Polowaa
1 Talela Sɔlɔmɔŋ ndaŋ+ la cho laŋ ni, po Deeve wo,+ masaa le Isɔluɛi:+
3 La ke wana sila+ tosa ma nɔ sinapɛŋgoo wo.
La tosa ma wa sakpo,+ ma tosa kɛɛsiaa bɛnda wo,+ nduyɛ ma wa wana tonya.*
4 Mi la ke wana nɔ kɔl kalu le wo taasioo,+
Nduyɛ mi la ke feleŋgɔnɔɔ kɔl kaloo, okoŋ mi la mala ndu mbo yiyaŋ o sɔɔŋ choo.+
5 Mi wana nɔ taasioo wo yaŋ nilaŋ, nduyɛ mbo sɔla pɛɛkoo tau.+
Mi wana nɔ sinapɛŋgoo wo sɔla taasioo,+
6 Le taloo a suɛi kɔndɔfille biyɔɔ bila.
Koŋ cho ni, diomnda wana taasioo dimi o talelaŋ niŋndaŋ.+
7 Siooŋnde* nɔɔ le Chɛhowa, kandɔŋ kɔl kaloo cho koŋ ni.+
Diɔmnda kinɛi chɛl taasioo a silaa le ni.+
8 Po nuu, yaŋ nilaŋ o sila finya num ndo.+
Nduyɛ, kɛɛ sila* kala num ndo le.+
10 Po nuu, te wanaa dɛnɛ wɔɔŋnda dɛɛniaa num pɛ le suɛi wɔɔŋnde tosaa, chɛl nda diom te.+
11 Te a dimul num pɛ aa: “La huŋ kɔŋnuŋ,
Miŋ veŋnuŋ le waŋnda diuwo.
Ŋ cho i hini lɛŋ miŋ veŋnuŋ le wanaa tɛɛmbuu isɔɔ le wa chumndo.
12 A cho lo yoomu miŋ mel nda, mɛɛ Sɛiyo* mial nuaa waŋnda yɛ.
Ŋ cho nda miolɔɔ kpulukuu, mɛɛ waŋndo kua nuaa o sooŋndo niŋ kpulukuu yɛ.
13 Ŋ kɔŋnuŋ miŋ kɔ biu biuŋ nyɛm ndaŋ sɔvɛ sɔviɔŋ,
Miŋ pei chiɛila naalaŋ cha cha a nyɛm ndaŋ.
14 Sɔɔŋguu naa choo,*
Nduyɛ nyɛ o nyɛ naŋ chiimbuu pɛ, ŋ piɔuwaŋ kpeŋkpeŋ.”
15 Po nuu, tual nda kɔɔli le.
Kua pɛŋ o nɛi ndaa choo le.+
16 Kanifuule, a kiltaŋ nda kua le dɛnɛ wɔɔŋndo tosaa ni,
Nduyɛ ma nyaanuŋ le kɔlaŋ waŋnda diuwo.+
17 O ve suɛi taasi le you cho num chɔɔ wo yalaa pɛŋgɛlaa lachi le.
18 Le sabu koŋ nda hini a viaŋnaŋnda ni le waŋnda diuwo,
Nduyɛ ma hini o vioŋnɔŋndo niŋ le yoomula acheleŋnda tɛɛmbuuwo.
19 Nɛila wanaa kindiŋ le tɔnɔɔ sɔlaa o kafalaŋ choo wa la cho laŋ ni.
Mi tɔnɔ lakafa nda sɔla koŋ ndo tosa mi yoomula ndalaŋ la hɛluŋ nda.+
20 Taasi kpeekpeiyo+ cho yondaa o nɛi.+
O cho diomndo heeloo kpeekpei o luŋ kpendekele.+
21 O cho veeloo o sɔŋgila* waŋnda hiau tau laŋ.
O cho dimioo o diola kpakila chioo sondoo aa:+
22 “Vɛɛ kpɛ nya wanaa nɔ taasi le wa hiau yɛ niŋ lachi a sɔɔŋ ŋdiɔmndoŋ kaalaa?
Vɛɛ kpɛ nya wanaa mamaa hiau yɛ niŋ lachi a waŋnda mamɔɔ?
Nduyɛ, vɛɛ kpɛ nya diɔmnda hiau yɛ niŋ lachi a kɔl kaloo yɛleŋ tullo?+
23 La yaŋ nilaŋ o sila ya cho nya wo, okoŋ mi la siŋgaŋ.*+
I cho nya nyina nuu ke,
Nduyɛ mi tosa mi la bii diomnda nilaŋ bila.+
24 Kanifuule, I wa yondaa choo choo, kɛ la yeŋ lani le.
Mi siɛndi ba nuu le nya malaa, kɛ wana o wana mulul la le.+
25 Mi la hiau lachi a silala nilaŋ pɛɛsaa,
Nduyɛ la chɛl mi miŋgi nya o nɛi le.
26 Ya bɛɛ cho nya mamɔɔ te kpundɔɔ komal nya pɛ.
Nduyɛ mi mam te sɔɔŋ luei nya siooŋnde woŋ komal nya pɛ,+
27 Mi sɔɔŋ muŋ komal nya maa hueiyii bɛndu,
Mi kpundɔɔ komal nya maa hueiyii fuku fukuei,
Nduyɛ mi sɔɔŋ kɔl tambɛiyoŋ a sɔɔŋ kpundɔŋ tol nya choo.
28 A teleŋ koŋ, a cho ya wa veeloo, kɛ I cho muli le.
A cho ya wa nuuviaa kpeekpei, kɛ a cho ya saalɔŋ te.+
30 A kɛɛ silala nilaŋ.
Nduyɛ te I miŋgi nda o nɛi pɛ, a chɔm lebɛɛ kposoŋ te.
31 Lelaŋ fulamakɔɔlila kɛ kɛ nda sɔla pɛ o kelala ndalaŋ niŋ, a nɔ ma biunuŋ ndaŋ.*+
Nduyɛ silala* ndalaŋ la cho nda hau o labolo.
32 Wanaa kindu kɔl te wa, diɔmii ndɛi dii nda ni.
Nduyɛ, le mɛɛ diɔmnda chua sɔɔŋ o nɛi taalɛɛ wo niŋ yɛ nda sɔla tambei ni.