Ɛfisiaŋnda

5 Lelaŋ, mɛɛ nya cho chuauwaa Mɛlɛka kaala wa yɛ, la tol tamasi ndɔɔ kɔɔli.+ 2 La hiou lachi a kaalaa chɔmndo+ mɛɛ Kiliti kaala naa yɛ.+ Mbo yɔŋgu yoomu ndɔɔ le naa maa sala chuŋ kɛndɛ o Mɛlɛka lo.+

3 Wanaa Mɛlɛkaa nya cho niŋ ni.+ Le hei, nyɛ o nyɛ cho nyɛ nɔɔlɛi, a kaa ihini nɔɔlɛiyo,* o bɛnda kposoŋ mi la dɔu labali a ndu okɔɔ le.+ 4 Nyɛ o nyɛ cho vɛlɛ suɛi lasiɔmbu,+ suɛi idiɔm, suɛi nɔɔlɛi, a sɔɔŋ bɛnda kposoŋ te woŋ, ŋ nɔ miŋ wa nya fulaa o sondo le. Kɛ la wa Mɛlɛka balikaa mello.+ 5 Nyapila sina ndi walaŋ maa wana o wana cho o kaa ihini nɔɔlɛiyo* niŋ,+ a wanaa tosa sɔɔŋ nɔɔlɛiyoŋ nda, a luei niŋ o Masale Mɛlɛka nda Kiliti leŋ niŋ te.+ Wanaa luɛi hɔlteŋ o nyɛm pilaŋ nda bɛɛ,+ a luei niŋ te. Kanifuule, hei cho ko maa piɔmnda sooluuwo.

6 La chɛl mi wana o wana hui nya a sɔɔŋ lachoowaŋ te. Kanifuule, le sɔɔŋ waa nuaa Mɛlɛka cho hunɔɔ tumbe dɔɔnɔŋ a wanaa kɛɛ ndu diomndo tueiyɔɔ wa ni. 7 Lelaŋ, la muuliaŋ a wanaa waa lende le. 8 La wa paandu o nyumndaŋ niŋ. Kɛ suŋ suŋ niŋ, la cho o nyɛ teŋgaa niŋ+ le mɛɛ nya cho o diompilɔɔ niŋ a Masanɔɔ yɛ.+ Mɛɛ nya cho niŋ chuauwaa nyɛ teŋgaa yɛ, la hiou lachi a kɔlaŋ o nyɛ teŋgaa koŋ niŋ. 9 Nyɛ teŋgaa koŋ mala naa miŋ wa wanaa kɛndɛ o nɛi o nɛi niŋ, miŋ wa wanaa sakpuaa, nduyɛ miŋ kuɛ o nɛi tonyaa choo.+ 10 La kindiŋ le sinaa nyɛ Masanɔɔ hɛnaŋ ndo.+ 11 Sɔɔŋ fondoŋ waŋnda tosa o nyumndaŋ niŋndoŋ,+ la wou lɛ balaŋ leniŋ te. Kɛ la chɔɔmuu muŋ. 12 Kanifuule, sɔɔŋ nda cho tosaa sɔɔsɔɔ woŋ, siɔmbulaŋ la bii wana le suɛi a muŋ okɔɔ ni. 13 Te nyɛ teŋgaa del pɛ nyɛ o nyɛ choo, nyɛ teŋgaa koŋ chɔɔmuu ndu mɛɛ o cho kpeekpei yɛ. 14 Yau Mɛlɛkaa dimi aa: “Num cho hoo o luaŋ ndo, tiondu nduyɛ ma miiŋgu yoomu.+ Okoŋ mi nyɛ teŋgaa Kiliti wo dendu num choo.”+

15 Lelaŋ, la mandaŋ nyɛkɛndɛi a mɛɛ nya cho kelaa yɛ. Kelala nyalaŋ la wa maa ŋdiɔm te, kɛ la wa maa wanaa taasi. 16 La soliŋ teleŋ nyaa kpeku nyɛkɛndɛi,*+ kanifuule palɛi naŋ cho hei niŋnde wɔu bɔɔ. 17 La pɛŋgi sɔɔŋ tosaa maa ŋdiɔm, kɛ la kindiŋ le sinaa nyɛ Chɛhowa* hɛnaŋ ndo.+ 18 La hiau ba a muɛiyaŋ kolɔɔ le,+ yɔŋii ma luei nya o laasiaŋndo niŋ. Kɛ la kindiŋ le mi nyina Mɛlɛkaa wa nya choo lɔɔlɔɔ. 19 La lueinaŋ yoomuaŋ vellaa velle o chondoŋ niŋ. La soli chondoŋ le Mɛlɛka saŋgalaa. La soli chondoŋ+ o kɔl niŋ a nyɛchaa+ le Chɛhowa* balikaa mello.+ 20 La wa Mɛlɛka Finya naa balikaa mello+ le nyɛ o nyɛ o diola Masanɔ naa Chiisu Kiliti laŋ niŋ.+

21 La tusiŋ vellaa velle+ le sabu Kiliti wo. 22 Laanduaa nɔ ma tusiŋ piaandaa ndaa o ba bɛŋgu,+ mɛɛ nda tusiŋ Masanɔɔ o ba bɛŋgu yɛ. 23 Kanifuule, pɔnɔɔ cho lanɔɔ bolleŋ ni,+ mɛɛ Kiliti cho kundaa bolleŋ yɛ.+ Kundaa hoo cho dialuŋ ndɔŋ ni, nduyɛ le ndu o yɔŋgu yoomu ndɔɔ ni. 24 Lelaŋ, mɛɛ kundaa tusiŋ Kiliti o ba bɛŋgu yɛ, lende koni laanduaa bɛɛ nɔ ni ma tusiŋ piaandaa ndaa o ba bɛŋgu o nyɛ o nyɛ niŋ. 25 Nya piaanduaa, la kaala laandaa nyaa+ mɛɛ Kiliti bɛɛ kaala kundaa, mbo yɔŋgu yoomu ndɔɔ le ndu yɛ.+ 26 O tosa hei a mɛɛ o tɔɔ ndu, mbo dindi ndu fofo a mɛŋndaŋ yɛ, maŋ ma cho yɛ diom Mɛlɛkaa ni,+ 27 le halikpeŋ mi kundaa naŋ nua ndu o hɔl, nyɛ o nyɛ wɔɔŋ ve ndu le. O nɔ sɔŋ te, o ve o nyɔfɔlɛi le,+ kɛ mbo wa o diandaa.+

28 Lende koni, piaanduaa bɛɛ nɔ ma kaala laandaa ndaa mɛɛ nda kaala dialuŋ ndaŋ yɛ. Wana kaala pɛ laa ndɔ, mɛɛ o kaala ndupila. 29 Wana o wana cho mbo tul dialuŋ ndɔŋ leyɛ le. Kɛ mbo ke muŋ nyɛdiaa, nduyɛ mbo bii muŋ nyɛkɛndɛi. Lende koni Kiliti tosa a kundaa ni. 30 Kanifuule, naŋ cho faloŋ le dialuŋ ndɔŋ ni.+ 31 “Le saboo hoo poo mɛi finya ndɔ a kala ndɔ ni ma chalnuŋ nda laa ndɔ, okoŋ ma simnuŋ dialle i pilɛ.”+ 32 Suɛi viaŋnaŋnde+ hei cho i sɔvɛ. Le Kiliti a le kundaa ya cho ndi dimioo ni.+ 33 Kɛ nduyɛ, wana o wana nɔ mbo kaala laa ndɔ+ mɛɛ o kaala ndupila yɛ. Lende koni, lanɔɔ bɛɛ nɔ mbo nɔ bɛɛle yiŋgoloŋndeŋ le pɔnɔ ndɔ.+