Sɔɔŋ Chɔɔmaŋndoŋ

2 “Poonyial maalikɛinɔ+ cho o kundaa niŋ Ɛfisɔɔ+ wo aa: Wana bii looŋ ŋɔmmɛu woŋ o ba kɛndɔɔ choo, nduyɛ mbo wa balɔɔ o nyɛla kɛsiaala lambuila ŋɔmmɛulaŋ tɛɛŋ ndo, nyɛ o dimi wo cho hoo ni:+ 2 ‘I sina kelala numndaŋ, fafala ŋ cho wo, a biuwɔŋ numndo. A chɛl wanaa wɔɔŋnda le. Wanaa dimi maa kiilaa nda cho ni+ kɛ a cho ŋkiila le wa, ma yaasiaa nda, okoŋ ma saaluŋ maa wanaa lachoowaa nda cho ni. 3 A cho vɛlɛ hiouwɔɔ lachi a sɔɔŋ palaŋ bɔɔbɔɔ biuwɔŋndo le diola nilaŋ.+ Nduyɛ a vi ŋdial kposoŋ te.+ 4 Kɛ nyɛ ya bii num tɔɔyaŋ le ndu wo cho ni maa, a mal kaala num oo nɔ o tasela ndɔ wo.

5 “‘Lelaŋ, loonuŋ a mɛɛ ŋ wa yɛ tuupa ma del. Wookuŋ,+ nduyɛ ma tosa sɔɔŋ ŋ wa paandu tosaa woŋ. Te a tosa lende le,+ I cho hunɔɔ naa num chua mi faŋa nyɛ kɛsiaa lambui numndo+ o fondaŋ ndɔɔ. 6 Kɛ nyɛ ya chandu vɛlɛ num le ndu wo cho ni maa, a tul sɔɔŋ kunda Nikoleyɔɔsi+ wo cho tosaa woŋ leyɛ mɛɛ ya bɛɛ tul muŋ leyɛ yɛ. 7 Num o num nɔ pɛ nila tuɛiyaa isɔɔ, mɛɛ yaŋ nilaŋ o nyɛ nyina Mɛlɛkaa cho kundalaŋ dimullo wo:+ Wana o wana yem pɛ,+ I cho tosa mbo de komɔɔ yɔm yɔŋgu yoomoo,+ mbo wa o kpele hɛnɛkɛ Mɛlɛkaa niŋndo.’

8 “Poonyial maalikɛinɔ cho o kundaa niŋ Simana wo aa: ‘Wana Tasoo a Wana Mɛɛlaa,’+ o ndoo vi kɛ mbo miiŋgu yoomu wo, nyɛ o dimi wo cho hoo ni:+ 9 ‘I sina nyɛpalaa a kuɛi cho num choo ve, kɛ nduyɛ a cho o sulaa.+ I sina vɛlɛ wanaa cho sɔɔŋ wɔɔŋndoŋ dimioo a num okɔɔ wa. A dimi maa Chuuwa nda cho ni, kɛ a cho ŋChuu le. Kunda Setana wo nda cho ni.+ 10 Siooŋii bii num le sɔɔŋ nɔ le num komallo woŋ te.+ Setana* cho wa nya pumnda dɔwɔɔ o chiɛila manyumndaŋ niŋ le nya tɔɔndaŋndo. Nyɛpalaa cho nya wa choo le palɛi tɔ. Lo o laalaŋ numndo choo o yɔŋ bɛɛ ma vi. I cho num mɔsil yoomoo ke.+ 11 Num o num nɔ pɛ nila tuɛiyaa isɔɔ,+ mɛɛ yaŋ nilaŋ o nyɛ nyina Mɛlɛkaa cho kundalaŋ dimullo wo: Wana o wana yem pɛ,+ piɔm diiŋ ndɔɔ cho ndu nyɛ o nyɛ yɔŋ te.’+

12 “Poonyial maalikɛinɔ cho o kundaa niŋ Pɛkamɔm ndo aa: Wana nɔ muɛi faŋii luɛiyɛi sondola tiɔɔŋii vilɛiye wo, nyɛ o dimi wo cho hoo ni:+ 13 ‘I sina fondaŋ ŋ cho wo. Naa kpeŋgbei lemasa Setana wo cho wa, loŋ ŋ cho ni. Kɛ a koŋ kpou, a cho hiouwɔɔ lachi a diola nilaŋ biyɔɔ kpiŋ.+ Teleŋ nda dii+ bɛɛ Aŋtipaasi buɛi ni laalaŋndo+ nya o hɔl naa Setana cho wa wo, la mel laalaŋ nya nɔ o ya niŋndo le.+

14 “‘Kɛ I nɔ sɔɔŋ ŋ tiŋ, ŋ ya bii num tɔɔyaŋ ndoŋ. Waŋnda apum cho loŋ ma wa pɛɛkula Belam+ ndaŋ tolɔɔ kɔɔli. Belam ndo hoo yɛ, ndu pɛɛku Belaki+ ni mbo tosa mi Isɔluɛiya luei balaŋ o hakioo niŋ, ma dia nyɛdiaa lasooluuwo, nduyɛ ma tosa kaa ihini nɔɔlɛiyo.*+ 15 Lende koni waŋnda apum nya tɛɛŋ cho pɛɛkula kunda Nikoleyɔɔsi laŋ tolɔɔ kɔɔli ni.+ 16 Lelaŋ, wookuŋ. Te o cho koŋ te, I cho suŋ suŋ hunɔɔ naa num chua, mi chɔulaba nda a muɛi faŋii vilɛi fula ya o sondo ve.+

17 “‘Num o num nɔ pɛ nila tuɛiyaa isɔɔ, mɛɛ yaŋ nilaŋ o nyɛ nyina Mɛlɛkaa cho kundalaŋ dimullo wo:+ Wana o wana yem pɛ,+ I cho ndu ke manɛi cho o viaŋaa wo o tiŋ,+ mi ke ndu vɛlɛ pou humboo. Diola sɛnɛilaŋ la cho la poonyiaa lechoo. Wana o wana sina diolaŋ ndaŋ te, mɛɛ wana cho pouwo hoo sɔla wo.’

18 “Poonyial maalikɛinɔ cho o kundaa niŋ Tayatilua+ wo aa: Po Mɛlɛkaa, o hɔlta ndɔlaŋ la cho maa yeleŋ yeleŋ leyiŋ,+ nduyɛ mi peluŋ ndɔŋ wa maa chiliŋii siaŋɛi* kɛndɛ kɛndɛi wo, nyɛ o dimi wo cho hoo ni:+ 19 ‘I sina kelala numndaŋ, kaala ŋ nɔ wo, laalaŋ numndo, wali Mɛlɛka ŋ cho tosaa wo, a biuwɔŋ numndo. Nduyɛ kelala numndaŋ suŋ suŋ la hiou naŋɔɔ a la taselaŋ.

20 “‘Kɛ nyɛ ya bii num tɔɔyaŋ le ndu wo cho ni maa, chua koŋ, ndu yɔŋnuŋ ni maa Chɛsibɛɛ,+ ma chɛl ndu. O dimi maa wana suaa le Mɛlɛka wo o cho ni. O cho buɛiyaa niaa huiyo a pɛɛkula ndɔlaŋ le ma tosa kaa ihini nɔɔlɛiyo,*+ nduyɛ ma de nyɛdiaa lasooluuwo. 21 I ke ndu teleŋndo le mbo wookuŋ, kɛ o kɛɛ le kaa ihini nɔɔlɛi* ndɔɔ malɔɔ. 22 Le hei, I cho tosa mbo del a naa. Wanaa cho suundaa a ndu wa bɛɛ, te a wookuŋ ma mal kaa o luei nda niŋndo le, I cho nda nyɛpalaa bɛndoo tusi choo. 23 I cho chuauwaa nduaa diu diu a naa wɔɔŋ wɔɔŋndo. Okoŋ, kundalaŋ kpou la cho sina maa ya cho wana yaasiaa yiyaŋnda yiŋgoloŋndaŋ* a kɔltaŋ ndo ni. Nduyɛ I cho wana o wana paawa* a mɛɛ kelala ndɔlaŋ la cho yɛ.+

24 “‘Kɛ nya waŋnda a tuaa Tayatilua, nya tul pɛɛkulaŋ ndaŋ kɔɔli le wa, nya kɛɛ le “sɔɔŋ yiŋgoloŋ Setana woŋ” sinaa wa:+ I cho lɛ nya kalaŋ cheleŋ siiluu le. 25 Nyɛ ya cho nya dimullo wo cho ni maa, nyɛ nya nɔ wo, la bii ndu kpiŋ haaa mi hiŋ.+ 26 Wana o wana yem pɛ, okoŋ mbo lo nyɛ ya dimul ndu wo tosaa haaa o mɛɛlulaŋ, I cho ndu kpaayaa ke kaalaŋ kpou choo,+ 27 mɛɛ ya bɛɛ sɔla kpaayaa Finya nuu o ba yɛ. O cho nda manda a tinda ichiliŋndo,+ okoŋ mbo pesi nda wɔ wɔ maa kpɛɛnɛi puulu. 28 I cho ndu vɛlɛ luei idiiye ke.+ 29 Num o num nɔ pɛ nila tuɛiyaa isɔɔ, mɛɛ yaŋ nilaŋ o nyɛ nyina Mɛlɛkaa cho kundalaŋ dimullo wo.’