Kɔliŋtiaŋ Tasoo
3 Puaapiliaa, I suu o nya lo maa wanaa cho a kala o Mɛlɛka piɛiyo niŋnda le,+ kɛ maa wanaa nɔ yiyaŋ iwana chieeyaa wa, maa chɛlɛkpiaa+ o Kiliti niŋ. 2 I ke nya nyɛdiaa sikpa le, kɛ mi ke nya milikiiyaŋ,* kanifuule nyaa kindu ŋdial tau le. Nduyɛ la kindu wɔ bɛɛ ŋdial tau le,+ 3 kanifuule yiyaŋ iwana chieeyaa nya nɔ ni.+ Paŋaliaŋndaŋ a nɛiyɔŋndaŋ la cho nya tɛɛŋ. La cho wɔ yiyaŋ iwana chieeyaa tolɔɔ kɔɔli,+ nduyɛ mi la wa sɔɔŋ tosaa maa waŋnda o chieeŋndo niŋ. 4 Te wana pilɛ dimi pɛ aa, “Ya le Pɔɔl ya cho ni,” mi wana cheleŋ ndu dimi aa, “Ya le Apɔlɔɔ ya cho ni,”+ mɛɛ o cho kaa waŋnda o chieeŋndo niŋ te nya nɔ koŋ te?
5 Wana maavɛɛ Apɔlɔɔ cho yɛ? Wana maavɛɛ Pɔɔl cho yɛ? Wanaa cho wali Masanɔɔ ke naa wo tosaa wa naŋ cho ni.+ Malaa kinɛi naŋ mala nya ni mi la simnuŋ wanaa laalaŋnda. 6 Ya tɔl ni,+ mi Apɔlɔɔ ndu pɔɔliaa,+ kɛ Mɛlɛka tosa ni mbo hindu. 7 Lelaŋ, o cho wana tɔl lo ɔɔ wana pɔɔliaa wo le sɔla saŋgalaa le, kɛ wana tosa mbo hindu wo, Mɛlɛka.+ 8 Wana tɔl lo nda wana pɔɔliaa wo, nyɛ pilɛ kpe nda cho ni, nduyɛ o kɛ kɛ cho hunɔɔ fandaa sɔla le wali o tosa wo.+ 9 Kanifuule, wanaa walla naŋ cho latulu a Mɛlɛka ni. Nya cho chiɛi Mɛlɛka cho tosaa ve ni, taŋgul Mɛlɛkaa.+
10 A mɛɛ Mɛlɛka tosal la kɛndɛi nduɛi bɛnduei yɛ, mi kila chiiye+ maa wana chaa taŋgullo wo, kɛ mi wana cheleŋ wa taŋgullo o ndi choo. Lelaŋ, wana o wana wa yekeŋ a mɛɛ o cho taŋgullo o ndi choo yɛ. 11 Kanifuule wana o wana nɔ mbo kila chiyii cheleŋ o chiyii kilaŋnde kɔɔli le, ndi cho yɛ Chiisu Kiliti ni.+ 12 O chiyii kilaŋ hei ve choo, mi waŋnda apum taŋgul lechoo a kooliiyoŋ, kaniŋ humboŋ, ɔɔ pouta baa kalalaŋ. Apum yɛ, ma taŋgul lechoo a yɔmnde, puiyo, ɔɔ sɔlɔŋndo. 13 Kɛ teleŋ cho fuuluu mi wali wana o wana chɔmnuŋ kpendekele, kanifuule paale wa niŋ mbo sɔla tofaa a yiŋndeŋ,+ okoŋ mi yiŋndeŋ le chɔm mɛɛ wali wana o wana tosa wo cho yɛ. 14 Nduyɛ wana yiŋndeŋ le nɔla wali ndɔɔ tɛɛmbuu o chiyii kilaŋnde choo le, wana koŋ cho fandaa sɔla. 15 Wana yiŋndeŋ le tɛɛmbuu pɛ wali ndɔɔ, mɛɛ o del fɔ, kɛ ndupila cho pioŋɔɔ sɔla. O cho wa mɛɛ waŋndo sɔla nuaa chindaa o yiŋndeŋ niŋ yɛ.
16 La sina nuaa maa chiɛi Mɛlɛkaa le nya cho le,+ nduyɛ maa nyina Mɛlɛkaa cho nya tɛɛŋ te?+ 17 Wana o wana tɛɛmbuu pɛ chiɛi Mɛlɛkaa, Mɛlɛka cho wana koŋ tɛɛmbuu, kanifuule o diandaa chiɛi Mɛlɛkaa cho ni, nduyɛ nya cho chiɛi koŋ ni.+
18 Wana o wana hui ndupila le. Te wana wa nya tɛɛŋ pɛ mbo yiyaŋ maa o cho wana kɔl kalu o chieeŋndo hoo niŋ, mɛɛ o simnuŋ diɔmndo le mbo sɔla kɔl kalu kpeekpeiyo. 19 Kanifuule, diɔmnde taasi chieeŋndo hoo cho Mɛlɛka o hɔl ni. A mɛɛ i cho i poonyiaa yɛ aa: “Mɛlɛka tosa mi wanaa taasiaa del o yaŋɔɔla ndala kaŋgalaa laŋ niŋ.”+ 20 I cho vɛlɛ i poonyiaa aa: “Chɛhowa* sina maa nyɛ fondoo fuu yiyaŋnda wanaa kɔl kaluaa cho ni.”+ 21 Lelaŋ, wana o wana kialu yoŋgaa a wanachioo le, kanifuule Mɛlɛka ke nya nyɛ o nyɛ ni. 22 O wa ya Pɔɔl, Apɔlɔɔ, Sifaasi,*+ chieeŋndo, yoomoo, piɔmndo, nyɛm cho suŋ suŋndoŋ, ɔɔ nyɛm cho hunɔɔ woŋ ni, le nya nyɛ o nyɛ cho ni. 23 Nduyɛ le Kiliti nya cho ni,+ mi Kiliti ndu wa le Mɛlɛka.