Maki

1 Mɛɛ yooŋgu kɛndɔɔ a Chiisu Kiliti okɔɔ, Po Mɛlɛkaa kanduŋ yɛ cho hoo ni: 2 A mɛɛ i poonyiaŋ o yau Aisaya wana ndoo suaa le Mɛlɛka wo niŋ yɛ aa: “(I cho buɛi nuu viomɔɔ, mbo kɔ toosiaa pɔɔ nɛiyo num lachi.)*+ 3 Waŋndo cho yondaa o pollo niŋ aa: ‘La bɛɛndiaa nɛi Chɛhowa wo! La toosiaa ndu mbo wa sakpo.’”+ 4 Chɔŋ Wana Yiŋaa wa o pollo niŋ, mbo wa waŋnda dimullo le ma wookuŋ ma yiŋ, okoŋ ma sɔla malɔɔ hakioo.+ 5 Waŋnda o tanda Chudiaa wo niŋ, a Chulusalɛm kpou wa kɔlaŋ naa Chɔŋ chua. A wa yɔŋnda ndala wɔɔŋndaŋ chɔɔmuu wo kpendekele,+ okoŋ mbo yiŋ* nda o Pioo Chɔɔdaŋ niŋ. 6 Doma wa Chɔŋ lekɔɔ wo, a yiiŋii nyɔɔmiaa ndaa toosiaa ndu ni. Yaule wa ndu o chaŋ ndeŋ, a yau visioo nda toosiaa leŋ ni.+ Soonuaa a liaaŋ ndoo dia ni.+ 7 O wa yooŋgoo dimioo aa: “Wana cho hunɔɔ ya kɔɔli wo hiou ya poloŋ. I suliŋ bɛɛ le mi tunduŋ mi timbi yuei nduɛi lakɔwɛiye* le.+ 8 Ya ya, a mɛŋndaŋ ya yiŋ nya ni. Kɛ ndu ndu, a nyina diandaa o cho nya yiŋɔɔ ni.”+

9 A teleŋ koŋ, mi Chiisu chaŋ Naasaluɛi o tanda Kalili wo niŋ, okoŋ mi Chɔŋ yiŋ ndu o Pioo Chɔɔdaŋ niŋ.+ 10 Dimioo nuaa o fula o mɛŋndaŋ bɛŋgu, mbo cha mi choo choo kumbiŋ, mi nyina diandaa tual ndu choo maa kaŋgbo.+ 11 Okoŋ mi diomndo fula o choo choo niŋ aa: “Num cho Po nuu ni. I kaala num, nduyɛ I hini kɔl a num.”+

12 O lepilɛ niŋ kpe, mi nyina Mɛlɛkaa tosa mi Chiisu kua o pollo niŋ. 13 Mbo tosa palɛi 40 o pollo niŋ. Mi Setana kɔ tɔɔndaŋ ndu.+ O wa latulu a visiaa yonduaa, kɛ maalikɛiya wa ndu malaa.+

14 Mɛɛ nda bii Chɔŋ, mi Chiisu kuaŋnuŋ Kalili,+ mbo kɔ wa waŋnda yooŋgu kɛndɛ Mɛlɛkaa dimullo+ 15 aa: “Boondii kɛɛsiaŋ nde fuuluu, nduyɛ Masale Mɛlɛkaleŋ le cho niŋ kpɛɛluŋ. La wookuŋ,+ okoŋ mi la dɔu laalaŋndo o yooŋgu kɛndɔɔ niŋ.”

16 Mɛɛ o wa Pioo Kalili diomɔɔ, mbo cha Saimɔŋ nda Andulu pɔmbɔ ndɔ.+ A wa yalala ndalaŋ wuuwo o peelo.+ Wanaa yɔɔyaa nda wa ni.+ 17 Mi Chiisu dimul nda aa: “La tol la kɔɔli. I cho nya siiŋguu wanaa yɔɔyaa ŋwaŋnda chiee.”+ 18 O lepilɛ niŋ kpe, ma mal yalala ndalaŋ, ma tual ndu kɔɔli.+ 19 Mɛɛ o kuɛ tiŋ lachi, mbo cha Chemisi po Sɛbidi wo, a Chɔŋ pɔmbɔ ndɔ o dɛndɔɔ niŋ. A wa yalala ndalaŋ sondi sondioo.+ 20 Mbo veelu nda chɔ chɔ. Ma mɛi bɛɛ Sɛbidi finya nda o dɛndɔɔ niŋ a wanaa ndaa walla, ma tual Chiisu kɔɔli. 21 Okoŋ, ma kua Kepaaniɔm.

Mɛɛ Paale Pɛŋgiaaleŋ le kanduŋ dɔɔ, mbo kɔ luɛi o chiɛi Chuuwa piɛi Mɛlɛka wo niŋ, mbo kandu waŋnda pɛɛkoo.+ 22 Mi kɔndɔfillo bii nda a mɛɛ ndoo chaa pɛɛkoo yɛ. Kanifuule, o wa nda pɛɛkoo maa wana nda ke kpaayaa wo. O ve maa wanaa pɛɛku waŋnda sawala Mɛlɛkalaŋ nda le.+ 23 Poo pum wa loŋ, nyina wɔɔŋndo wa ndu kɔɔli. Mbo deŋi aa: 24 “Yɛɛ ŋ yeema yɛ ma tosal naa, num Chiisu fula hoo Naasaluɛi yo?+ Baa le naa tɛɛmbuuwo ŋ hiŋ ni? I sina wana ŋ cho wo. Buɛi Diandaa Mɛlɛkaa ŋ cho ni!”+ 25 Kɛ mi Chiisu kpaa ndu aa: “Mei, nduyɛ ma faŋaŋ poo hoo kɔɔli!” 26 Mɛɛ nyina wɔɔŋ koŋ chua poo, mbo mal ndu lɛŋ, mbo deŋi choo choo kpeleŋ. Okoŋ mbo faŋaŋ ndu kɔɔli. 27 Mi kɔndɔfillo bii waŋnda kpou. Le hei, ma kandu dimulaŋndo aa: “I maavɛɛ cho yɛ hei? Baa pɛɛku sɛnɛiyo ni? O nɔ kpaayaa le mbo tou nyinaa wɔɔŋnda, nduyɛ ma diikuŋ ndu.” 28 Le hei, mi tɔɔ ndɔɔ keleŋa tiu ba o ba fee o tanda Kalili wo niŋ.

29 Mɛɛ Chiisu nda Chemisi a Chɔŋ faŋaŋ o chiɛi Chuuwa piɛi Mɛlɛka wo niŋ, ma kua o chiɛi Saimɔŋ nda Andulu wo.+ 30 A komal Saimɔŋ lefu ndɔ laandoo+ ihini kpu a dialuŋ tuuwoŋ. Okoŋ ma dimul Chiisu chɔ chɔ a ndu okɔɔ. 31 Mɛɛ Chiisu sɔɔŋguu ndu ikɛi, mbo saa ndu baa mbo chua ndu, mbo siaŋgu. Okoŋ mbo kandu nda nyɛdiaa toosiallo.

32 Mɛɛ paaleŋ le del, mi waŋnda wa hunɔɔ a wanaa wa a naalaŋ nda, vɛlɛ a wanaa nyinaa wɔɔŋnda wa kɔɔli wa kpou naa ndu chua.+ 33 Mi chioo kpou huŋ chuuŋgiaŋ o dio. 34 Mbo siŋgi wanaa bɔɔbɔɔ wa a naala yɛ yɛlaŋ nda.+ Nduyɛ, mbo tuau nyinaa wɔɔŋaa bɔɔbɔɔ. Kɛ, o chɛl mi nyinaa wɔɔŋaa kaŋ soo le, kanifuule ndaa sina maa ndu cho Kiliti ni.*

35 Idiiyo puŋ, nyumndaŋ ma wa wɔ, mbo chaŋ mbo fula o bɛɛ, mbo kuaŋnuŋ o fondaŋ yololiɔɔ. Okoŋ mbo kandu piɛileŋ.+ 36 Kɛ, mi Saimɔŋ nda chaaŋaa nduaa kua ndu nuuviaa. 37 Mɛɛ nda che ndu, ma dimul ndu aa: “Waŋnda kpou cho num nuuviaa.” 38 Kɛ mbo dimul nda aa: “Ŋ kɔŋnuŋ naa cheleŋ, o chieeŋ cho kpɛɛluŋ ndoŋ, le mi dimul vɛlɛ kaŋ loŋ yooŋgu kɛndɔɔ, kanifuule le sabu koŋ ya hiŋ ni.”+ 39 Mbo balu yooŋgu kɛndɔɔ dimioo o chiɛila Chuuwa piɛi Mɛlɛka laŋ niŋ, o tanda Kalili wo niŋ kpou. O wa waŋnda nyinaa wɔɔŋnda touwɔɔ kɔɔli.+

40 Mi wana ŋlɛlɔɔ huŋ naa Chiisu chua. Mbo beŋ ndu wulaŋ, mbo nyɔɔlu ndu aa: “Te a yeema pɛ, a nɔla ma siŋgi ya.”+ 41 Mi nyiɛɛye bii ndu. Okoŋ mbo siɛndi baa, mbo pilaŋ ndu. Mbo dimi aa: “I yeema! Sioŋgu.”+ 42 O lepilɛ niŋ kpe, mi lɛlɔŋ faŋaŋ ndu lekɔɔ, mbo siaŋgu. 43 Okoŋ, mi Chiisu sila ndu o kala kala, nduyɛ mbo dimul ndu maa o kɔŋnuŋ. 44 Mbo dimul ndu aa: “Dimul wana o wana a hei okɔɔ le. Kɛ, kɔ chɔɔmuŋ o wana soliaa lasalaa lo, nduyɛ ma soli salaa a mɛɛ Sawala Mɛlɛka ke Muuse laŋ la dimi yɛ,+ le ma wa lesei.”+ 45 Kɛ mɛɛ poo hoo kuɛ, mbo kandu waŋnda dimullo a ndi okɔɔ. Mbo tiu ndi silɔ. Le hei, Chiisu ndoo luei lɛ o chioo niŋ kpendekele le. Mbo chalnuŋ o fondaŋ yololiɔɔ. Kɛ waŋnda wa chɔnɔŋndo ba o ba fee ma huŋ o ndu lo.+