Kɔliŋtiaŋ Tasoo

4 Waŋnda nɔ ma che naa maa le Kiliti naŋ cho wallo ni, nduyɛ maa buɛiyaa Mɛlɛka chɔm sɔɔŋ ndɔŋ viaŋnaŋndoŋ nda.+ 2 O hei niŋ, nyɛ yeemaŋ buɛiya o ba wo cho wali keŋnuŋ nda wo tosaa nyɛkɛndɛi ni. 3 Ya ya, o yɔŋ bɛɛ mi nya, ɔɔ masaa waa kilul la yamɛi, buulaŋ cho ya le. Nduyɛ yapila bɛɛ kiluluŋ iyama le. 4 Kɔl iyama nuu choŋnuŋ walaŋ. Kɛ keŋ chɔm naa maa I cho sakpo le. Wana kilul la yamɛiyo cho Chɛhowa* ni.+ 5 Lelaŋ, la kilul lɔ wana o wana iyama le+ haaa mi Masanɔɔ hiŋ. O cho hunɔɔ sɔɔŋ viaŋnaŋ cho o nyumndaŋ niŋndoŋ soli kpendekele, nduyɛ mbo chɔɔmuu yiyaŋnda waŋnda chieeya. Okoŋ mi wana o wana sɔla chandɔɔ Mɛlɛka o ba.+

6 Puaapiliaa, sɔɔŋ ya dimi muŋ ndoŋ, naa Apɔlɔɔ,+ ŋ cho maa tamasi le tɔnɔ nyaa, le mi la pɛɛku nyɛ dimiŋ hoo wo aa: “La huulu sɔɔŋ cho ŋ poonyiaa woŋ choo le,” yɔŋii nya tosa yoŋgaa+ mi la chua waŋndo o pilɛ o sɔvɛ mbo hiou waŋndo o pilɔɔ. 7 Yɛɛnɛ ŋ nɔ yɛ le ma yiyaŋ maa a cho teŋgeŋ a wana cheleŋ? Nyɛ o nyɛ ŋ nɔ, o cho sɔlaa le ŋ sɔla ndu le?+ Te o wa pɛ maa sɔlaa ŋ sɔla ndu ni, le yɛɛnɛ ŋ cho yɛ yoŋgaa kiolɔɔ wana che pɛ aa a ba num ŋ sɔla muŋ ni?

8 Baa la cho niŋ a kɔl hiniaa? Baa la cho niŋ a sulaa? Baa la simnuŋ niŋ masaa+ naa tase? Yeemɛi cho ya kɛsɛ le mi la simnuŋ masaa, okoŋ mi naa bɛɛ simnuŋ masaa a nya latulu.+ 9 Wana che pɛ maa Mɛlɛka soli naa kiilaa mɛɛ nda soli nuaa wanaa mɛɛlaa kpɔŋ o luŋ le nda diyɔɔ yɛ.+ Kanifuule chieeŋndo kpede, a maalikɛiya, a waŋnda chieeya cho naa tofaa.+ 10 Diɔmnda+ naŋ cho le Kiliti ni, kɛ mi nya wa wanaa kɔl kalu o Kiliti niŋ. Wanaa vi ŋdial la naŋ cho ni, kɛ nya la kendu ŋdial. Waŋnda nɔ bɛɛleŋ le nya, kɛ a nɔ lebɛɛ le naa le. 11 Haaa mbo huŋ bii a boondei hei, yiaaŋ ma cho naa nɛiyo,+ kolɔɔ bii naa,+ fɛlioo cho naa, a cho naa lɔɔ,+ nduyɛ ŋ nɔ naa chalaa le. 12 Ŋ cho wallo kalaŋ le naapila.+ A yei naa pɛ, ŋ dɔu nda sala.+ A tusi naa nyɛpalaa choo pɛ, ŋ biunuŋ.+ 13 A tɛɛmbuu naa pɛ tɔɔ, ŋ soo o nda lo nyɛkɛndɛi.+ Huŋ bii a suŋ suŋ, ŋ simnuŋ maa bil waa o sal choo le chieeŋndo, nyɛm waŋnda yeema bɛɛ ma che le woŋ.

14 O cho le nya lasiɔmbu tusi le ya poonyial nya sɔɔŋ muŋ te, kɛ le nya silaa maa chuauwaa niaa kaalaa. 15 A yɔŋ bɛɛ mi la nɔ wanaa pɛɛkaa 10,000 o Kiliti niŋ, la nɔ finyaa bɔɔ le. Ya simnuŋ finya nya o Chiisu Kiliti niŋ ni a yooŋgu kɛndɛ ya dimul nya wo.+ 16 Lelaŋ, I cho nya nyɔɔloo a yandii, la tol tamasi nuu kɔɔli.+ 17 Le sabu koŋ ya cho Timoti yɔŋndo naa nya chua ni, kanifuule po ni kaalaa chɔm laalaŋndo o wali Masanɔɔ niŋndo o cho ni. O cho nya loonɔŋ nɛila ya tosa sɔɔŋ o wali Chiisu Kiliti wo niŋndaŋ,+ a mɛɛ ya cho keiyo pɛɛkoo o kunda o kunda niŋ yɛ.

18 Wanaa pum cho yoŋgaa kiolɔɔ nya tɛɛŋ, wana che pɛ aa I cho lɛ hunɔɔ naa nya chua le. 19 Kɛ te Chɛhowa* chɛl pɛ, I cho hunɔɔ naa nya chua o teleŋ biŋgi bɛŋgu. Okoŋ mi sina kpaaya wanaa cho kaŋ yoŋgaa kiolɔɔ wa, o cho nyɛ nda cho dimioo wo le. 20 Kanifuule, o cho a nyɛ naŋ dimi wo le naŋ chɔm maa ŋ diikuŋ Masale Mɛlɛkaleŋ te, kɛ a kpaaya Mɛlɛkaa. 21 O kuɛɛ nya hɛnaŋ yɛ? Baa I huŋ o nya lo a sioŋndeŋ,+ ɔɔ I huŋ o nɛi kaalaa niŋ a o nɛi lebɛɛ niŋ?