Chɔŋ
21 Okoŋ kɔɔli, mi Chiisu fula vɛlɛ buɛiyaa nduaa o hɔl o Mɛŋma Ibuŋgaŋ Tabiliaa. Mɛɛ o fula nda o hɔl lɛ cho hoo ni. 2 Saimɔŋ Pitɛ, Tɔmɔsi (o ndaa veelu aa Pɛnduaa wo),+ Nataaniɛɛ,+ o ndoo fula Kena o Kalili niŋndo, puaa Sɛbidi wa,+ a buɛiyaa nduaa cheleŋ a ŋiɔɔŋ wa naapilɛ. 3 Mi Saimɔŋ Pitɛ dimul nda aa: “I kua wɔ yɔɔyaa.” Ma dimul ndu aa: “Ŋ kɔŋnuŋ latulu.” Ma fula o bɛɛ, ma kɔ luɛi o dɛndɔɔ niŋ. Ma lɔl yɔɔyaa pii pii, kɛ a bii nyɛ o nyɛ le.+
4 Mɛɛ paaleŋ le wa siɔɔ, mi Chiisu sim o pioo kɔŋgɔ, kɛ buɛiyaa nduaa sina ndu le.+ 5 Mi Chiisu nyuna nda aa: “Chuauwaa niaa, la sɔla pa nyɛ le dioo?” Ma muli aa: “Ɛ ɛ!” 6 Mbo dimul nda aa: “La wuuwɔ yalaa o ba kɛndɔɔ choo, la cho suuwa biyɔɔ.” Okoŋ ma wuu yalaa. Kɛ ma bumba ndu nanɔɔ o dɛndɔɔ niŋ, kanifuule suuwa wa leniŋ tau.+ 7 Mi buɛi Chiisu kaala tau wo+ dimul Pitɛ aa: “Masanɔɔ ni!” Mɛɛ Saimɔŋ Pitɛ tuei hei, mbo wounuŋ doma ndɔ lechoo wo, kanifuule nyɛla ve ndu lekɔɔ le. Okoŋ mbo del o peelo. 8 Kɛ buɛiya apiliaa wa hunɔɔ o dɛndɛ pɔmbɔɔ niŋ a suuwa nanɔɔ, kanifuule a ve levil a kɔŋgɔɔ le. Tiŋndo ndoo wa le nɛiyo 300.
9 Mɛɛ nda fuuluu o kɔŋgɔ, ma cha suuwa o dɛŋgultaŋ choo a beediiyo* o kɛsiaa. 10 Mi Chiisu dimul nda aa: “La huŋ a suwaa nya laŋga bii ya a tiŋ.” 11 Okoŋ mi Saimɔŋ Pitɛ luɛi o dɛndɔɔ niŋ mbo naŋ yalaa o kɔŋgɔ a suwaa bɛnduaa a piaa leniŋ cha. A wa 153. Mi che bɛɛ suuwa wa tau tau, kɛ yalaa kiolu le. 12 Mi Chiisu dimul nda aa: “La huŋ dio nyɛdiaa.” Wana pilɛ bɛɛ bii kɔllo mbo nyuna Chiisu wana o cho wo le, kanifuule ndaa sina maa Masanɔɔ ni. 13 Mi Chiisu chua beediiyo mbo ke nda. Nduyɛ, mbo ke nda vɛlɛ suuwa. 14 Chɔŋ a teleŋ Chiisu miiŋgu yoomu wo, bɛmbɔɔ yaa ndɔɔ wa hoo ni+ le buɛiyaa nduaa fulaa o hɔl.
15 Mɛɛ nda chii nyɛdiaa dio, mi Chiisu nyuna Saimɔŋ Pitɛ aa: “Saimɔŋ, po Chɔŋ ndo, a kaala ya mbo hiau haa?” Mi Pitɛ muli aa: “Ei, Masanɔɔ. A sina maa I kaala num.” Mbo dimul ndu aa: “Mɛɛ ke saa niaa nyɛdiaa.”+ 16 Mbo nyuna ndu vɛlɛ aa: “Saimɔŋ, po Chɔŋ ndo, a kaala ya?” Mbo muli aa: “Ei, Masanɔɔ. A sina maa I kaala num.” Mbo dimul ndu aa: “Mɛɛ manda saa niaa pɔmbuaa.”+ 17 Okoŋ kɔɔli, mi Chiisu nyuna ndu vɛlɛ aa: “Saimɔŋ, po Chɔŋ ndo, a kaala ya?” Mi Pitɛ tambu kɔl mɛɛ Chiisu nyuna ndu bɛmbɛ yaa ndɔɔ aa: “A kaala ya?” Mbo dimul ndu aa: “Masanɔɔ, a sina nyɛ o nyɛ fee. A sina maa I kaala num.” Mi Chiisu dimul ndu aa: “Mɛɛ ke saa niaa pɔmbuaa nyɛdiaa.”+ 18 A tonya mi dimul num, teleŋ ŋ wa chua piaandu wo, mi num oo doviŋ ma kuɛŋnuŋ kelaa ba o ba ŋ yeema pɛ. Kɛ te a yuuwa pɛ, a cho balaŋ siɛndi, mi wana cheleŋndo wou num nyɛlaŋ. Okoŋ, mbo kuɛ a num o fondaŋ ŋ yeema le wo.” 19 Le chɔmndo piɔm suu Pitɛ ndoo nɔ le sɔlaa mbo saŋgala Mɛlɛka wo o dimi hei ni. Mɛɛ o chii hei dimi, mbo dimul Pitɛ aa: “Hiou lachi a ya tolɔɔ kɔɔli.”+
20 Mɛɛ Pitɛ muliŋ, mbo cha buɛi Chiisu ndoo kaala tau wo+ nda tolɔɔ kɔɔli. Teleŋ nda wa nyɛdiaa ichɔllo dioo wo, buɛi koŋ ndoo yɛŋgbaŋ Chiisu o ibuŋ ni mbo nyuna ndu aa: “Masanɔɔ, nɛɛnɛ cho yɛ num pisi?” 21 Mɛɛ Pitɛ che ndu, mbo nyuna Chiisu aa: “Masanɔɔ, yɛɛ cho yɛ yɔŋnɔŋ a laŋunɔɔ hoo?” 22 Mi Chiisu nyuna Pitɛ aa: “Te I yeema pɛ mbo lo yoomu haaa mi hiŋ, ɔɔ buulaŋ numndo o keŋ niŋ? Num hiou lachi a ya tolɔɔ kɔɔli suee.” 23 Mi suɛi hei tiu puaapiliaa tɛɛŋ silɔ maa buɛiyo hoo ndu cho wu le. Chiisu dimul ndu nuaa maa o cho wu le le. Kɛ nuaa o dimi ni aa: “Te I yeema pɛ mbo lo yoomu haaa mi hiŋ, ɔɔ buulaŋ numndo o keŋ niŋ?”
24 Buɛi koŋ+ soo a sɔɔŋ muŋ okɔɔ ni. Ndu ko poonyiaa muŋ ni. Nduyɛ ŋ sina maa nyɛ o dimi wo cho tonya.
25 Mi Chiisu tosa vɛlɛ sɔɔŋ cheleŋ tau. Nduyɛ te ndaa poonyiaa pɛ a muŋ okɔɔ kpou, I che maa yaula laŋ la ve sulɔɔ o chieeŋndo niŋ te.+