Maki

9 Okoŋ kɔɔli, mi Chiisu dimul nda aa: “A tonya mi dimul nya, waŋnda apum cho nya tɛɛŋ, a vi niŋ kposoŋ te haaa ma huŋ chɔ mi Masale Mɛlɛkaleŋ le kanduŋ.”+ 2 Mɛɛ palɛi hiou i ŋɔmpum, mi Chiisu chua Pitɛ, Chemisi, a Chɔŋ, ma hel o pembii vilɛi pum choo nda kpeele. Okoŋ, mi Chiisu maŋgaŋ nda o hɔl.+ 3 Mi nyɛla wa ndu lekɔɔ laŋ la yɔŋnuŋ ŋɛlɛŋgi ŋɛlɛŋgi. Mi la yɔŋnuŋ la humbu fo fo. Nyɛ o nyɛ cho o lɛŋndeŋ choo mbo nɔla nyɛlaŋ dindi lende le. 4 Mi Ilaicha nda Muuse fula nda o hɔl, ma cha nda suukaŋndo a Chiisu. 5 Okoŋ, mi Pitɛ dimul Chiisu aa: “Luabai, o bɛnda bɔɔ miŋ wa nanuŋ. Ŋ taŋgullɔɔ tɛndiilaŋ* la yaa. O pilɛ le num, o pilɛ le Muuse, nduyɛ o pilɔɔ le Ilaicha.” 6 Pitɛ ndoo sina pɛŋ nyɛ ndoo nɔ le dimioo wo le, kanifuule a wa a siooŋnde tau tau. 7 Mi yumbu yumboo kilaŋ, mbo kumbu nda kpu. Okoŋ ma tuɛi diomndo+ o yumbu yumboo niŋ aa: “Po nuu cho hoo ni. I kaala ndu.+ La tuei ndu diom.”+ 8 Ma mɛɛndaŋ o lepilɛ niŋ kpe, kɛ a chi lɛ wana o wana cheleŋ nda ikɛi le, mɛɛ Chiisu.

9 Mɛɛ nda wa pembei tolɔɔ, mi Chiisu sila nda o kala kala maa a dimul wana o wana nyɛ nda che wo le,+ haaa mɛɛ mi Po wanachioo huŋ fula waŋvilɛiya tɛɛŋ.+ 10 Ma kɛsiŋ ndi o lakɔl. Kɛ ma wa suukaŋndo ndapila tɛɛŋ a nyɛ fulaa waŋvilɛiya tɛɛŋ sim ndo okɔɔ. 11 Ma kandu ndu nyunaa aa: “Le yɛɛ wanaa pɛɛku waŋnda sawala Mɛlɛkalaŋ nda dimi yɛ niko maa Ilaicha+ fɛlɛŋ nɔ mbo hiŋ?”+ 12 Mbo mulul nda aa: “Ilaicha fɛlɛŋ nɔ mbo hiŋ le nyɛ o nyɛ miŋgioo o fondaŋ ndɔɔ.+ Kɛ le yɛɛnɛ i cho yɛ i poonyiaa a Po wanachioo okɔɔ maa o nɔ mbo saŋga tau tau,+ nduyɛ ma tɛɛmbuu ndu labɛɛ?+ 13 Kɛ mi dimul nya, Ilaicha+ hiŋ niŋ. Nduyɛ mi waŋnda tosa nyɛ o nyɛ nda yeema a ndu, a mɛɛ i cho i poonyiaa a ndu okɔɔ yɛ.”+

14 Mɛɛ nda hiŋ o buɛiya apiliaa lo, ma cha faŋga bɛndoo nda a balaa silɔ. Wanaa pɛɛku waŋnda sawala Mɛlɛkalaŋ nda wa diomndaŋ hiŋaŋndo a nda.+ 15 Kɛ mɛɛ faŋgaa che dɔɔ Chiisu, mi kɔndɔfillo bii nda. Ma nyaanuŋ le ndu kɔlaŋ yilɔɔ. 16 Mbo nyuna nda aa: “A yɛɛ okɔɔ nya cho yɛ diomndaŋ hiŋaŋndo a nda?” 17 Mi wana pilɛ o faŋgaa tɛɛŋ muli aa: “Wana Pɛɛkaa, I chuu num po nuu, kanifuule nyina wɔɔŋndo cho ndu kɔɔli. Mbo tosa ndu o suu le.+ 18 Teleŋnda bɔɔbɔɔ te o chua ndu pɛ, o viɔl ndu lɛŋ, hiiyo fula ndu o sondo, o sɔm chiŋndoŋ, nduyɛ mi yoomuaŋ ma chuu ndu fo. Mi dimul buɛiyaa numnda le ma tou ndu nyina wɔɔŋndo hoo kɔɔli, kɛ a tiuba le.” 19 Mi Chiisu dimul nda aa: “Ee nya waŋnda haa, baa la nɔ laalaŋ te?+ Le vɛɛ kpɛ ya cho yɛ wa a nya latulu? Le vɛɛ kpɛ ya cho yɛ wa nya biuwɔŋndo? Huŋ a ndu naa ya chua.”+ 20 Okoŋ ma huŋ a poombɔɔ naa ndu chua. Kɛ mɛɛ nyina wɔɔŋndo che dɔɔ Chiisu, mbo chua poombɔɔ, okoŋ mbo del lɛŋ, mbo wa kɔlaŋ a pimbullo, mi hiiyo fula ndu o sondo. 21 Okoŋ mi Chiisu nyuna finya ndɔ aa: “Le vɛɛ kpɛ o viou yɛ niŋ a naa hoo?” Mbo muli aa: “Chɔŋ o chuaambɔyɛi nduɛi niŋ. 22 Teleŋnda bɔɔbɔɔ, mbo mal ndu o yiŋ, te koŋ te o mɛŋndaŋ niŋ le ndu diyɔɔ. Kɛ te a nɔla pɛ ma tosa nyɛ, mɛɛ yandii tuiinuŋ naa inyiɛɛ ma mala naa fɔ.” 23 Mi Chiisu dimul ndu aa: “Le yɛɛnɛ ŋ dimi yɛ aa, ‘Te a nɔla pɛ’? Nyɛ o nyɛ tiuba mbo yɔŋnuŋ le wana nɔ laalaŋndo wo.”+ 24 O lepilɛ niŋ kpe, mi finyaa poombɔɔ dimi choo choo aa: “I nɔ laalaŋndo! Mala ya mi laalaŋ nuu chɔɔlu kalu poŋ!”+

25 Mɛɛ Chiisu che maa faŋgaa wa nda deŋgelaŋndo choo, mbo tuau nyina wɔɔŋ koŋ aa: “Num nyina wɔɔŋ tosa hoo waŋndo tuii le, nduyɛ o suu le wo, mi dimul num, faŋaŋ poombɔɔ hoo kɔɔli, nduyɛ tual lɛ ndu kɔɔli kposoŋ te!”+ 26 Mɛɛ nyina wɔɔŋ koŋ mal yioo kpeleŋ, mbo chua vɛlɛ poombɔɔ, nduyɛ mbo yɔɔkpiaa ndu tau tau. Okoŋ, mbo faŋaŋ ndu kɔɔli. Mi poombɔɔ wou kpandeŋ. Le hei mi wanaa bɔɔbɔɔ wa dimioo aa: “O vi!” 27 Kɛ mi Chiisu saa ndu baa, mbo chua ndu, mbo sim. 28 Mɛɛ o luɛi chiɛiniŋ, mi buɛiyaa nduaa nyuna ndu nda kpeele aa: “Le yɛɛnɛ naŋ bumba yɛ nyina wɔɔŋ koŋ touwɔɔ?”+ 29 Mbo mulul nda aa: “Piɛileŋ kinɛi le nɔla nyina waa nuaa touwɔɔ ni.”

30 Mɛɛ nda faŋaŋ loŋ, ma keeku Kalili. Kɛ ndoo yeema mi wana o wana sina a ndi okɔɔ le. 31 Kanifuule, o wa buɛiyaa nduaa pɛɛkoo mbo wa nda dimullo aa: “A cho hunɔɔ Po wanachioo pisi waŋnda o ba, nduyɛ ma dii ndu.+ Kɛ o yɔŋ bɛɛ ma dii ndu, o cho miiŋgu yoomu o paale yaa ndɔleŋ choo.”+ 32 Kɛ a bii nyɛ o dimi wo bila le, nduyɛ siooŋnde wa nda le ndu nyunaa.

33 Ma huŋ Kepaaniɔm. Mɛɛ nda wa chiɛiniŋ, mbo nyuna nda aa: “O yɛɛnɛ choo nya wa yɛ diomndaŋ hiŋaŋndo o nɛi?”+ 34 Kɛ ma mei doŋ, kanifuule le wana cho wana bɛndoo nda tɛɛŋndo nda wa diomndaŋ hiŋaŋndo o nɛi ni. 35 Mbo chal, mbo veelu kiilaa nduaa 12 nda. Mbo dimul nda aa: “Wana o wana yeema pɛ mbo wa wana tasoo, o nɔ mbo wa wana mɛɛlaa kpɔŋ, nduyɛ mbo wa buɛiyo le nya kpou.”+ 36 Okoŋ mbo veelu poombɔ pɔmbɔɔ mbo simi ndu nda lachi. Mɛɛ o handu ndu balaŋ o choŋgu, mbo dimul nda aa: 37 “Wana o wana chɛl chuaambuaa pɔmbuaa waa nuaa+ le sabu nuu pɛ, mɛɛ ya o chɛl koŋ ni. Nduyɛ wana o wana chɛl la pɛ, o cho ko ya le o chɛl te, kɛ wana vem ya wo o chɛl vɛlɛ koŋ ni.”+

38 Mi Chɔŋ dimul ndu aa: “Wana Pɛɛkaa, miŋ cha waŋndo nyinaa wɔɔŋnda touwɔɔ o diola numndaŋ niŋ, kɛ miŋ kuuna ndu, kanifuule o cho naa choo le.”+ 39 Kɛ mi Chiisu dimi aa: “La kuuna ndu le, kanifuule wana o wana nalɔ mbo tosa walta kɔndɔfiltaŋ o diola nilaŋ niŋ, okoŋ mbo kandu bɛɛ sɔɔŋ wɔɔŋndoŋ dimioo a ya okɔɔ le. 40 Wana o wana simul naa le, mɛɛ le naa o cho ni.+ 41 Nduyɛ wana o wana ke nya pɛ mɛŋma kolaŋ o yɔŋ bɛɛ aa taalaa cha le mɛɛ nya cho le Kiliti yɛ,+ a tonya mi dimul nya, wana koŋ cho hunɔɔ fandaa sɔla.+ 42 Kɛ wana o wana tosa pɛ mi wanaa pɔmbuaa dɔu haa laalaŋndo o ya niŋnda o pilɛ bɛɛ mal laalaŋ ndɔɔ, o cho fisa ma baa ndu pou bɛndoo o labolo, ma kɔ mal ndu o mɛŋma ihɛllaŋ niŋ.+

43 “Te ba numndo wa pɛ tosaa le ma luɛi o hakioo niŋ, mɛɛ kiolu ndu kpali. O bɛnda ma huŋ sɔla yoomoo a baa o pilɛ, mbo hiau kɔlaŋ Kɛhɛna* a balaŋ la tiɔɔŋ, o yiŋnde nyum te leŋ niŋ.+ 44* —— 45 Nduyɛ te pelii numnde wa pɛ tosaa le ma luɛi o hakioo niŋ, mɛɛ kiolu ndi kpali. O bɛnda ma huŋ sɔla yoomoo a pelei i pilɛ, mbo hiau kɔlaŋ Kɛhɛna* a peloŋ ŋ muuŋ.+ 46* —— 47 Te hɔlte numndeŋ le wa pɛ tosaa le ma luɛi o hakioo niŋ, mɛɛ viou leŋ.+ O bɛnda ma huŋ luɛi o Masale Mɛlɛkaleŋ niŋ a hɔlteŋ le pilɛ, mbo hiau kɔlaŋ Kɛhɛna* a hɔltaŋ la tiɔɔŋ.+ 48 Loŋ ndu, dɛluaa vi le, nduyɛ yiŋndeŋ bɛɛ le nyum te.+

49 “A nɔ ma chuchu wana o wana fee yiŋndeŋ choo maa ihɛl.+ 50 Hɛlle naŋ. Kɛ te yeelaa fulaŋ pɛ o ndi niŋ, a yɛɛ wana miŋgi yɛ yeela koŋ?+ La nɔ hɛlle nya niŋ,+ nduyɛ mi la wa a kɔl nyulu vellaa velle.”+