɛnɛ cho yɛ wana koŋ fallo, le mi dɔu laalaŋndo o ndu niŋ?” 37 Mi Chiisu mulul ndu aa: “A chii ndu chɔ. Ndu pɛŋ cho hoo suɛi o numndo ni.” 38 Mbo dimi aa: “I dɔu laalaŋndo o ndu niŋ, Masanɔɔ.” Okoŋ, mbo ke ndu bɛɛleŋ.* 39 Mi Chiisu dimi aa: “Le hei ya hiŋ o chieeŋndo choo ni, le mi sɔɔŋ ya tosa woŋ tosa mi wanaa sumɛiya che,+ nduyɛ mi wanaa cho chɔɔ wa suma.”+ 40 Mɛɛ Falisiiyaa wa ndu ikɛiya tuei nyɛ o dimi hoo wo, ma nyuna ndu aa: “Baa a sumɛiya naa bɛɛ cho ni?” 41 Mi Chiisu mulul nda aa: “Te nyaa wa pɛ wanaa sumɛiya, haki ve nya wa choo le. Kɛ la dimi aa, ‘Ŋ cho chɔɔ.’ Lelaŋ, hakioo feŋaŋ nya choo le.”+