Pitɛ Tasoo
5 Lelaŋ, ya chaaŋ nya bɛndoo, ya cho bɛnduaa cho nya tɛɛŋ nda silaa hoo kioo ni. Boondii nda wa Kiliti nyɛpalaa tusioo choo ve, I wa o hɔlndɔ. Nduyɛ ya bɛɛ, I cho hunɔɔ biiloo sɔla latulu a wanaa Mɛlɛka hɛli wa.+ 2 Nya cho chilaŋ chuaa wa, la manda saa Mɛlɛka+ ke nya le mandaa wa. La tosa ndi a kɔllo kpou mɛɛ Mɛlɛka hɛnaŋ yɛ,+ kɛ o wa maa baŋɔɔ le nda baŋ nya le. La nɔ yeemɛi le wallo tosaa, kɛ o wa le mi la sɔla nda nyɛ o ba o kafalaŋ choo le.+ 3 La wa wanaa Mɛlɛkaa choo maa ŋmasa le,+ kɛ la wa maa tamasi le nda.+ 4 Okoŋ, boondii wana mandaa lasaa bɛndoo+ cho chɔɔmɔŋ nde, la cho fanda* tembu le wo sɔla.+
5 Lende koni, nya puaa feleŋguaa bɛɛ, la nɔ mi la tusiŋ kaasoŋnda* o ba bɛŋgu.+ Kɛ nya kpou, la biinaŋ vellaa velle a tusiŋndo.* Kanifuule, Mɛlɛka tul yoŋgaa leyɛ. Kɛ wanaa tusiŋ nda o tosal kɛndɛi nduɛi bɛnduei ni.+
6 Lelaŋ, la tusiŋ Mɛlɛka kpaaya bɛndoo o ba bɛŋgu, okoŋ o nɔla mbo heelu nya a teleŋ bɛnda wo.+ 7 La nyindul ndu buulaŋnda nyalaŋ kpou,+ kanifuule o buulaŋ le nya.+ 8 La wa wanaa taasi, nduyɛ mi la wa lahɔl!+ Kanifuule, Setana* cho yaamɔɔnɔ nyaa wo cho balɔɔ a pɛɛliaa maa kpɔkuŋ.* O cho nuuviaa le wana o saaluŋ mbo de wo.+ 9 Kɛ la simul ndu,+ nduyɛ mi la wa a kala poŋ o laalaŋndo choo. La sina pɛŋgu maa puaapiliaa nyaa chieeŋndo balɔɔ silɔ bɛɛ, nyɛpalaa suu pilɔɔ kpe cho nda komallo ni.+ 10 Te nyɛpalaa keeku nya choo pɛ le teleŋ biŋgi, Mɛlɛka nɔ kɛndɛi bɛnduei, nduyɛ mbo veelu nya le mi la huŋ wa o biilu ndɔ cho le fɛɛŋ a fɛɛŋ ndo niŋ+ a Kiliti latulu wo, ndupila cho nya siou pɛɛku. O cho tosa mi la sim yi,+ mbo luei nya yoomuaŋ,+ nduyɛ mbo tosa la hiiluŋ te. 11 Ndu nɔ kpaayaa le fɛɛŋ a fɛɛŋ ni. Amiina.*
12 Sivanɔɔ,*+ o ya chua maa puaapilɛnɔ ni wo, ndu mala ya yau pɔmbɔɔ hoo poonyiaa ni. I poonyiaa ndu le nya kɔllo dɛɛniaa, a nya chɔmndo maa kɛndɛi bɛnduii Mɛlɛka tosal nya ve, tonya kpeekpei i cho ni. La saa ndi kpiŋ. 13 Kunda cho o Babilɔŋ niŋ, mbo sɔla hɛlioo maa nya wo yil nya lapi. Maki+ po ni bɛɛ yil nya. 14 La yilaŋ vellaa velle o kaalaa niŋ.
Maa nya cho o diompilɔɔ niŋ a Kiliti wa kpou wa o kɔl nyulu niŋ fɔ!