Kɔliŋtiaŋ Diiŋ Ndɔɔ
9 A wali cho le wanaa laalaŋnda* malaa wo okɔɔ ndu,+ mi poonyial nya bɛɛ yau le ndu le. 2 Kanifuule, I sina maa la nɔ yeemɛi le malaa yɔŋgoo. I cho yoŋgaa kiolɔɔ o waŋnda Masidooniaa lo a nya okɔɔ. I dimul nda maa nya waŋnda Akeya, la cho niŋ a bɛɛndiaŋnda le wɔsioo o pilɛ le malaa yɔŋgoo. Nduyɛ yɔŋgɔŋ nya koŋ tosa mi a bɔɔbɔɔ nɔ yeemɛi le nyɛ pilɛ koŋ kpe tosaa. 3 I cho puaapiliaa viomɔɔ o nya lo, halikpeŋ yoŋga naŋ kelu a nya okɔɔ le malaa yɔŋgoo wo ve fondo fuu le. Lelaŋ, la wa a bɛɛndiaŋ, kanifuule I chii nda niŋ dimul maa la cho wa a bɛɛndiaŋnda. 4 Te ŋ hiŋ pɛ naa puaapiliaa Masidooniaa, miŋ komal nya a bɛɛndiaŋnda le, siɔmbulaŋ la cho naa biyɔɔ le mɛɛ naŋ dɔu tiindaŋndo o nya niŋ yɛ. Kɛ nya bɛɛ siɔmbulaŋ la cho nya biyɔɔ. 5 Lelaŋ, mi yiyaŋ maa o bɛnda mi dɛɛniaa puaapiliaa le ma hiou naa pɔɔ lachi, le mi la chuuŋgiaa toolula nya kɛɛsiaa le yɔŋgoo laŋ. Okoŋ te ŋ hiŋ pɛ, miŋ komal niŋ toolula nyalaŋ, koŋ chɔm maa nyapila chɛl le laŋ yɔŋgoo ni, o cho baŋɔɔ le wana baŋ nya le.
6 Wana saŋ yɛiye nyɛɛmbɔ wo, nyɛɛmbɔ o kuau ni. Kɛ wana saŋ yɛiye tau wo, tau o kuau ni.+ 7 Lelaŋ, wana o wana yɔŋgu mɛɛ o kɛɛsiaa o kɔl ndɔɔ niŋ yɛ. Kɛ o wa a ŋɔɔchiaŋ ɔɔ maa baŋɔɔ le nda baŋ ndu le.+ Kanifuule, Mɛlɛka kaala wana yɔŋgu hoo a kɔllo wulee wo.+
8 Mɛlɛka nɔla mbo tosal nya kɛndɛi nduɛi bɛnduei. O hei niŋ, nyɛ o nyɛ ve nya lepɛŋ te. La nɔla mi la sɔla nyɔɔŋ tau le wali o wali kɛndɛ tosaa.+ 9 (I cho i poonyiaa aa: “Mbo piɔu wanaa bala fonduaa nyɛm ndɔŋ a kɔl ndɔɔ kpou, le ma wa loonɔŋndo a sakpoyɛi nduɛi okɔɔ le fɛɛŋ a fɛɛŋ.”+ 10 Mɛlɛka yɔŋgu hoo wana ichiɔɔ yɛiye tau a nyɛdiaa le dioo wo, o cho nya yɛiye ke le saŋɔɔ, mbo tosa mi i kui. Nduyɛ mbo mala nya mi la kou tɔnɔlaŋ tau le walta kɛndɛla nya tosa laŋ.) 11 Mɛlɛka dɔu nya sala tau o nɛi o nɛi niŋ, le halikpeŋ mi la tosa kɛndɛi tau. Okoŋ mi waŋnda mel Mɛlɛka balikaa le toolula nyala naŋ cho nda ke laŋ. 12 Wali nya cho hoo tosaa le waŋnda malaa wo, o cho ko bahawɛila wanaa laalaŋnda solioo le,+ kɛ o tosa mi wanaa bɔɔbɔɔ wa Mɛlɛka balikaa mello. 13 Wallo hoo le waŋnda malaa chɔm wanaa suu nya cho wa. Hei tosa mi waŋnda saŋgala Mɛlɛka. Kanifuule, nyɛ nya cho hoo tosaa wo, a kɛndɛi nya cho nda a wana o wana fee tosallo ve, o cho o chɛlaŋ a yooŋgu kɛndɛ nya cho dimioo a Kiliti okɔɔ wo.+ 14 A cho Mɛlɛka nyɔɔlu o piɛileŋ niŋ le nya. Nduyɛ a cho nya kaala le mɛɛ Mɛlɛka tosal nya kɛndɛi nduɛi bɛnduei yɛ.
15 Ŋ melnuŋ Mɛlɛka balikaa le kɛndɛi nduɛi bɛnduii wana nɔla tɛɛsiaa le ve.