Chona
3 Okoŋ, mi Chɛhowa dimul vɛlɛ Chona aa: 2 “Chɔŋ ma kuɛ o chiee bɛndoo niŋ Ninivɛɛ,+ ma kɔ dimul waŋnda loŋ yooŋgu ya cho num hoo dimullo wo.”
3 Mi Chona diikuŋ Chɛhowa, okoŋ mbo chaŋ mbo kua Ninivɛɛ.+ Chiee bɛndu bɛndoo pila* Ninivɛɛ wa ni. Nduyɛ, ndoo chua wana palɛi i yaa le ndu chiiyo balɔɔ. 4 Mɛɛ Chona fuuluu chiee, mbo niilu balɔɔ kpɛŋ a yondaa aa: “O palɛi 40 bɛŋgu, Ninivɛɛ cho tambei sɔla.”
5 Mi waŋnda Ninivɛɛ laalaŋ o Mɛlɛka niŋ.+ Ma bii sumndo, nduyɛ ma wounuŋ nyɛla labɛkilaŋ, chuaambɔ ni kaasoŋnɔ ni. 6 Mɛɛ masaa le Ninivɛɛ tuei yooŋgoo hoo, mbo chaŋ o kpeŋgbei ndɔ lemasaa choo, okoŋ mbo soli doma ndɔ lemasaa mbo wounuŋ nyɛla labɛkilaŋ, nduyɛ mbo chal o pultaŋ niŋ. 7 Okoŋ kɔɔli, mbo dimi le ma yonda o Ninivɛɛ niŋ kpou aa,
“Nyɛ masaa a laŋgbaa nduaa kalla dimi wo cho hoo ni: Wana o wana, ɔɔ chɔlu o chɔlu nɔ mbo de nyɛ o nyɛ le. A nɔ ma de nyɛdiaa kɛ kɛ ɔɔ ma kol mamɛŋ te. 8 Waŋnda chieeya wounuŋ nyɛla labɛkilaŋ, nduyɛ ma wou vɛlɛ chɔluaa ndaa. Nda kpou piɛi Mɛlɛka a kɔllo kpou, ma mulul yɔŋnda ndala wɔɔŋndaŋ kɔɔ, nduyɛ ma mal sɔŋgɔlaŋ. 9 Kɛlɛŋgaa dɔɔ mi Mɛlɛka tonyaa siŋga yiyaŋ ndɔɔ, okoŋ mbo pɔlul kɔllo, o tusi lɛ naa nyɛpalaa choo miŋ sɔla tambei le.”
10 Mɛɛ Mɛlɛka tonyaa che nyɛ nda tosa wo, nduyɛ a mɛɛ nda mulul yɔŋnda ndala wɔɔŋndaŋ kɔɔ yɛ,+ mbo siŋga yiyaŋ ndɔɔ. Okoŋ, nyɛpalaa ndoo dimi le nda tusioo choo wo, o tusi lɛ nda ndu choo le.+