Timoti Diiŋ Ndɔɔ

4 I cho num silaa hoo yɔŋgoo Mɛlɛka o hɔl a Chiisu Kiliti, o cho hunɔɔ wanaa cho yoomu wa, a wanaa vi wa+ kɔɔsa+ teleŋ o cho chɔɔmɔŋ+ o Masale ndɔleŋ niŋndo:+ 2 Dimul waŋnda suɛi Mɛlɛkɛi.+ Duaunuŋ tamala le ndi tosa le, o wa a teleŋ kɛndɛ, o wa a teleŋ wɔɔŋ. Miŋgi nda o nɛi,+ sila nda o kala kala, luei nda yoomuaŋ, ma wa muŋ kpou tosaa a biuwɔŋndo, nduyɛ ma pɛɛku nda nyɛkɛndɛi.+ 3 Kanifuule, teleŋ cho fuuluu ma kɛɛ pɛɛkula chuu nda tɔnɔɔ laŋ.+ Nduyɛ le yeemɛi ndɛi peeloo, a cho wanaa pɛɛkaa cheleŋ nuuviaa le ma dimul nda nyɛ nda yeema ma wa tueiyɔɔ wo.+ 4 A cho tonyaa kɔɔ mulul, okoŋ ma muliŋ bundɔŋ lachoowaŋ nilaŋ yaŋɔɔ. 5 Kɛ num, wa wana taasi o isɔɔ o isɔɔ niŋ, biunuŋ nyɛkindilaa,+ dimi yooŋgu kɛndɔɔ, nduyɛ ma tosa wali Mɛlɛkaa nyɛkɛndɛi.+

6 Ya yɛ, a chii ya niŋ tala mɛɛ nda tala nuaa sala mamuɛiyo yɛ.+ Nduyɛ, teleŋndo cho niŋ kpɛɛluŋ le mi sɔla piɔmndo.+ 7 I chɔulaba kpeekpei o nɛi kɛndɔɔ choo.+ Nyaanɔŋ ya wa wo, I fuuluu o mɛɛlulaŋ.+ I lo isisi yi o laalaŋ nuu choo. 8 Chɔŋ a boondei hei, fanda cho le wanaa sakpuaa wo cho o kɛsiaa le ya.+ Masanɔ kialu yamaŋ o nɛi sakpoo choo wo+ cho ya fanda koŋ ke o paale leŋ choo ni.+ O cho ko ya le o cho ndu ke le, kɛ wanaa cho a yeemɛi le hunɔɔ ndɔɔ wa bɛɛ cho ndu sɔla.

9 Kindiŋ ma keleŋa hunɔɔ ya ikɛi. 10 Kanifuule, Dimaasi+ mɛi ya mbo kuaŋnuŋ Tɛsalonaika le mɛɛ o kaala chieeŋndo hoo yɛ. Kilɛsiŋ kuɛŋnuŋ Kaleesiaa, mi Taitɔɔ ndu kuaŋnuŋ Dalmasiaa. 11 Luku ndupilɛ kpe cho ya ikɛi naŋ ni. A wa hunɔɔ pɛ, la huŋ nya Maki, kanifuule o nɔla mbo mala ya tau o wallo hoo niŋ. 12 I vem Tichikɔɔ+ Ɛfisɔɔ. 13 Te a wa hunɔɔ pɛ, chuu ya doma ihuei ya mɛi Kaapɔɔ o ba Towaasi wo, a yaula simbulaa laŋ, taama taama la nda toosiaa a yaula visiaa laŋ.

14 Alɛkisanda, o cho sumnɔɔ wo tosal la bɔɔ dɛnɛ wɔɔŋndo. Chɛhowa* cho ndu maa miŋgul le nyɛ o nyɛ o tosa.+ 15 Num bɛɛ mandaŋ a ndu, kanifuule o simul yooŋgu naŋ cho hoo dimioo wo o kala kala.

16 Teleŋ tase nda wa kɔɔsɔɔ a ya wo, wana pilɛ bɛɛ hiŋ ya ikɛi le. Mi nda kpou mal la. Maa Mɛlɛka bii nda tɔɔyaŋ le keŋ te. 17 Kɛ mi Masanɔɔ sim ya ikɛi mbo luei ya yoomuaŋ, le halikpeŋ mi nɔla yooŋgu Mɛlɛkaa kpou dimioo, le mi waŋnda o kaalaŋ niŋ kpou tuei ndu.+ Nduyɛ mi Masanɔɔ piŋi ya kpɔkuŋndo* o sondo.+ 18 Masanɔɔ cho ya piŋi o isɔɔ o isɔɔ wɔɔŋ niŋ, nduyɛ mbo manda ya le Masale ndɔleŋ o choo choo niŋ.+ Maa o sɔla biiloo le fɛɛŋ a fɛɛŋ fɔ! Amiina.*

19 La yil la Pilisika nda Akuila.+ La yil la vɛlɛ yuŋgu Onɛsifulɔɔ wo.+

20 Iluatɔsi+ lo Kɔliŋ, kɛ mi mɛi Tilofimɔɔ+ Miletɔɔ, kanifuule o wa a naa. 21 Kindiŋ kpoke ma hiŋ tuupa mi sialteŋ le luɛi.

Yubulɔɔ yil nya lapi. Pudɛŋ ni, Lanɔɔsi ni, Kulɔdiaa ni, a puaapiliaa kpou yil nya lapi.

22 Maa Masanɔɔ wa a nya latulu le kaa nya cho chɔmndo wo fɔ! Maa o tosal nya kɛndɛi nduɛi bɛnduei fɔ!