Aisaya
57 Mi wana sakpoo vi,
Kɛ wana o wana hendu kɔllo o ndi choo le.
Wanaa chɔm lo lechoo wo wa cho piɔmndo sɔlaa,+
Kɛ wana o wana bii ndi bila nuaa maa wana sakpoo sɔla piɔmndo,
Le nyɛpalaa le.*
2 Mbo luɛi o kɔl nyuloo niŋ.
Wana o wana cho kɔlaŋ o nɛi sakpoo choo, ma kɔ pɛŋgi o kpelela ndalaŋ choo.*
3 “Kɛ nya chuauwaa wana lanɔ viam yawaa wo,
Nya chuauwaa wana suundɛiyo a wana tiamaa,
La sɔɔŋguu nanuŋ.
4 Nɛɛnɛ nya cho yɛ mamɔɔ?
Nɛɛnɛ nya cho yɛ sondoo kanyallo mi la solul ndu diɔɔmuleŋ?
O cho chuauwaa yɔŋ wɔɔŋnda le nya cho le,
Chuauwaa mulu muluaŋnda?+
5 O cho nya le cho a piaa cha a yeemɛi bɛnduei o yɔmii bɛnduei tɛɛŋ,+
O yɔm bɛndu kɛ kɛ bɛŋgu,+
Mi la diu chuauwaa nyaa o kpoloŋndaŋ niŋ,*+
A o pouta bɛndulaŋ bɛŋgu le?
6 Pouta kpɔlɔkɛilaŋ o kpoloŋndo niŋ* nya hɛli ni.+
A tonya, laŋ la simnuŋ nyɛm kɛŋ nyaŋ ni.
O laŋ choo nya taaliaa salala nyala mamuɛilaŋ nduyɛ mi la yɔŋgu kela nyalaŋ ni.+
Baa sɔɔŋ nya cho muŋ tosaa woŋ nɛŋi ya pa kɔl?*
7 O pembuŋ bɛnduŋ vilɛiyoŋ choo a o fondaŋnda filioŋndaŋ nya toosiaa kpelela nyala lɔlaalaŋ ni,+
Okoŋ mi la kua loŋ le salaa solioo.+
8 La kɛsi piɔmnda o diola nyalaŋ a o keedeŋ nyaŋ kɔɔli le loonɔŋndo a nda.
La mal la, mi nyapila yuŋgaŋ.
Laŋ helnuŋ o pemboŋ choo, mi la kɔ toosiaa kpelela nya lɔl choo laŋ fɛkɛi,
Okoŋ mi la yii kpemaa a nda.
9 Mi la kuɛ amatou di o Mɛlɛki* lo a chuɛiyaŋ,
Vɛlɛ a chuɛima chuŋ kɛndɛ kɛndiaŋ ma hɔbɛi.
La cho wanaa nyaa viamaa yɔŋndo landaŋ,
Mi la tusi nyapila o Sɛiyo* niŋ.
10 La cho wallo kalaŋ le tolɔɔ nɛila nyalaŋ kɔɔli,
Kɛ la dimi nuaa aa, ‘Tiindaŋ cho le’ le!
La cho yoomuma sɛnɛiyaŋ sɔlaa.
Le sabu koŋ nya vi ŋdial te ni.*
11 Siooŋii nɛɛnɛ nyaa nɔ yɛ,
Mi la kandu choolaŋ dimioo?+
12 I cho tosa mi waŋnda sina ‘sakpoyɛi’+ nyɛi a walta nyalaŋ,+
Nduyɛ la sɔla niŋ tɔnɔ o tɔnɔ leniŋ te.+
13 Te la mɛli pɛ yeelaŋ le malaa,
Piɔmaa nyaa tiu niŋ ba ma mala nya le.+
Hueiye cho lakɔŋnɔŋ a nda kpou,
Mi hueiyii yoomɛi taaniŋnde basu nda tɛɛ.
Kɛ wana nuuviaa pɛ naa viaŋnaŋnda o ya niŋ, lɛŋndeŋ le cho wa le ndu,
Nduyɛ mi pembii nii diandɛi wa fondaŋ ndɔ chalaa.+
14 Waŋndo cho dimi aa, ‘La bɛɛndiaa, la bɛɛndiaa nɛiyo! La toosiaa nɛiyo!+
La faaŋiaa nyɛ o nyɛ paaliaŋ wana o nɛi le wanaa niaa.’”
15 Wana cho Filioŋ, mbo wa yoomu* le fɛɛŋ a fɛɛŋ,+
Nduyɛ mi diola ndɔlaŋ la wa la diandaa wo,+ nyɛ o dimi wo cho hoo ni:
“O fondaŋ cho filioŋ nduyɛ mbo wa o diandaa wo niŋ ya cho ni.+
Kɛ wanaa tusiaŋnda a wanaa cho o nyɛpalaa niŋnda, I cho vɛlɛ a nda latulu,
Le mi luei wanaa tusiŋ nda,
A wanaa cho o nyɛpalaa niŋnda yoomuaŋ.+
16 I cho nda nyɛpalaa tusi choo le fɛɛŋ a fɛɛŋ te,
Kɛlɛŋgaa niŋ te mi wa o kɔl tuuwo niŋ le teleŋ o teleŋ.+
Kanifuule yoomuaŋ ma cho waŋnda chuwɔɔ fiou le sabu nuu,+
Hali nyaa yoomaa cheleŋaa ya toosiaa wa bɛɛ.
17 Mi tuulu kɔl a ndu le haki o tosa mbo wa nyɔɔŋ sɔlaa o kafalaŋ choo wo.+
Le hei mi tusi ndu nyɛpalaa choo, mi viaŋ hɔlaa niaa, nduyɛ mi tuulu kɔl.
Kɛ mbo hiau lachi a balɔɔ o nilakalulaŋ choo,+ nduyɛ mbo tual nyɛ kɔl ndɔɔ dimul ndu wo kɔɔli.
18 I chii nɛila ndɔlaŋ chɔ.
Kɛ I cho ndu siŋgi,+ mi sim ndu lachi,+
Nduyɛ mi tosa mbo sɔla kɔl dɛɛniaa+ a wanaa nduaa cho mɔnɛi biyɔɔ wa.”+
19 Chɛhowa dimi aa: “I cho diomnda saŋgalaa laŋ dɔwɔɔ waŋndo o sondo.
I cho wana cho landaŋ ndo a wana cho kpɛɛluŋ ndo kɔl nyulu cho le fɛɛŋ a fɛɛŋ ndo ke,+
Nduyɛ I cho ndu siŋgi.”
20 “Kɛ wana dɛnɛ wɔɔŋndo cho ko mɛɛ pee mɛŋma ihɛllo wa nuaa ikpoku kpokuei o pɛŋgi le yɛ,
Nduyɛ mi mɛŋma nduaŋ ma wa billo a loolioo hiŋndo yɛ.”
21 Mɛlɛka nuu dimi aa: “Kɔl nyulu cho le wana dɛnɛ wɔɔŋndo le.”+