Saamiɛɛ Tasoo

1 Po pilɛ wa Luamatayim-sofim+ o fondaŋ ŋpemboo Ifiluem,+ diolaŋ aa Ɛlikana,+ po Chɛloham ndo. Chɛloham yɛ, finya ndɔ wa Ɛlihu ni. Ɛlihu, finya ndɔ wa Tohu ni. Tohu, finya ndɔ wa Sufi ni, fulaa Ifiluem. 2 Ɛlikana ndoo nɔ laanduaa a ŋiɔɔŋ. Hoo diolaŋ aa Hana, o pilɔɔ aa Pɛnina. Pɛnina ndoo nɔ chuauwa, kɛ Hana ndu ndoo nɔ ŋchuau le. 3 Iwɔsi o iwɔsi, mi Ɛlikana ndoo mal o ndu lo mbo kuɛ Silɔɔ le Chɛhowa, Mɛlɛka puaa chɔuwa* piɛiyo,* a le salaa solioo o ndu lo.+ Nduyɛ Ilai puaa nduaa ŋiɔɔŋ nda, Hɔfini nda Finihaasi,+ loŋ nda wa wanaa soliaa lasalaa le Chɛhowa ni.+

4 Paale pilɛ, mɛɛ Ɛlikana soli salaa, mbo ke Pɛnina laa ndɔ visioŋ ŋ ndɔŋ, nduyɛ mbo ke puaa nduaa a chuauwaa nduaa laanduaa kpou ŋ ndaŋ.+ 5 Kɛ Hana ndoo hiou visiŋ kɛndɛ kɛndɔŋ ke, kanifuule ndu ndoo hiou kaala. Nduyɛ Chɛhowa ndoo ke wɔ ndu ŋchuau le.* 6 Kɛ teleŋ o teleŋ, diɔɔmu ndɔ wa ndu mamɔɔ le mbo tɛɛmbuu ndu kɔllo, kanifuule Chɛhowa ndoo ke wɔ ndu ŋchuau le. 7 Iwɔsi o iwɔsi, lende Pɛnina ndoo tosa ni. Te Hana ndoo kuɛ pɛ o chiɛi Chɛhowa wo niŋ,+ mbo lo ndu mamɔɔ haaa mbo chaŋ, nduyɛ mbo kɛɛ le nyɛdiaa dioo. 8 Mi Ɛlikana pɔnɔ ndɔ nyuna ndu aa: “Le yɛɛnɛ ŋ cho yɛ chaŋndo Hana? Le yɛɛnɛ ŋ kɛɛ yɛ le nyɛdiaa dioo? Nduyɛ le yɛɛnɛ ŋ tambu yɛ kɔllo nuaa? Baa I bɛnda le num mbo hiau puaa* tɔ le?”

9 Mɛɛ nda chii nyɛdiaa dio o Silɔɔ niŋ, mi Hana chaŋ mbo fulaŋ. A teleŋ koŋ, Ilai wana soliaa lasalaa wa ichali o kpeŋgbeiyo* choo, o dio wana keeku le luɛiyɔɔ o chiɛi Chɛhowa wo+ niŋndo ikɛi. 10 Hana wa o kɔl tambɛi bɛndoo niŋ, nduyɛ mbo kandu piɛileŋ o Chɛhowa lo+ a chaŋndo. 11 Mbo chua buŋgɛi aa: “Oo Chɛhowa, Mɛlɛka puaa chɔuwa, loonuŋ a ya ma tofa mɛɛ kpɛ buɛi numndo cho saŋgaa yɛ. Te a puɛɛnuŋ a ya buɛi numndo le nduyɛ ma tosa mi velu poo,+ I cho num ndu ke Chɛhowa, mbo wa le num haaa a teleŋ o cho wa yoomu wo. Nduyɛ, fɛɛŋ bɛɛ a sendi ndu niŋ te.”+

12 Teleŋ Hana wa hiouwɔɔ lachi a piɛileŋ o Chɛhowa lo wo, Ilai wa ndu sondoo tofaa. 13 Hana wa piɛileŋ o kɔl niŋ, wana ndoo tuii ndu diom te. Chɔchɔŋ ndɔŋ kinɛi wa hiilɔŋndo ni. Okoŋ mi Ilai yiyaŋ maa kolɔɔ o kol ni. 14 Mi Ilai nyuna ndu aa: “Le yɛɛnɛ ŋ cho yɛ a muɛiyaŋ o lahɔl? Mal muɛiyaŋ kolɔɔ.” 15 Okoŋ mi Hana muli aa: “O cho mamuɛi le ya kol te masanɔ nuu, kɛ o kɔl tambɛi bɛndu bɛndoo niŋ ya cho ni. Chɛhowa ya cho bahawɛi nuu chɔmndo ni.+ 16 Chua buɛi num laandoo maa wana lanɔ fondo le o cho le. Kanifuule, nyɛpalaa cho ya choo wo a kɔl ni tambɛiyo tosa ni mi wa piɛileŋ nuaa.” 17 Okoŋ mi Ilai dimul ndu aa: “Kɔ wa kɛndɛ. Maa Mɛlɛka Isɔluɛiya muli piɛile numndeŋ, nduyɛ mbo ke num nyɛ ŋ nyuna le ndu wo fɔ.”+ 18 Mi Hana dimi aa: “Maa buɛi numndo o wa wana kɛndɛ num o hɔl fɔ.” Okoŋ, mi Hana kuaŋnuŋ mbo kɔ dio nyɛdiaa, nduyɛ mbo pɛŋgi buulaŋndo.

19 Idiiyo puŋ, mi Ɛlikana nda yuŋgu ndɔɔ chaŋ ma piɛi o Chɛhowa lo. Okoŋ, ma miiŋguŋ o nda lo Luama.+ Mɛɛ Ɛlikana tosa chiɛɛniŋndo nda Hana laa ndɔ, mi Chɛhowa mulul Hana hɔlla.*+ 20 O wɔsioo o pilɛ bɛŋgu, mi Hana chua folioo* okoŋ mbo vialu poo. Mbo ke ndu diolaŋ+ aa Saamiɛɛ,* kanifuule mbo dimi aa, “Chɛhowa ya piɛi ni mbo ke ya ndu.”

21 Mɛɛ teleŋ tiŋ hiou, mi Ɛlikana nda yuŋgu ndɔɔ kpou kua le sala iwɔsioo solioo o Chɛhowa lo,+ a le sala o chua buŋgɛiyo solioo. 22 Kɛ Hana ndu kue le,+ kanifuule mbo dimul pɔnɔ ndɔ aa: “Te I soli dɔɔ pɛ poombɔɔ mɛɛleŋ o sondo, I cho lakɔ a ndu o Chɛhowa lo, le mbo kɔ wa niko loŋ.”+ 23 Mi Ɛlikana pɔnɔ ndɔ dimul ndu aa: “Tosa nyɛ ŋ yiyaŋ maa o bɛnda wo. Lo nanuŋ haaa ma soli ndu mɛɛleŋ o sondo. Maa Chɛhowa tosa mi nyɛ ŋ dimi wo yɔŋnuŋ fɔ.” Le hei, mi Hana lo kɔɔli, nduyɛ mbo lo po ndɔɔ wɛsioo haaa mbo soli ndu mɛɛleŋ o sondo.

24 Dimioo nuaa o soli ndu mɛɛleŋ o sondo, mbo chua ndu mbo kua a ndu Silɔɔ. Mɛɛ o wa kɔlaŋ, mbo chua nau chii wɔsilaŋ la yaa wo, a kpeyaŋndo ɛfaa 11,* a muɛiyaŋ kpɛɛnɛi bɛnduei cha,+ okoŋ mbo kua a poombɔɔ o chiɛi Chɛhowa wo Silɔɔ.+ 25 Ma dii nau koŋ, nduyɛ ma kua a poombɔɔ naa Ilai chua. 26 Mi Hana lo okoŋ mbo dimi aa: “Mi mɛnaŋ po masanɔ nuu, ya cho chua wa koŋ num isisi ikɛi o fondaa hoo, mi wa piɛileŋ o Chɛhowa lo wo ni.+ 27 Le poombɔɔ hoo ya wa piɛileŋ ni, nduyɛ mi Chɛhowa tuɛi piɛile nileŋ mbo ke ya nyɛ ya nyuna ndu wo.+ 28 Lelaŋ ya bɛɛ chua ndu ni mi ke Chɛhowa. Nduyɛ haaa a yoomu ndɔɔ mɛɛlulaŋ, le Chɛhowa o cho wa niŋ ni.”

Okoŋ, mbo* baŋ wulaŋ loŋ mbo piɛi Chɛhowa.