Tɛsaloniaŋ Tasoo

5 Puaapiliaa, boonduŋ kpeekpei sɔɔŋ muŋ cho hunɔɔ yɔŋnɔŋ ndoŋ, I nɔ mi poonyial nya yau a muŋ okɔɔ le. 2 Kanifuule, nyapila sina walaŋ maa paale Chɛhowa* leŋ+ le cho hunɔɔ mɛɛ viinɔɔ huŋ nuaa o nyumndaŋ niŋ yɛ.+ 3 Boondii wa niŋ mi waŋnda wa dimioo aa, “Kɔl nyuloo cho niŋ ba o ba fee. Mbɔ wana yɔŋnuŋ niŋ isiooŋ fuu!” A teleŋ koŋ, nyɛpalaa bɛndoo tual niŋ nda choo o lepilɛ niŋ kpe,+ mɛɛ pulii vialɛi i kpuuwa nuaa wana folioo* yɛ. Wana pilɛ bɛɛ heluŋ niŋ te. 4 Kɛ nya puaapiliaa, la cho o manyum niŋ te. Lelaŋ, paale leŋ le woolu niŋ nya mɛɛ paale siaaleŋ le woolu nuaa viiya yɛ le. 5 Nya kpou, chuauwaa nyɛ teŋgaa a chuauwaa lepalaa nya cho ni.+ Ŋ cho chuauwaa manyum ɔɔ chuauwaa ichɔl te.+

6 Lelaŋ, ŋ lɔlnuŋ maa waŋnda a tuaa le.+ Kɛ ŋ waŋnuŋ lahɔl,+ nduyɛ miŋ wa yekeŋ.+ 7 Kanifuule, ichɔl wanaa lɔl la a lɔl ni. Nduyɛ ichɔl wanaa kolaa kol ni mi ma bii nda.+ 8 Kɛ mɛɛ naŋ cho chuauwaa ipalaa yɛ, ŋ waŋnuŋ niko yekeŋ. Ŋ wounuŋ laalaŋndo a kaalaa maa doma chɔu. Nduyɛ, miŋ wounuŋ tiindaŋ naŋ nɔ le pioŋɔɔ sɔlaa wo maa mɔsil chɔu.+ 9 Kanifuule, Mɛlɛka hɛli naa le mbo tusi naa kɔl ndɔ tuuwo choo le. Kɛ le miŋ sɔla pioŋɔɔ+ sanaa o Masanɔ naa Chiisu Kiliti niŋ. 10 Le naa o vi ni.+ Lelaŋ, ŋ wa lahɔl ɔɔ o luaŋ, ŋ waŋnuŋ latulu naa ndaa.+ 11 Lelaŋ, la hiou lachi a dɛɛniaŋndo vellaa velle,+ a yoomuaŋ lueinaŋndo mɛɛ nya cho tosaa yɛ.

12 Puaapiliaa, ŋ cho nya nyɔɔloo maa wanaa cho wallo tosaa kalaŋ nya tɛɛŋ o wali Masanɔɔ niŋ, nduyɛ ma wa chilaŋ chuaa a nya silaa wa, la ke nda bɛɛleŋ. 13 La ke nda bɛɛleŋ tau, nduyɛ mi la kaala nda le wali nda cho tosaa wo.+ Kɔl nyuloo wa nya tɛɛŋ vellaa velle.+ 14 Kɛ nduyɛ, ŋ cho nya nyɔɔloo le mi la sila wanaa tosa sɔɔŋ laasi laasi wa,+ mi la dɛɛniaa wanaa cho a kɔlta tambɛilaŋ nda, mi la luei wanaa vi ŋdial la yoomuaŋ, nduyɛ mi la biunuŋ wana o wana.+ 15 La sina pɛŋgu maa wana o wana nɔ mbo miŋgi maa le suɛi wɔɔŋii waŋndo tosal ndu ve le.+ Kɛ la wa dɛnɛ kɛndɔɔ tosaa nyapila tɛɛŋ lɔɔlɔɔ, mi la wa vɛlɛ wanaa cheleŋnda ndu tosallo.+

16 La wa a nyaale teleŋ o teleŋ.+ 17 La wa piɛileŋ teleŋ o teleŋ.+ 18 La mel Mɛlɛka balikaa le nyɛ o nyɛ.+ Kanifuule, hɛnaŋ Mɛlɛkaa cho koŋ ni le buɛiyaa Chiisu Kiliti wa. 19 La kuuna nyina diandaa wallo tosaa le.*+ 20 La pɛɛsa sɔɔŋ wanaa ndaa suaa le Mɛlɛka wa dimi woŋ te.+ 21 La mɛɛndiaŋ nyɛ o nyɛ,+ mi la che te o bɛnda pɛ. La bii nyɛ cho o kɛndɔɔ wo kpiŋ. 22 La kɛɛ isɔɔ o isɔɔ cho suɛi wɔɔŋ.+

23 Maa Mɛlɛka kɔl nyuloo tosa mi la wa a diandaa lɔɔlɔɔ. Maa kaala nyala kɛndɛlaŋ, yoomula nyalaŋ, a dialuŋ nyaŋ kpou wa ŋ diandaa fɔ. Okoŋ te Masanɔɔ Chiisu Kiliti hiŋ pɛ, tɔɔyaŋ o tɔɔyaŋ ve nya choo le.+ 24 Wana veelu nya wo cho keŋ tosa, kanifuule o cho wana lo o lediom.

25 Puaapiliaa, la hiou lachi a piɛileŋ le naa.+

26 La yil puaapiliaa kpou o kaalaa niŋ.

27 I cho nya nyɔɔloo o diola Masanɔɔ niŋ maa la veelu diomndaŋ o yauwo hoo niŋ puaapiliaa kpou o hɔl.+

28 Maa kɛndɛi bɛnduii Masanɔ naa Chiisu Kiliti ve wa nya choo fɔ!