Sɔɔŋ Chɔɔmaŋndoŋ

14 Okoŋ, mi cha Saa Fɔŋndɔɔ+ isisi o Pembii Saayɔŋ Nde choo.+ Waŋnda 144,000 wa a ndu latulu.+ Diola ndɔlaŋ a diola Finya ndɔlaŋ+ la wa nda la poonyiaa o ŋtendu. 2 Mi tuɛi diomndo fulaa o choo choo niŋ maa bal bɛndu, nduyɛ maa letaŋ. Diom ya tueiyo, o wa ko mɛɛ waŋnda wa nuaa chondoŋ solioo ma luaa towalaŋ yɛ. 3 A wa isisi kpeŋgbei* lemasaa, nyaa yoomaa hiɔɔluaa,+ a bɛnduaa lachi,+ ma wa chondii sɛnɛiye solioo.+ Wana o wana cheleŋ ndoo chiee chondii keŋ solioo le, mɛɛ ŋwaŋ 144,000+ nda pendu o lɛŋndeŋ choo wa. 4 Waŋnda haa nɔɔliaa ndapila a wana lanɔ le. Yufuaa pɛŋ nda cho ni.+ Nda cho Saa Fɔŋndɔɔ tolɔɔ kɔɔli ni, ba o ba o kuɛ pɛ.+ Nda cho wanaa nda pendu+ waŋnda chieeya tɛɛŋ nda ni. Nduyɛ, kɔmnde taseleŋ+ nda cho le Mɛlɛka a Saa Fɔŋndɔɔ ni. 5 A nɔ lachoo o sondo le. Nduyɛ a nɔ sɔŋ o sɔŋ te.+

6 Mi cha maalikɛinɔ cheleŋ balɔɔ choo choo. Ndoo nɔ yooŋgu kɛndɛ cho le fɛɛŋ a fɛɛŋ ndo le mbo dimul waŋnda lekaa o lekaa, a lelɛŋ o lelɛŋ, a isɔɔ o isɔɔ maŋgalaa, a waŋnda suu o suu o lɛŋndeŋ choo.+ 7 O wa dimioo choo choo kpeleŋ aa: “La nɔ siooŋii Mɛlɛkɛi, mi la ke ndu bɛɛleŋ. Kanifuule, boondii o cho waŋnda yamɛi kilul le i fuuluu.+ Lelaŋ, la piɛi Wana toosiaa choo choo, a lɛŋndeŋ, a pee mɛŋma ihɛllo,+ a peela pɔmbɔlaŋ kpou wo.”

8 Mi cha vɛlɛ maalikɛinɔ diiŋ ndɔɔ o hoo kɔɔli. O wa dimioo aa: “O del! Babilɔŋ Bɛndoo+ del!+ Ndu tosa ni mi waŋnda o chieeŋndo niŋ kpou kol muɛima ndɔma kaa ihini nɔɔlɛiyaŋ.”*+

9 Mi maalikɛinɔ cheleŋ, o yaa ndɔɔ tual nda kɔɔli. O wa dimioo choo choo kpeleŋ aa: “Wana o wana sooluu pɛ visi biyaa+ a velaŋ ndɔɔ, nduyɛ mbo chɛl ma handu ndu pondaleŋ o itendu ɔɔ o ba,+ 10 wana koŋ cho muɛima kɔl tuu Mɛlɛka waŋ kolɔɔ o taala ndɔ kɔl tuuwo niŋ,+ ma o muuliaŋ te waŋ. O cho wa saŋgaa o yiŋnde wule wule leŋ+ niŋ maalikɛiyaa diandaa a Saa Fɔŋndɔɔ o hɔl. 11 Kumii ndɛi keŋ* cho wa helɔɔ le fɛɛŋ a fɛɛŋ.+ Wana o wana sooluu pɛ visi biyaa a velaŋ ndɔɔ, nduyɛ ma handu ndu pondale diola ndɔlaŋ, idii a ichɔl, pɛŋgi cho le ndu le.+ 12 Le saboo hoo, wanaa diandaa nɔ ma biunuŋ.+ Nda cho wanaa bii sawala Mɛlɛkalaŋ, nduyɛ ma sim yi o laalaŋ nda dɔu+ o Chiisu niŋndo choo wa ni.”

13 Mi tuɛi diomndo suɛi o choo choo niŋ aa, “Poonyiaa: Chɔŋ a teleŋndo hoo mbo kuɛ kɛ, kɔl kɛndɔɔ cho le wanaa vi o Masanɔɔ niŋnda.+ Nyina diandaa dimi aa, a tonya, a nɔ ma pɛŋgi a wali nda kala kalaa. Mɛlɛka che walta kɛndɛla nda tosalaŋ.”

14 Mɛɛ ya nua, mi cha yumbu yumbu humboo. Wana aa che pɛ wana wa ichali lechoo wo aa po wanachioo ni.+ Mɔsil lemasa ŋkooliiyo wa ndu o lebol, nduyɛ wɔlɔtɔ luɛiyaa wa ndu o ba.

15 Mi maalikɛinɔ cheleŋ fula o chiɛi Mɛlɛkaa* niŋ. O wa wana wa ichali o yumbu yumboo choo wo dimullo choo choo kpeleŋ aa: “Baa wɔlɔtɔ numndo ma kou, kanifuule teleŋ kuauwaa fuuluu. Lɛŋndeŋ le vesa le kouwɔɔ.”+ 16 Mi wana wa ichali o yumbu yumboo choo wo baa wɔlɔtɔ ndɔɔ o lɛŋndeŋ choo. Okoŋ, mbo kuau lɛŋndeŋ.

17 Okoŋ kɔɔli, mi maalikɛinɔ cheleŋ fula vɛlɛ o chiɛi Mɛlɛkaa niŋ choo choo. Ndu bɛɛ ndoo nɔ wɔlɔtɔ luɛiyaa o ba.

18 Mi maalikɛinɔ cheleŋ fula vɛlɛ o bandu luamaa lasalaa. Ndu ndoo nɔ kpaayaa yiŋndeŋ choo ni. Mbo dimul maalikɛinɔ ndoo nɔ wɔlɔtɔ luɛiyaa o ba wo choo choo kpeleŋ aa: “Baa wɔlɔtɔ num luɛiyaa ma keenduu kpɔŋyɔla makilepiilaŋ o lɛŋndeŋ choo, kanifuule kilepiima nduaŋ ma diu.”+ 19 Mi maalikɛinɔɔ hoo baa wɔlɔtɔɔ o lɛŋndeŋ choo, mbo keenduu kpɔŋyɔla makilepiilaŋ, okoŋ mbo wou laŋ o doola kɔl tuu Mɛlɛkaa niŋ.+ 20 Chiee lekɔɔ doolaa hoo wa ni. Mɛɛ nda waayiaa kilepiiyaŋ maŋ leniŋ, mi koowaŋ ma fula. Mi ma hel haaa mi ma fuuluu suaa o sondolaŋ bɛŋgu. Mi ma kua koŋgioo le kilolaŋ 296.*