Maki

8 O palɛi keŋ niŋ, mi faŋga bɛndoo chuuŋgiaŋ vɛlɛ. Nduyɛ ndaa nɔ nyɛ o nyɛ le dio le. Okoŋ mbo veelu buɛiyaa nduaa, mbo dimul nda aa: 2 “Nyiɛɛye cho ya bɔɔ le faŋga bɛndoo hoo,+ kanifuule le palɛi i yaa a cho ya kɔɔli, nduyɛ a nɔ nyɛ o nyɛ nda de le.+ 3 Te I mal nda pɛ le miiŋgoo o la nda lo, a cho kei wou o nɛi tɛɛŋ a yiaaŋ. Nduyɛ, apum naa levil nda fula ni.” 4 Kɛ mi buɛiyaa nduaa nyuna ndu aa: “Kuɛɛnɛ naŋ cho yɛ nyɛdiaa* sɔla o fondaŋ yololiɔɔ hoo le mi waŋnda haa de ma pim?” 5 Okoŋ mbo nyuna nda aa: “Vɛɛnɛ nya nɔ yɛ beediiyo* kpuŋgbaŋ?” Ma muli aa: “Kpuŋgbaŋ ŋɔmmɛu.”+ 6 Mbo dimul waŋnda le ma chal lɛŋ. Okoŋ mbo chua beedii kpuŋgbaŋ ŋɔmmɛu koŋ, mbo piɛi, mbo yimi yimi, mbo ke buɛiyaa nduaa le ma piɔu waŋnda. Mi buɛiyaa nduaa piɔu waŋnda.+ 7 Ndaa nɔ vɛlɛ suuwa nyɛɛmbɔ. Mɛɛ o piɛi, mbo dimul nda vɛlɛ le ma piɔu waŋnda. 8 Mi nda kpou dia, ma pum cha. Ma chuuŋgiaa o biŋgi biŋgi nda dema wo, mbo pia kambɛila bɛndulaŋ* la ŋɔmmɛu.+ 9 Waŋ piaanduaa wa loŋ nda a wa le 4,000. Okoŋ mbo dimul nda le ma miiŋgu o la nda lo.

10 O lepilɛ niŋ kpe, mbo luɛi o dɛndɔɔ niŋ nda buɛiyaa nduaa ma huŋ o tanda Dalimanutaa wo niŋ.+ 11 Loŋ Falisiiya huŋ kandu ndu balioo chiŋaa ni le ndu tɔɔndaŋndo. Ma dimul ndu le mbo tosa kaamaa le chɔmndo maa Mɛlɛka vem ndu ni.+ 12 Mbo yoomu fuu. Mbo dimi aa: “Le yɛɛnɛ waŋnda teleŋndo hoo yeema yɛ kaamaa?+ A tonya mi dimul nya, kaama cheleŋ tosaŋ lɛ niŋ kposoŋ le waŋnda teleŋndo hoo le.”+ 13 Okoŋ mbo mɛi nda loŋ, mbo luɛi vɛlɛ o dɛndɔɔ niŋ, mbo taŋ o kɔŋgɔɔ o pilɔɔ.

14 Kɛ, ma puɛɛnuŋ le beediiyo chuaa. Nduyɛ ndaa nɔ nyɛ o nyɛ o dɛndɔɔ niŋ te, mɛɛ beediiyo kpuŋgbɛi i pilɛ kpe.+ 15 Mbo sila nda aa: “La mandaŋ a yiisii* Falisiiya a yiisii kunda Hɛlɔɔ wo.”+ 16 Okoŋ ma kandu sɛɛŋgiaŋndo le mɛɛ nda chue beedii le yɛ. 17 Mɛɛ Chiisu tuei nyɛ nda wa dimioo wo, mbo nyuna nda aa: “Le yɛɛnɛ nya cho yɛ sɛɛŋgiaŋndo maa la hiŋ a beedii le? Mɛɛ la sina wɔ suɛi hei lapɛŋgu le? Baa kɔlta nyalaŋ la nɔla wɔ mi la bii suɛi bila le? 18 ‘La nɔ hɔltaŋ, kɛ la cho pa chɔɔ? La nɔ nilaŋ, kɛ la cho pa tueiyɔɔ?’ La loonuŋ pa 19 teleŋ ya yimi yimi beedii kpuŋgbaŋ ŋuɛɛnoo+ mi ke waŋ piaanduaa 5,000 wo? Vɛɛnɛ o nda dema wo ndoo pɛ yɛ kambɛilaŋ?” Ma mulul ndu aa: “Tɔ a la tiɔɔŋ.”+ 20 “Mɛɛ ya yimi yimi beedii kpuŋgbaŋ ŋɔmmɛu wo mi ke waŋ piaanduaa 4,000, vɛɛnɛ o nda dema wo ndoo pɛ yɛ kambɛila bɛndulaŋ?”* Ma mulul ndu aa: “La ŋɔmmɛu.”+ 21 Okoŋ, mbo nyuna nda aa: “Mɛɛ la sina wɔ ndi lapɛŋgu le?”

22 Ma kua Bɛtisaida. Loŋ waŋnda chuu ndu po sumɛiyo ni, ma nyɔɔlu ndu le mbo pilaŋ ndu.+ 23 Mbo saa po sumɛiyo baa mbo faŋaŋ a ndu chiee. Mɛɛ o tufu ndu lɔluaŋ o hɔl,+ mbo pilaŋ ndu, mbo nyuna ndu aa: “Yɛɛnɛ ŋ cho yɛ chɔɔ?” 24 Mi poo mɛɛndaŋ, mbo dimi aa: “I cho waŋnda chieeya chɔɔ balɔɔ, kɛ maa iyɔm ya cho nda chɔɔ ni.” 25 Mi Chiisu pilaŋ vɛlɛ poo hɔltaŋ, mbo siaŋgu, nduyɛ o wa niŋ nyɛ o nyɛ chɔɔ nyɛkɛndɛ walaŋ. 26 Mbo mal ndu le mbo kuɛŋnuŋ. Kɛ mbo dimul ndu aa: “Miiŋgu chiee le.”

27 Mi Chiisu nda buɛiyaa nduaa mal le kɔlaŋ o sɔndɔkɔlta balu Sisaliaa o Filipai niŋ ndaŋ. Mɛɛ nda wa kɔlaŋ, mbo kandu buɛiyaa nduaa nyunaa aa: “Yɛɛ waŋnda cho yɛ dimioo a wana ya cho wo okɔɔ?”+ 28 Ma mulul ndu aa: “Apum cho dimioo aa Chɔŋ Wana Yiŋaa ŋ cho ni.+ Apum aa Ilaicha.+ Apum aa wana suaa le Mɛlɛka wo opum.” 29 Mbo nyuna nda aa: “Kɛ nya yɛ, vɛɛ nya dimi yɛ? Wana maavɛɛ ya cho yɛ?” Mi Pitɛ mulul ndu aa: “Num cho Kiliti ni.”+ 30 Okoŋ mbo sila nda o kala kala maa a dimul wana o wana a ndu okɔɔ le.+ 31 Mbo kandu nda pɛɛkoo maa Po wanachioo nɔ le saŋgaa sɔlaa tau, mi laŋgbaa kalla, masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda kɛɛ ndu, okoŋ ma dii ndu.+ Kɛ mbo miiŋgu yoomu o paale yaa ndɔleŋ choo.+ 32 Kpendekele o wa suɛi hei dimioo ni. Kɛ mi Pitɛ veelu ndu o lesɔŋgi, mbo kpaa ndu.+ 33 Mi Chiisu muliŋ, mbo tofa buɛiyaa nduaa. Mbo dimul Pitɛ aa: “Faŋaŋ ya nanuŋ,* Setana! Kanifuule, o cho yiyaŋnda Mɛlɛka le ŋ nɔ le, kɛ yiyaŋnda waŋnda chieeya.”+

34 Okoŋ mbo veelu faŋgaa a buɛiyaa nduaa, mbo dimul nda aa: “Wana o wana yeema pɛ mbo simnuŋ buɛi ni, o nɔ mbo kɛɛ ndupila,* nduyɛ mbo chua yɔm ndɔ imɔnɔɔ,* mbo hiou lachi a ya tolɔɔ kɔɔli.+ 35 Wana o wana kindiŋ pɛ le yoomu ndɔɔ piŋioo, o cho ndu hiɔlɔŋ. Kɛ wana o wana chɛl pɛ mi yoomu ndɔɔ hɛluŋ ndu le sabu nuu, a le sabu yooŋgu kɛndɔɔ, o cho ndu miŋgi sɔla.+ 36 Te waŋndo sɔla pɛ nyɔɔŋ o chieeŋndo niŋ kpou, kɛ nduyɛ mi yoomu ndɔɔ hɛluŋ ndu o muŋ nuuviaa niŋ, tɔnɔ yɛɛ wa yɛ o keŋ niŋ?+ 37 Yɛɛ kpeekpei waŋndo yɔŋgu yɛ le yoomu ndɔɔ baŋaa?+ 38 Wana o wana yɔŋ pɛ siɔmbulaŋ le ya, a diomnda nilaŋ o chieeŋ yɔŋ wɔɔŋ sendu hoo a Mɛlɛka le wo niŋ pɛ, mɛɛ Po wanachioo bɛɛ cho siɔmbulaŋ yɔŋ le ndu,+ te o hiŋ pɛ o biilu Finya ndɔ wo niŋ nda maalikɛiyaa diandaa.”+