Luomaŋnda

5 Lelaŋ, mɛɛ naŋ simnuŋ niŋ wanaa sakpuaa le laalaŋ naa yɛ,+ ŋ hiounuŋ lachi a waa o kɔl nyulu niŋ a Mɛlɛka sanaa o Masanɔ naa Chiisu Kiliti niŋ.+ 2 Laalaŋ naŋ nɔ o Chiisu niŋndo tosa ni miŋ sɔla dioo le suɛi o Mɛlɛka lo, nduyɛ miŋ wa kɛndɛi nduɛi bɛnduei tueiyɔɔ yeela.+ La ŋ waŋnuŋ a nyaale, kanifuule ŋ nɔ tiindaŋndo maa Mɛlɛka cho naa ke foofo filioŋndo. 3 O cho ko keŋ te, kɛ ŋ nɔla miŋ wa a nyaale o nyɛpalaa niŋ,+ kanifuule ŋ sina maa nyɛpalaa mala naa miŋ biunuŋ.+ 4 Biuwɔŋndo tosa mi Mɛlɛka hini kɔl a naa.+ Te Mɛlɛka hini yɛ pɛ kɔl a naa, koŋ ke naa tiindaŋndo.+ 5 Nduyɛ tiindaŋndo hui naa le,+ kanifuule kaala Mɛlɛka ke naa sanaa a nyina diandaa wo pɛ naa o lakɔl cha.+

6 Boondii naŋ nɔ wɔ mayoomu le ve,+ mi Kiliti wu le wanaa yɔŋ wɔɔŋnda a boondii Mɛlɛka pila kɛɛsiaa ve. 7 O kendu le mi waŋndo vi le wana sakpoo. Kɛ naapum mi waŋndo yɔŋguŋ le mbo vi le wana kɛndɔɔ. 8 Mɛlɛka chɔm naa kaala ndɔɔ, kanifuule teleŋ naŋ wa wanaa lahakiaa wo, mi Kiliti wu le naa.+ 9 Le mɛɛ kooma Chiisu waŋ ma tosa miŋ simnuŋ wanaa sakpuaa yɛ,+ ŋ chɔɔlu tiindaŋndo sɔla maa ŋ cho pioŋɔɔ sɔla o paale kɔl tuule Mɛlɛkaleŋ choo.+ 10 Mi che bɛɛ yaamɔɔwaa Mɛlɛkaa naŋ wa ni, kɛ piɔm Po ndɔɔ tosa miŋ miiŋgu o diompilɔɔ niŋ a ndu.+ Hei tosa miŋ chɔɔlu laalaŋ maa ŋ cho pioŋɔɔ sɔla sanaa o Po ndɔɔ niŋ, kanifuule ŋ cho niŋ o diompilɔɔ niŋ a Mɛlɛka. 11 Nyɛ Mɛlɛka tosa o sabu Masanɔ naa Chiisu Kiliti niŋndo tosa miŋ wa a nyaale, kanifuule o ndu niŋ naŋ miiŋgu o diompilɔɔ niŋ a Mɛlɛka ni.+

12 Waŋndo ndupilɛ kpe tosa ni mi hakioo huŋ o chieeŋndo choo, nduyɛ mi hakioo huŋ a piɔmndo.+ Le hei, mi piɔmndo tiu ŋwaŋnda chiee choo kpou, kanifuule nda kpou tosa hakioo+—. 13 Hakioo wa niŋ o chieeŋndo choo tuupa mi Sawaa* huŋ. Kɛ te sawa ve le, a bii wana o wana maa o tosa hakioo le.+ 14 Chɔŋ a teleŋ Adam ndo haaa a teleŋ Muuse wo, piɔmndo wa waŋnda chieeya choo masa. Nduyɛ wanaa tosa haki maa Adam te wa bɛɛ, o wa nda choo masa. Adam wa velaŋ wana wa hunɔɔ o chilaŋ niŋndo ni.+

15 Ke Mɛlɛkaa cho maa haki Adam ndo le. Le haki wana pilɔɔ hoo kpe wanaa bɔɔbɔɔ cho hau piɔmndo sɔlaa ni. Kɛ kɛndɛi bɛnduii Mɛlɛkɛi a ke naŋ paawa* nyɛ o nyɛ le wo hiou poloŋ. O kɛndɛi bɛnduii Chiisu Kiliti ve niŋ naŋ sɔla kioo hoo ni.+ O ndi niŋ wanaa bɔɔbɔɔ cho tɔnɔɔ sɔla ni.+ 16 Ke Mɛlɛkaa a haki wana pilɔɔ, teŋgeŋndo cho nda tɛɛŋ o nɛiyo hoo choo: Mɛɛ wana pilɔɔ tosa hakioo,+ mi Mɛlɛka kilul ndu yamɛi le piɔmndo sɔlaa.+ Kɛ mɛɛ wanaa bɔɔbɔɔ tosa hakioo, mi ke Mɛlɛkaa tosa ma simnuŋ wanaa sakpuaa.+ 17 Le haki wana pilɛ koŋ piɔmndo cho masaa ŋwaŋnda chiee choo ni.+ Kɛ wanaa sɔla kɛndɛi bɛnduii Mɛlɛkɛi tau, nduyɛ ma sɔla kioo le waa wanaa sakpuaa wa+ cho wa yoomu, ma wa masaa+ o sabu wana pilɔɔ niŋ, Chiisu Kiliti.+

18 Mɛɛ haki wana pilɔɔ tosa mi waŋnda chieeya suu o suu wa piɔmndo sɔlaa yɛ,+ lende koni waŋnda suu o suu cho simnɔŋ wanaa sakpuaa le waa yoomu ni,+ le mɛɛ wana pilɛ tosa nyɛ cho sakpo wo yɛ.+ 19 Le mɛɛ wana pilɛ kɛɛ Mɛlɛka diikɔŋndo yɛ, mi wanaa bɔɔbɔɔ simnuŋ wanaa lahakiaa.+ Lende koni, le mɛɛ wana pilɛ diikuŋ Mɛlɛka yɛ, wanaa bɔɔbɔɔ cho simnɔŋ wanaa sakpuaa.+ 20 Mɛlɛka ke waŋnda chieeya Sawaa le chɔmndo mɛɛ kpɛ nda nɔ hakioo yɛ. Kɛ mɛɛ hakila waŋnda chieeya la chɔɔlu kui,+ mi kɛndɛi bɛnduii Mɛlɛkɛi bɛɛ chɔɔlu handɔŋ lechoo. 21 Le sabu yɛɛ? Mɛɛ hakioo a piɔmndo cho masaa waŋnda chieeya choo yɛ,+ lende koni kɛndɛi bɛnduii Mɛlɛkɛi cho masaa waŋnda chieeya choo ni le ma simnuŋ wanaa sakpuaa. Hei cho tosa ma sɔla yoomu fafɛɛŋndo o sabu Masanɔ naa Chiisu Kiliti wo niŋ.+