Sɔɔŋ Chɔɔmaŋndoŋ

11 Ma ke ya tɛŋgɛleŋ maa sioŋnde tuwaa.+ Ma dimul la aa: “Chɔŋ ma tuu chiɛi Mɛlɛkaa,* a bandu luamaa lasalaa, a wanaa cho Mɛlɛka piɛiyo leniŋ nda. 2 Kɛ, luŋ chiɛi Mɛlɛkaa ndu, tuu ndu le. Mal ndu lende, kanifuule a chii wanaa cho ŋChuu le wa ndu ke. Waŋnda haa cho chiee diandaa+ niɔu niɔu le paŋgoŋ 42.+ 3 I cho tosa mi seiyaa niaa ŋiɔɔŋnda chuɛɛnuŋ nyɛla imɔnɔ laŋ, ma dimi yooŋgu nuu le palɛi 1,260.” 4 Seiya haa sim le yɔmii ɔlifii ŋiiŋnde,+ a nyɛla kɛsiaala lambuila tiɔɔŋndaŋ.+ Nduyɛ a cho isisi Masanɔɔ le lɛŋndeŋ lachi.+

5 Te waŋndo yeema pɛ le nda nyɛ yɔŋ, yiŋndeŋ le fula nda o lasondo, le lom yaamɔɔwaa ndaa. Wana o wana kindiŋ pɛ le nda nyɛ yɔŋ, lende wana koŋ nɔ ni mbo sɔla piɔmndo. 6 Seiya haa nɔ kpaayaa le ma kinda choo choo,+ piɔɔ o piɔɔ se+ teleŋ nda wa yooŋgu Mɛlɛkaa dimioo wo le. A nɔ kpaayaa ma siiŋguu mɛŋndaŋ koowaŋ,+ nduyɛ a nɔla ma tusi kpundɛla suu o suu o lɛŋndeŋ choo mɛɛ nda yeema yɛ.

7 Te a chii pɛ yooŋgu ndaa dimi, visi biyaa fula o sooŋ yiŋgilɛi nɔ lamɛɛlu le wo niŋndo cho nda chiŋalaŋ a sɔŋgɔɔ, mbo yem nda, nduyɛ mbo dii nda.+ 8 Dialuŋ ndaŋ vilɛiyoŋ cho wa o nɛi bɛndoo choo, o chiee bɛndu nda dii Masanɔ ndaa o yɔmndo choo wo. Nduyɛ Sodɔm a Ichipi sim le chioo hoo ni. 9 Waŋnda suu o suu, a lekaa o lekaa, a isɔɔ o isɔɔ maŋgalaa, a waŋnda lelɛŋ o lelɛŋ cho hunɔɔ dialuŋ ndaŋ tofa le palɛi i yaa a tɛndaa tɛɛŋ.+ A chɛl niŋ ma kumbu nda le. 10 Wanaa cho o lɛŋndeŋ choo wa duaunuŋ niŋ nyaale le piɔm ndaa. A wa niŋ a kɔl kɛndɔɔ, ma keŋnaŋ nyɔɔŋ vellaa velle, kanifuule nyɛpalaa pila wanaa ŋiɔɔŋaa suaa haa le Mɛlɛka wa ndaa tusi wanaa cho o lɛŋndeŋ choo wa choo ni.

11 Mɛɛ palɛi yaa keŋ a tɛndaa tɛɛŋ hiou, mi Mɛlɛka miŋgi nda hueiyii yoomɛi* niŋ,+ okoŋ ma sim o peluŋ ndaŋ choo. Mi siooŋii bɛnduei bii wanaa che nda wa. 12 Ma tuɛi diomndo o choo choo niŋ, mbo suaa o nda lo aa: “La hel nanuŋ.” Okoŋ ma hel choo choo o yumbu yumboo niŋ, nduyɛ mi yaamɔɔwaa ndaa cha nda. 13 A teleŋ koŋ, mi lɛŋndeŋ le nyiiya tau tau. Chioo piɔuwo sala tɔ, mi kumbuei i pilɛ komba wɔlɔ wɔlɔ. Waŋnda 7,000 lɛŋnde nyiiya leŋ ndeŋ le dii ni. Mi siooŋnde bii wanaa tuaa kpou, okoŋ ma saŋgala Mɛlɛka cho o choo choo niŋndo.

14 Kpundɛ diiŋ ndɔɔ+ hiou hoo ni. Kpundɛ yaa ndɔɔ nɔ le hunɔɔ chɔ chɔ.

15 Mi maalikɛinɔ ŋɔmmɛuwo huaŋ bulu ndɔɔ.+ Okoŋ mi diomndaŋ la suaa o choo choo niŋ kpeleŋ aa: “Masale chieeŋndo le simnuŋ Masale Mɛlɛka naa+ a Kiliti,+ nduyɛ Mɛlɛka cho wa masaa le fɛɛŋ a fɛɛŋ.”+

16 Bɛnduaa 24+ wa ichali o kpeŋgbeila* ndala lemasalaŋ choo Mɛlɛka lachi wa, ma baŋ wulaŋ a hɔlla a tundaa ma piɛi Mɛlɛka. 17 A wa dimioo aa: “Ŋ mel num balika Chɛhowa,* Mɛlɛka Kpaaya Kpou Kpou Wo, kanifuule a soliŋ kpaaya num bɛndoo kpeku, ma kandu masaleŋ. Num cho pɛŋgoo hoo,+ nduyɛ ma wa kani masindɛ ni.+ 18 Mi waŋnda o lelɛŋ o lelɛŋ niŋ duaunuŋ tumbe, kɛ mi num bɛɛ duaunuŋ tumbe a nda. Mi teleŋndo fuuluu le ma kɔɔsa a wanaa vi wa, nduyɛ ma fanda+ buɛiyaa numnda. Nda cho ni, wanaa suaa le num nda,+ a wanaa diandaa, a wanaa nɔ siooŋnde le diola numndaŋ nda, wana pɔmbɔ ni, wana bɛndu ni. Okoŋ ma tɛɛmbuu wanaa cho lɛŋndeŋ tɛɛmbuuwo wa.”+

19 Mi chiɛi Mɛlɛkaa o choo choo niŋ kumbiŋ, okoŋ mi kɔfu kpemaa o chiɛi ndɔɔ niŋ chɔɔmuŋ kpendekele.+ Mi nyɔɔ kiolu ŋualalɛi, mi tuɛi diomndaŋ a taŋndaŋ deŋioo. Mi lɛŋndeŋ le nyiiya, okoŋ mi looŋ kpuŋgbaŋ deli tau tau.