Chɔɔchiaa

16 A teleŋ pilɛ, mi Samsiŋ kua Kaasa mbo kɔ chɔ wana lanɔ tiamaa loŋ, nduyɛ mbo kua o ndu lo chiɛiniŋ. 2 Mɛɛ waŋnda Kaasa tuei maa Samsiŋ cho loŋ, ma kɔ balu fondaŋ o wa wo silɔ. Ma viŋi viŋiŋ o dio kpaki chioo le ndu mɛŋgɛlaa. Ma lɔl ndu mɛŋgɛlaa pii pii, nduyɛ a wa a meiyaa doŋ doŋ. A wa dimioo aa: “Te paaleŋ le sɛ dɔɔ pɛ, ŋ cho ndu diyɔɔ.”

3 Samsiŋ lo ihini loŋ haaa a ditɛɛŋndo. Mɛɛ o chɛŋ a ditɛɛŋndo, mbo saa diola kpaki chioo a kpeŋguŋ muuŋ saa laŋ ndo latulu a chiliŋii nda kinda laŋ ndo, mbo suŋgu. Mbo handuŋ ndaŋ o lachoŋgu, mbo kua a laŋ o pembii bɛnduei choo Hɛbulɔŋ ikɛi.

4 Okoŋ kɔɔli, mbo kaala wana lanɔ pilɛ o kpoloŋndo Soluɛki, diolaŋ aa Dilaila.+ 5 Mi waŋ banaa Filitiaŋnda kua o Dilaila lo, ma dimul ndu aa: “Hui* ndu+ le ma sina nyɛ tosa mbo nɔ kpaaya bɛndoo hoo wo, nduyɛ a mɛɛ naŋ looku miŋ bii ndu, miŋ yii ndu, nduyɛ miŋ tiu ndu ba yɛ. Okoŋ mi naa o kɛ kɛ ke num kaniŋ humboŋ 1,100.”

6 Mɛɛ nyɔɔ viou tiŋ, mi Dilaila nyuna Samsiŋ aa: “Yandii dimul la, yɛɛnɛ tosa yɛ ma nɔ kpaaya bɛndoo hoo? Nduyɛ yɛɛnɛ wana soliŋ yɛ kpeku le num yiiyo, mi wana tiu num ba?” 7 Mi Samsiŋ mulul ndu aa: “Te a yii ya pɛ a yuei sɛnɛi nda kindu chiɔuleŋ nde i ŋɔmmɛu i vesa wɔ le ve, kpaaya nuu cho chuwɔɔ, okoŋ mi simnuŋ maa wanachiee kɛ kɛ.” 8 Mi waŋ banaa Filitiaŋnda huŋ a yuei sɛnɛi nda kindu chiɔuleŋ nde i ŋɔmmɛu i vesa wɔ le ve, okoŋ mi Dilaila yii ndu a ndi. 9 Nduyɛ a wa a viaŋnaŋ o lumui cheleŋ niŋ, okoŋ mi Dilaila deŋi choo choo aa: “Samsiŋ, Filitiaŋnda hinul num!” O lepilɛ niŋ kpe, mi Samsiŋ kili kili yuei nda yii ndu ve, mɛɛ mɛɛ kɛiyo pilaŋ nuaa yiŋndeŋ mbo kiolu yɛ.+ Ma bumba le sinaa nyɛ tosa mbo nɔ kpaayaa wo.

10 Mi Dilaila dimul Samsiŋ aa: “A hui ya, nduyɛ ma dimul la choolaŋ. Yandii, dimul la, a yɛɛnɛ kpeekpei wana yii yɛ num?” 11 Mi Samsiŋ mulul ndu aa: “Te a yii ya pɛ a yuei sɛnɛi nda soliŋ ndɔ kpeku le ve, kpaaya nuu cho chuwɔɔ, mi simnuŋ maa wanachiee kɛ kɛ.” 12 Okoŋ mi Dilaila chua yuei sɛnɛiye mbo yii ndu a ndi. Mbo deŋi choo choo aa: “Samsiŋ, Filitiaŋnda hinul num!” (A teleŋ koŋ kpou, waŋnda wa wɔ a viaŋnaŋ o lumuiyo o pilɔɔ niŋ.) O lepilɛ niŋ kpe, mbo kili kili yuei nda yii ndu ve maa lakɛi.+

13 Okoŋ mi Dilaila dimul Samsiŋ aa: “A cho wɔ ya huiyo, nduyɛ ma wa wɔ ya choolaŋ dimullo kɛ.+ Dimul la, a yɛɛnɛ kpeekpei wana yii yɛ num?” Okoŋ mi Samsiŋ dimul ndu aa: “Mɛɛ ma lɔfa kandela ŋɔmmɛula cho ya o lebol taŋ a kɛiyo.” 14 Okoŋ mbo lɔfa kandela laŋ, mbo saa laŋ a peniiye. Mbo deŋi choo choo aa: “Samsiŋ, Filitiaŋnda hinul num!” Mi Samsiŋ yiŋga o luaŋ, mbo soli penii keŋ a kɛiyo.

15 Mbo dimul Samsiŋ aa: “Le yɛɛnɛ ŋ dimi yɛ maa a kaala ya,+ te a viŋ ya pɛ kɔl numndo? Bɛmbɔɔ le yaa kpulukuu a cho ya huiyo, nduyɛ ma kɛɛ le ya chɔmndo nyɛ tosa ma nɔ kpaaya bɛndoo hoo wo.”+ 16 Lepaa o lepaa chuaa hoo wa ndu iloko lokuei kɔɔli. Le hei, mbo saŋga niŋ a ndu biuwɔŋndo.+ 17 O mɛɛlulaŋ kpɔŋ, mi Samsiŋ kumbul Dilaila kɔl ndɔɔ. Mbo dimul ndu aa: “Kani bɛɛ a sendi wɔ ya le. Kanifuule, Naasiluɛinɔ Mɛlɛkaa ya cho ni chɔŋ a violɔŋ nuu.+ Te a sendi ya pɛ, kpaaya nuu cho chuwɔɔ, okoŋ mi simnuŋ maa wanachiee kɛ kɛ.”

18 Mɛɛ Dilaila che maa Samsiŋ kumbul ndu kɔl ndɔɔ, mbo veelu waŋ banaa Filitiaŋnda+ chɔ chɔ aa: “O laŋ niŋ, la huŋ, kanifuule o chii ya kɔl ndɔɔ kumbul.” Okoŋ mi waŋ banaa Filitiaŋnda huŋ naa ndu chua a kaniŋ nda dimi le ndu kioo woŋ. 19 Mi Dilaila tosa mi Samsiŋ lɔl ndu o bɛŋgu. Okoŋ, mbo veelu poo, mbo huŋ sendi ndu kandela ŋɔmmɛula wa ndu o lebol taŋ. Okoŋ kɔɔli, mi Dilaila kandu ndu kpaayaa nɔɔ choo. Kanifuule, kpaaya ndɔɔ wa fulaŋndo ndu o ŋdial. 20 Mi Dilaila deŋi choo choo aa: “Samsiŋ, Filitiaŋnda hinul num!” Mɛɛ o tendu o luaŋ, mbo dimi aa: “I cho lahau lakɔ mɛɛ ya tosa paandu yɛ,+ nduyɛ mi hɛluŋ.” Kɛ o sina nuaa maa Chɛhowa faŋaŋ ndu kɔɔli le. 21 Okoŋ mi Filitiaŋnda bii ndu, ma kaaliaa ndu hɔltaŋ. Okoŋ kɔɔli, ma kua a ndu Kaasa, ma baa ndu yɔlɔŋ nda toosiaa a chiliŋii siaŋɛi yoŋ* ŋ muuŋ. Nduyɛ, mbo simnuŋ wana chuiyaa ŋwitiiyo o chiɛi manyumndo niŋ. 22 Kɛ o sendi nda sendi ndu wo kɔɔli, mi yiiŋnde kandu ndu vɛlɛ wulɔɔ.+

23 Paale pilɛ, mi waŋ banaa Filitiaŋnda chuuŋgiaŋ naapilɛ le sala bɛndoo solioo o mɛlɛka ndaa lo Dakɔŋ,+ a le dunyɛi tosaa. Kanifuule, a wa dimioo aa: “Mɛlɛka naa mal naa Samsiŋ, yaamɔɔnɔ naa o ba!” 24 Mɛɛ waŋnda che ndu, ma saŋgala mɛlɛka ndaa, ma dimi aa: “Mɛlɛka naa mal naa yaamɔɔnɔ naa o ba, wana tɛɛmbuu lɛŋnde naaleŋ,+ nduyɛ mbo diu wanaa bɔɔbɔɔ naa tɛɛŋ ndo.”+

25 Le mɛɛ ndaa hiu wa a kɔl kɛndɛ yɛ, ma dimi aa: “La veelullɔ naa Samsiŋ, mbo huŋ tosal naa sɔɔŋ mamaŋ.” Okoŋ ma kɔ soli Samsiŋ o chiɛi manyumndo niŋ le mbo huŋ tosal nda sɔɔŋ mamaŋ. Nduyɛ ma tosa mbo sim o suŋgbuaŋ tɛɛŋ. 26 Okoŋ, mi Samsiŋ dimul poombɔ wa ndu baa saa wo aa: “Mala ya mi pilaŋ suŋgbuma saa chiɛiyo waŋ, le mi tiindaŋ maŋ.” 27 (Nduyɛ a boondii keŋ, waŋ piaanduaa a waŋ laanduaa wa a piaa cha o chiɛi koŋ niŋ. Waŋ banaa Filitiaŋnda kpou wa loŋ. Nduyɛ, waŋ piaanduaa a waŋ laanduaa wa o chiɛi koŋ tullo wa ndaa wa le 3,000. Nda kpou wa Samsiŋ tofaa teleŋ o wa sɔɔŋ mamaŋ tosaa wo.)

28 Mi Samsiŋ+ piɛi o Chɛhowa lo aa: “Chɛhowa, Mɛlɛka Kpuluŋguma Bɛndoo, a yandii, loonuŋ a ya, nduyɛ ma ke ya kpaayaa.+ Oo Mɛlɛka, a yandii ke ya kpaaya mɛɛlaa, le mi miŋgul Filitiaŋnda maa o yɔŋ bɛɛ le hɔlte nileŋ le pilɛ.”+

29 Okoŋ, mi Samsiŋ sim o suŋgbuma miɔɔŋma saa chiɛiyo waŋ tɛɛŋ. Mbo handu ba ndɔ kɛndɔɔ o le pilɛ choo, nduyɛ mbo handu ba ndɔ miallo o le pilɛ leŋ choo, mbo kinduŋ. 30 Mi Samsiŋ deŋi choo choo kpeleŋ aa: “I wu wɔ a Filitiaŋnda latulu!” Okoŋ mbo nyindu maŋ a kpaaya ndɔɔ kpou, mi chiɛiyo komba waŋ banaa Filitiaŋnda choo, a wanaa wa leniŋ nda kpou.+ Wanaa o dii o paale o vi leŋ choo wa ndaa hiou poloŋ, a wanaa o dii teleŋ o wa yoomu wo.+

31 Okoŋ kɔɔli, mi pɔmbuaa nduaa, a waŋnda o yuŋgu finya ndɔ wo niŋ kpou kɔ chua dialuŋ ndɔŋ, ma kɔ kumbu muŋ Soluaa+ a Ɛsitawɔɔ tɛɛŋ, o sɛi Manowa+ finya ndɔ wo niŋ. Le wɔsilaŋ 20, Samsiŋ wa wana kialaa ŋyamaa o Isɔluɛi niŋ.+