Maki

14 Ndoo lo niŋ palɛi i ŋiiŋ+ le mi Bɔŋaŋ Hiouwɔɔ Choo Wo,+ a Bɔŋaŋ Beedii* Nɔ Yiisii* Leniŋ te Wo+ ndoo fuuluu. Masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda wa nɛilaŋ nuuviaa le Chiisu biyɔɔ o nɛi chaa niŋ, okoŋ ma dii ndu.+ 2 A wa dimioo aa: “Ŋ tosaŋ ndi a teleŋ bɔŋaŋndo le, yɔŋii waŋnda mal sɔŋgɔɔ.”

3 Mɛɛ o wa nyɛdiaa dioo* Bɛtani o chiɛi Saimɔŋ ndo niŋ, o ndoo nɔ lɛlɔŋ ndo, mi chua pilɛ huŋ a chuɛima chuŋ kɛndiaŋ o sani alabasita wo niŋ diolaŋ aa naadi. Baa pila maa nɔ ni. Mbo kumbi sanioo, mbo tala maŋ Chiisu o lebol.+ 4 Mɛɛ nda che hei, mi suɛi nɛi apum ma dimi aa: “Le yɛɛnɛ o tɛɛmbuu yɛ chuɛima chuŋ kɛndiaŋ maŋ? 5 Chuɛiyaŋ maŋ maa pisiŋ le dinaluɛiyoŋ hiouwɔɔ 300,* okoŋ mi wana ndoo ke wanaa bala fonduaa kanii* keŋ!” Ma tambu kɔllo tau le nyɛ chuaa hoo tosa wo. 6 Kɛ mi Chiisu dimi aa: “La mal chuaa hoo. Le yɛɛnɛ nya cho yɛ ndu pɛɛsaa? Suɛi kɛndɛi pila o tosal la ni.+ 7 Wanaa bala fonduaa cho nya tɛɛŋ lɔɔlɔɔ,+ nduyɛ teleŋ o teleŋ nya yeema pɛ, la tiuba mi la tosal nda kɛndɛi. Kɛ ya, I ve niŋ a nya lɔɔlɔɔ le.+ 8 Nyɛ o tiuba le tosaa wo o tosa ni. Chuɛima o tala ya maŋ lekɔɔ waŋ, o tosa ndi le mbo bɛɛndiaa pɔɔ dialuŋ nuŋ le kumbɔɔ nda cho ya hunɔɔ wo.+ 9 A tonya mi dimul nya, ba o ba fee yooŋgu kɛndɔɔ dimiŋ pɛ o chieeŋndo niŋ,+ waŋnda cho vɛlɛ dimi a nyɛ chuaa hoo tosa wo okɔɔ le loonɔŋndo a ndu.”+

10 Okoŋ kɔɔli, mi Chuda Isikaliɔɔ, wana pilɛ o kiilaa nduaa 12 nda tɛɛŋ kua o masaa wanaa soliaa lasalaa lo le mbo pisi ndu nda o ba.+ 11 Mɛɛ nda tuei hei, ma naŋ kɔl tau, nduyɛ ma dimi le ma ke ndu kaniŋ humboŋ.+ Le hei, mbo kandu nɛilaŋ nuuviaa le Chiisu pisioo.

12 Mɛɛ paale tasele nda toosiaa Beedii Nɔ Yiisii Leniŋ te Wo+ le fuuluu, mi buɛiyaa nduaa nyuna ndu aa: “Kuɛɛnɛ ŋ yeema yɛ miŋ kɔ bɛɛndiaa le ma kɔ dio nyɛdiaa Bɔŋaŋ Hiouwɔɔ Choo Wo?”+ O paaleŋ ndeŋ choo ndaa dii saa le Bɔŋaŋ Hiouwɔɔ Choo Wo ni.+ 13 Okoŋ mbo viam buɛiyaa nduaa a ŋiɔɔŋ, mbo dimul nda aa: “La kɔ chiee. La cho bɔŋaŋ a po pilɛ a kpɛɛnɛi mamɛŋnde. La tol ndu kɔɔli.+ 14 Chiɛi o chiɛi o luɛi pɛ, la luɛi ndu kɔɔli mi la dimul wana chiɛiyo aa, ‘Wana Pɛɛkaa dimi aa: “Kuɛɛnɛ fondaŋ mialla cho yɛ le mi de nyɛdiaa Bɔŋaŋ Hiouwɔɔ Choo Wo naa buɛiyaa niaa?”’ 15 O cho nya chɔm fondaŋ fɛkɛi kɛndɛ kɛndɔɔ le mialla. La bɛɛndiaa nyɛdiaa loŋ le naa.” 16 Mi buɛiyaa nduaa kua. Mɛɛ nda fuuluu chiee, mi i yɔŋnuŋ mɛɛ o dimul nda yɛ, okoŋ ma bɛɛndiaa nyɛdiaa le Bɔŋaŋ Hiouwɔɔ Choo Wo.

17 Mɛɛ nyumndaŋ ma tol, mi Chiisu huŋ a kiilaa 12 nda.+ 18 Mɛɛ nda chal o tibiiyo* ma wa nyɛdiaa dioo, mi Chiisu dimi aa: “A tonya mi dimul nya, wana pilɛ o nya tɛɛŋ, o naŋ cho nyɛdiaa dioo latulu wo cho ya hunɔɔ pisi.”+ 19 Ma kandu mɔnɛi biyɔɔ, okoŋ ma wa ndu nyunaa a pilɛŋ pilɛŋnda aa: “O cho ya le, lende le?” 20 Mbo dimul nda aa: “Wana pilɛ o nya ŋwaŋ 12 nda haa tɛɛŋ, o cho baa wouwo o hɛŋgɛiyo niŋ a ya latulu wo.+ 21 Po wanachioo nɔ le piɔmndo sɔlaa a mɛɛ i cho i poonyiaa a ndu okɔɔ yɛ. Kɛ, kpundɔɔ cho le wana pisi niŋ Po wanachioo wo!+ Ndoo bɛnda bɛɛ pɛŋ mi wana koŋ ndoo veluŋ kposoŋ te.”+

22 Mɛɛ nda wa nyɛdiaa dioo, mbo chua beediiyo, mbo piɛi, mbo yimi yimi. Okoŋ mbo ke nda. Mbo dimi aa: “La bii. Hoo sim le dialuŋ nuŋ ni.”+ 23 Mbo chua vɛlɛ taalaa a muɛiyaŋ leniŋ, mbo piɛi, mbo ke nda. Mi nda kpou kol.+ 24 Mbo dimul nda aa: “Maŋ ma sim le ‘kooma niaŋ ni.+ A maŋ Mɛlɛka yii kpemaa a ŋwaŋnda chiee ni.’+ Maŋ ma cho talaŋ ni le wanaa faŋga faŋga.+ 25 A tonya mi dimul nya, I cho lɛ muɛima kolɔɔ le haaa mi paale ya cho muɛima sɛnɛiyaŋ kolɔɔ o Masale Mɛlɛkaleŋ niŋndeŋ le fuuluu.” 26 O mɛɛlulaŋ, mɛɛ nda chii chondoŋ soli, ma kua o Pembii Ɔlifii Ve.+

27 Mi Chiisu dimul nda aa: “Nya kpou cho ya malɔɔ, kanifuule i cho i poonyiaa aa: ‘I cho wana mandaa lasaa diyɔɔ,+ okoŋ mi saa kpou a saŋnuŋ.’+ 28 Kɛ te I miiŋgu yoomu pɛ, I cho pɔɔ nya lakɔ lachi Kalili.”+ 29 Mi Pitɛ dimul ndu aa: “O yɔŋ bɛɛ mi a tuaa kpou mal num, ya I mel num te.”+ 30 Mi Chiisu dimul ndu aa: “A tonya mi dimul num, tuupa mi sɔɔ koowa le diiŋ chuɛllɛŋ, a cho viinɔŋ bɛmbɔɔ le yaa maa a sina ya le.”+ 31 Kɛ mbo lambaŋ dimioo aa: “Ŋ wu mawuaa naa num, kɛ I viinuŋ maa I sina num te le.” Mi a tuaa kpou bɛɛ dimi lende.+

32 Okoŋ kɔɔli, ma huŋ o fondaŋ pum diolaŋ aa Kɛsɛmani. Mbo dimul buɛiyaa nduaa aa: “La chal nanuŋ mi kɔ piɛi.”+ 33 Okoŋ mbo chua Pitɛ, Chemisi, a Chɔŋ ma kua latulu.+ Mi mɔnɛi kandu ndu biyɔɔ, nduyɛ mbo tambu kɔl tau. 34 Mbo dimul nda aa: “Mɔnɛi cho o kɔl nuu niŋnde,+ i lo ko mi i dii ya. La lo pɔɔ nanuŋ, nduyɛ mi la wa lahɔl.”+ 35 Mɛɛ o chɔɔlu lakɔ tiŋ lachi, mbo hini lɛŋ. Mbo kandu piɛileŋ maa, te o bɛnda pɛ, mɛɛ boondei hei i hiou ndu choo. 36 Mbo dimi aa: “Aba,* Finya nuu,+ a nɔla ma tosa nyɛ o nyɛ. Faŋa ya taalaa hoo kuee. O cho hɛnaŋ nuu le ŋ tosa le, kɛ hɛnaŋ numndo.”+ 37 Mɛɛ o miiŋgu, mbo komal nda o luaŋ. Mbo nyuna Pitɛ aa: “Saimɔŋ, yee luaŋ ŋ cho ni? Mɛɛ a nɔla ma wa lahɔl le hawɛiyo* o pilɛ bɛɛ le?+ 38 La wa lahɔl, mi la hiou lachi a piɛileŋ, yɔŋii nya del o tɔɔndaŋndo niŋ.+ A tonya, yeemɛi cho nya le ndi tosaa, kɛ dialloŋ nya ŋ vilɛi pɛ.”+ 39 Mbo kua vɛlɛ mbo piɛi a diomnda pilɛ la laŋ kpe.+ 40 Mɛɛ o miiŋgu, mbo komal nda vɛlɛ o luaŋ. Ma wa nda o hɔl yiŋgi yiŋgi. Le hei, ndaa sina nyɛ ndaa dimul ndu wo le. 41 Mbo miiŋgu vɛlɛ miiŋgu yaa ndɔɔ, mbo dimul nda aa: “A boondii waa nuaa nya choŋnuŋ lɔma nya ni, mi la wa pɛŋgioo? La tiondu niŋ! Boondei fuuluu!+ La nuawɔ! A pisi Po wanachioo wanaa yɔŋ wɔɔŋnda o ba. 42 La chɔŋ ŋ kɔŋnuŋ. Mi che wana cho ya pisioo wo hunɔɔ.”+

43 O lepilɛ niŋ kpe, Chiisu lo suɛi, mi Chuda, wana pilɛ o kiilaa 12 nda tɛɛŋ huŋ a faŋga bɛndoo ndu kɔɔli. Mɔɔŋ a yɔmii biŋgiei wa nda o laba. Masaa wanaa soliaa lasalaa, wanaa pɛɛku waŋnda sawala Mɛlɛkalaŋ nda, a laŋgbaa kalla vem nda ni.+ 44 Mi wana wa ndu pisioo wo chɔm nda tamasioo aa: “Te ŋ kuɛ pɛ, wana ya cho kuuwo sɔsa wo, mɛɛ ndu ni. La bii ndu, mi la kuɛ a ndu. La mal ndu yɔndi le.” 45 Mɛɛ Chuda hiŋ, mbo kua sakpo naa Chiisu chua. Mbo dimi aa: “Isɛ, Luabai!” Mbo sɔsa ndu kuuwo. 46 Okoŋ ma bii Chiisu ma kua a ndu. 47 Kɛ mi wanaa wa isisi loŋ nda o pilɛ naŋ muɛi nduɛi yau, mbo lɔwa nile buɛi wana bɛndu wanaa soliaa lasalaa, mbo kialu leŋ kpali.+ 48 Mi Chiisu nyuna nda aa: “La vɛ hunɔɔ a mɔɔŋ a yɔmii biŋgiei le ya biyɔɔ, mɛɛ nda yɔŋ ko aa viinɔɔ ya cho ni?+ 49 Lepaa o lepaa, I wa a nya latulu o chiɛi Mɛlɛkaa niŋ waŋnda pɛɛkoo,+ la bii ya teleŋ koŋ te. Kɛ hei yɔŋnuŋ le mi nyɛ Yau Mɛlɛkaa dimi wo peeluŋ.”+

50 Okoŋ, mi nda kpou mal ndu ma nyaanuŋ.+ 51 Kɛ mi chua piaandu pilɛ kandu Chiisu tolɔɔ kɔɔli. Nduyɛ doma humbu kɛndɛ kɛndɔɔ koni wa ndu o sayiaŋ lekɔɔ ni. Mɛɛ nda hiŋ le ndu biyɔɔ, 52 mbo hialuŋ nda, mbo mɛi nda doma ndɔɔ o ba. Mbo nyaanuŋ kɔɔle fondo.*

53 Ma kua a Chiisu o wana bɛndu wanaa soliaa lasalaa lo.+ Mi masaa wanaa soliaa lasalaa, laŋgbaa kalla, a wanaa pɛɛku waŋnda sawala Mɛlɛkalaŋ nda kpou chuuŋgiaŋ.+ 54 Mi Pitɛ tual ndu kɔɔli, kɛ o wa tiŋ landaŋ. A lo kɔlaŋ lende haaa ma fuuluu o bɛɛ wana bɛndu wanaa soliaa lasalaa. Mbo chal haŋgɔɔ o yiŋndeŋ ikɛi nda wanaa wa chiɛi masaa hɔlteŋ nda.+ 55 Masaa wanaa soliaa lasalaa, a Laŋgbaa Kalaa Kialu Yamaŋ Nda kpou wa nɛilaŋ nuuviaa le Chiisu choolaŋ nyiinduuwo choo, le halikpeŋ ma dii ndu. Kɛ a seeluŋ nyɛ o nyɛ le.+ 56 Wanaa bɔɔbɔɔ wa seile lakafaleŋ timbioo a ndu okɔɔ,+ kɛ seile ndaleŋ le ve nyɛ pilɛ le. 57 Mi waŋnda apum chaŋ ma tɛndal ndu seile lakafaleŋ, ma dimi aa: 58 “Miŋ tuɛi ndu dimioo aa, ‘I cho chiɛi Mɛlɛka nda taŋgul hoo a laba wo piɔlɔɔ, mi miŋgi o cheleŋ taŋgul o palɛi i yaa bɛŋgu, o ve a laba le.’”+ 59 Kɛ o hei niŋ bɛɛ, seile ndaleŋ le ve nyɛ pilɛ le.

60 Okoŋ, mi wana bɛndu wanaa soliaa lasalaa sim mbo nyuna Chiisu aa: “A nɔ nyɛ o nyɛ le dimi le? Mɛɛ a cho tueiyɔɔ nyɛ nda cho hoo dimioo a num okɔɔ wo le?”+ 61 Kɛ mi Chiisu meinuŋ kpili.+ Mi wana bɛndu wanaa soliaa lasalaa nyuna ndu vɛlɛ aa: “Num cho Kiliti, Po Mɛlɛka naŋ saŋgala wo ni?” 62 Mi Chiisu mulul ndu aa: “Ei. Nduyɛ, la cho chɔ Po wanachioo+ ichali o ba kɛndɛ+ Mɛlɛka kpaaya bɛndoo choo, nduyɛ mbo wa hunɔɔ o yumbu yumboo niŋ choo choo.”+ 63 Okoŋ mi wana bɛndu wanaa soliaa lasalaa sɛɛsiaŋ domaa lekɔɔ, mbo dimi aa: “Seiyaa maavɛɛ naŋ yeema yɛ vɛlɛ?+ 64 Nyapila chii tueiyɔɔ mɛɛ o tɛɛmbuu diola Mɛlɛkalaŋ yɛ. Vɛɛ nya yiyaŋ yɛ?” Mi nda kpou dimi maa o nɔ mbo sɔla piɔmndo.+ 65 Mi apum kandu ndu lɔluaŋ tufɔɔ choo.+ Ma kumbu ndu hɔlla. Ma kuindi kuindi ndu a bɔtalaŋ, ma dimi aa: “Dimullɔ naa! Nɛɛnɛ lɔɔ yɛ num?” Mɛɛ nda lɔɔ ndu hɔlaa leniŋnda, mi wanaa wa chiɛi lemasaa mandaa wa kua a ndu.+

66 Mɛɛ Pitɛ wa o bɛɛ masaa amatou, mi buɛi laandu wana bɛndu wanaa soliaa lasalaa o pilɛ huŋ naa ndu chua.+ 67 Mɛɛ o che ndu haŋgɔɔ, mbo tofa ndu chiŋ, mbo dimi aa: “Num bɛɛ a wa Chiisu fula hoo Naasaluɛi yo kɔɔli.” 68 Kɛ mbo viinuŋ aa: “I sina ndu le. I sina pɛŋ nyɛ ŋ cho hoo dimioo wo le.” Okoŋ mbo kua kpeŋgii dio bɛndoo. 69 Mi buɛi laandoo hoo cha ndu vɛlɛ, mbo dimul wanaa wa isisi loŋ nda aa: “Poo hoo bɛɛ wa ndu kɔɔli.” 70 Mi Pitɛ viinuŋ vɛlɛ. Mɛɛ teleŋndo hiou tiŋ, mi wanaa wa isisi loŋ nda dimul vɛlɛ ndu aa: “Tonya kpeekpei, num bɛɛ wa poo hoo balɔɔ kɔɔli, kanifuule wana waa Kalili ŋ cho ni.” 71 Kɛ mbo mɛnaŋ po, mbo dimi aa: “Pesiŋ bɛɛ I sina po nya cho hoo suɛi a ndu okɔɔ wo le!” 72 O lepilɛ niŋ kpe, mi sɔɔ koowa vɛlɛ koowa diiŋ ndɔɔ.+ Okoŋ, mi Pitɛ loonuŋ nyɛ Chiisu dimul ndu wo aa: “Tuupa mi sɔɔ koowa le diiŋ, a cho viinɔŋ bɛmbɔɔ le yaa maa a sina ya le.”+ Okoŋ mi Pitɛ tambu kɔl, mbo kandu chaŋndo.