Chɔŋ

18 Mɛɛ Chiisu chii sɔɔŋ muŋ dimi, mbo fula nda buɛiyaa nduaa, ma kɔ taŋ Kpoloŋndo Kidilɔŋ.+ Ma kua o fondaŋ kpeloo wa wo, mbo luɛi leniŋ nda buɛiyaa nduaa.+ 2 Chuda, o wa ndu pisi wo bɛɛ ndoo sina fondaŋ koŋ, kanifuule mi Chiisu ndoo kuɛ loŋ teleŋnda bɔɔbɔɔ nda buɛiyaa nduaa. 3 Mi Chuda huŋ a kunda puaa chɔuwa, a polisiiyaa wa le Falisiiya a masaa wanaa soliaa lasalaa wa. Ma huŋ a tɛŋgɛlaŋ, lambuiilaŋ, a nyɛm chɔuwoŋ o laba.+ 4 Chiisu ndoo sina sɔɔŋ wa ndu hunɔɔ yɔŋnɔŋndo woŋ kpou. Lelaŋ, mbo sɔɔŋguu nda ikɛi, mbo nyuna nda aa: “Nɛɛnɛ nya cho yɛ nuuviaa?” 5 Ma mulul ndu aa: “Chiisu fula Naasaluɛi yo.”+ Mbo dimul nda aa: “Ya cho Chiisu ni.” Chuda, o wa ndu pisi wo bɛɛ wa isisi nda ndaa.+

6 Mɛɛ o dimul nda aa, “Ya cho Chiisu ni,” ma miiŋgu amakɔɔ, ma deli lɛŋ.+ 7 Mbo nyuna nda vɛlɛ aa: “Nɛɛnɛ nya cho yɛ nuuviaa?” Ma muli aa: “Chiisu fula Naasaluɛi yo.” 8 Mbo dimi aa: “I dimul nya maa ya cho Chiisu ni. Lelaŋ te ya nya cho nuuviaa ni, mɛɛ la mal puaa haa a kɔŋnuŋ.” 9 Mi hei peelu nyɛ ndoo dimi wo aa: “Wanaa ŋ ke ya wa, o pilɛ bɛɛ luusiaŋ te.”+

10 Okoŋ mi Saimɔŋ Pitɛ naŋ muɛi wa ndu o ba ve yau, mbo lɔwa buɛi wana bɛndu wanaa soliaa lasalaa nile ba kɛndɛleŋ, mbo kialu leŋ kpali.+ Buɛi koŋ ndoo nɔ diolaŋ ni aa Makɔɔ. 11 Kɛ mi Chiisu dimul Pitɛ aa: “Miŋgi muɛi o boo ndɔɔ niŋ.+ Baa I nɔ mi kol o taala Finya nuu ke ya wo niŋ te?”+

12 Mi puaa chɔuwa, wana wa nda bolleŋ ndo, a polisiiyaa Chuuwa vem nda bii Chiisu ma yii ndu poŋ. 13 Ma kua a ndu fɛlɛŋ o Anaasi lo, lefoo Kayafaa. Kayafaa yɛ,+ ndu wa wana bɛndu wanaa soliaa lasalaa wɔsi koŋ ni.+ 14 Kayafaa koŋ ndoo sila Chuuwa ni maa o cho suɛi tɔnɔ le nda, le mi wana pilɛ vi le waŋnda.+

15 Mi Saimɔŋ Pitɛ a buɛi cheleŋ tual Chiisu kɔɔli.+ Wana bɛndu wanaa soliaa lasalaa ndoo sina buɛi koŋ. Mbo kua a Chiisu latulu o bɛɛ wana bɛndu wanaa soliaa lasalaa. 16 Kɛ Pitɛ wa isisi o dio. Okoŋ, mi buɛi wana bɛndu wanaa soliaa lasalaa sina hoo wo kua mbo kɔ soo o wana wa dioo mandaa wo lo, okoŋ mbo luei Pitɛ. 17 Mi buɛi laandu wa dioo mandaa wo nyuna Pitɛ aa: “Num bɛɛ buɛi poo hoo le ŋ cho le?” Mbo muli aa: “Ɛ ɛ, I cho buɛi ndɔ le.”+ 18 Wanaa ndaa manda chiɛi Mɛlɛkaa wa a buɛiya wa isisi o yiŋnde nda kiisuuleŋ ikɛi ma wa haŋgɔɔ, kanifuule hueiye wa. Pitɛ bɛɛ wa isisi loŋ nda ndaa mbo wa haŋgɔɔ.

19 Mi masa wanaa soliaa lasalaa nyuna Chiisu a buɛiyaa nduaa okɔɔ, vɛlɛ a pɛɛkula ndɔlaŋ. 20 Mi Chiisu mulul ndu aa: “Kpendekele ya wa suɛi o waŋnda lo ni. Teleŋ o teleŋ I wa waŋnda pɛɛkoo o chiɛila Chuuwa piɛi Mɛlɛka laŋ niŋ a o chiɛi Mɛlɛkaa niŋ,+ naa Chuuwa kpou ndaa chuuŋgiaŋ nda. I dimi nyɛ o nyɛ o vioŋnɔŋ niŋ te. 21 Le yɛɛnɛ ŋ cho yɛ ya nyunaa? Nyuna wanaa tuei nyɛ ya dimul nda wo wa. A sina nyɛ ya dimi wo.” 22 Mɛɛ Chiisu dimi lende, mi wanaa ndaa manda chiɛi Mɛlɛkaa wa o pilɛ, o wa isisi loŋ ndo luaa ndu kpaŋnde.+ Mbo nyuna ndu aa: “Lende ŋ nɔ ni ma mulul masa wanaa soliaa lasalaa?” 23 Mi Chiisu mulul ndu aa: “Te suɛi wɔɔŋnde ya dimi ni, mɛɛ chɔm ndɔ suɛi wɔɔŋii keŋ. Kɛ te tonyaa ya dimi ni, mɛɛ le yɛɛnɛ ŋ lɔɔ yɛ ya?” 24 Mi Anaasi yɔŋ ndu o yiyaa lende o Kayafaa lo, wana bɛndu wanaa soliaa lasalaa.+

25 Saimɔŋ Pitɛ wa isisi loŋ haŋgɔɔ. Ma nyuna ndu aa: “Num bɛɛ buɛi ndɔɔ le ŋ cho le?” Mbo viinuŋ aa: “Ɛ ɛ, I cho buɛi ndɔ le.”+ 26 Buɛi wana bɛndu wanaa soliaa lasalaa pum wa loŋ. Wanayɛi po Pitɛ kelu nileŋ ndo o wa ni.+ Mbo nyuna aa: “O cho num te ya che o kpeeloo niŋ nya ndaa le?” 27 Kɛ mi Pitɛ viinuŋ vɛlɛ. Okoŋ mi sɔɔ koowa o lepilɛ niŋ kpe.+

28 Idiiyo puŋ, ma faŋaŋ a Chiisu o Kayafaa lo, ma kua a ndu o chiɛi Paile wo, masa ibuŋgaa.+ Kɛ ndapila luei o chiɛi lemasaa niŋ te yɔŋii ndaa nɔɔliaŋ.+ Ndaa yeema ma de nyɛdiaa Bɔŋaŋ Hiouwɔɔ Choo Wo. 29 Okoŋ mi Paile fula mbo huŋ nyuna nda aa: “Suɛi wɔɔŋ kuɛɛ poo hoo tosa yɛ?” 30 Ma muli aa: “Te poo hoo ndoo ve wana dɛnɛ wɔɔŋ te, ŋ ve hunɔɔ a ndu o numndo le.” 31 Mi Paile dimul nda aa: “Nyapila kɔ a ndu mi la kɔ kɔɔsa ndu a mɛɛ sawa nyaa dimi yɛ.”+ Mi Chuuwa dimul ndu aa: “Ŋ nɔ di le miŋ dii wana o wana le.”+ 32 Mi hei peelu nyɛ Chiisu ndoo dimi le chɔmndo piɔm suu ndoo nɔ le sɔlaa wo.+

33 Okoŋ, mi Paile miiŋgu o chiɛi lemasaa niŋ, mbo veelu Chiisu mbo nyuna ndu aa: “Num cho Masa Chuuwa ni?”+ 34 Mi Chiisu mulul ndu aa: “Baa numpila kɛɛsiaa nyunaa hoo ni, ɔɔ dimullo nda dimul num a ya okɔɔ ni?” 35 Mi Paile muli aa: “I cho Chuunɔ le, lende le? Wanaa numnda a masaa wanaa soliaa lasalaa hiŋ a num naa ya chua ni. Yɛɛnɛ ŋ tosa yɛ?” 36 Mi Chiisu muli aa:+ “Masale nileŋ le cho masale waa chieeŋ nanuŋ te.+ Te lee wa pɛ masale waa chieeŋ nanuŋ, buɛiyaa niaa wa chɔulaba le ya. A ve chɛlɔɔ mi waŋnda ndaa mal la Chuuwa o ba le.+ Kɛ nduyɛ, Masale nileŋ le cho masale waa chieeŋ nanuŋ te.” 37 Mi Paile nyuna ndu aa: “Mɛɛ masaa ŋ cho ni?” Mi Chiisu muli aa: “Numpila chii dimi maa masaa ya cho ni.”+ Lelaŋ ya veluŋ ni, nduyɛ le saboo hoo ya hiŋ o chieeŋndo choo ni, le mi soo a tonyaa okɔɔ.+ Wana o wana wa pɛ le tonyaa, o cho ya nilaŋ yaŋɔɔ.” 38 Mi Paile nyuna ndu aa: “Yɛɛ cho yɛ tonyaa?”

Mɛɛ o nyuna ndu lende, mbo fula vɛlɛ o Chuuwa lo, mbo dimul nda aa: “I chi suɛi wɔɔŋ o tosa le.+ 39 La nɔ naamoo maa o Bɔŋaŋ Hiouwɔɔ Choo kɛ kɛ choo, I nɔ mi solul nya waŋndo o chiɛi manyumndo niŋ.+ Vɛ, la yeema mi mel nya Masa Chuuwa?” 40 Ma deŋi vɛlɛ choo choo aa: “Mal poo hoo le, mal Baluabaa!” Baluabaa yɛ, viinɔɔ o wa ni.+