Chɔɔchiaa

8 Okoŋ, mi waŋnda Ifiluem dimul Kidiɔŋ aa: “Le yɛɛnɛ ŋ tosal lɛ naa hei? Le yɛɛnɛ a veelu naa teleŋ ŋ wa kɔlaŋ sɔŋgɔɔ a waŋnda Midiaa wo le?”+ Le hei, ma duaunuŋ tumbe o kala kala a ndu.+ 2 Mbo dimul nda aa: “Yɛɛnɛ kpeekpei ya tosa yɛ, te wana tuu ndu pɛ a o nya tosa wo? Baa o cho kilepiima mɛɛlaa waŋnda Ifiluem+ keenduu waŋ te ma bɛnda, mi ma hiau kilepiima tase waŋnda Abi-isa waŋ te?+ 3 Nya Mɛlɛka soliŋ kpeku ni mi la yam waŋ banaa Midiaŋ, Oluɛbi nda Siɛɛbi.+ Yɛɛnɛ kpeekpei ya tosa yɛ, te wana tuu ndu pɛ a o nya tosa wo?” Mɛɛ Kidiɔŋ dimi hei, mi kɔltaŋ la pɔlul nda.

4 Okoŋ, mi Kidiɔŋ huŋ o Pioo Chɔɔdaŋ mbo taŋ. Ndu a puaa chɔuwaa 300 wa ndu kɔɔli wa wa a saŋgɛi yɔkɔɔ. Kɛ a koŋ kpou, ma hiau lachi a yaamɔɔwaa ndaa touwɔɔ. 5 Mbo dimul waŋnda Sukɔti aa: “A yandii, la kel la wanaa cho ya haa kɔɔli wa nyɛdiaa, kanifuule a cho a saŋgɛi yɔkɔɔ. Nduyɛ ŋ cho wɔ hiouwɔɔ lachi a masaa Midiaŋ, Sɛbaa nda Salimuna touwɔɔ.” 6 Kɛ, mi waŋ banaa Sukɔti nyuna ndu aa: “Baa a chii niŋ Sɛbaa nda Salimuna biyɔɔ le miŋ ke puaa num aa chɔuwa nyɛdiaa?” 7 Okoŋ mi Kidiɔŋ dimul nda aa: “Le nyɛ nya dimi hoo wo, te Chɛhowa mal la Sɛbaa nda Salimuna o ba pɛ, I cho nya hunɔɔ koŋɔɔ a yɔɔŋ o pollo niŋ.”+ 8 Okoŋ mbo faŋaŋ loŋ mbo kua Pɛnuɛɛ, mbo kɔ nyuna nda le ma ke puaa nduaa nyɛdiaa. Kɛ mi waŋnda Pɛnuɛɛ bɛɛ mulul ndu mɛɛ waŋnda Sukɔti mulul ndu yɛ. 9 Okoŋ mbo dimul waŋnda Pɛnuɛɛ aa: “Te I kɔ sɔla pɛ batiuwaa, I cho hunɔɔ bandu nya vilɛiyo hoo piɔlɔɔ.”+

10 A teleŋ koŋ, Sɛbaa nda Salimuna wa Kaakɔ a puaa ndaa chɔuwa, nduyɛ ndaa wa le 15,000. Puaa chɔuwaa ndaa fula ba paaleŋ le chaŋ ndo wa kpou,+ haa kinɛi ndaa lo niŋ ni. Kanifuule, ma diu diu puaa ndaa chɔuwaa le 120,000. 11 Mi Kidiɔŋ hiau lachi a kɔlaŋ kpeŋgii wanaa wa o tɛndiilaŋ niŋnda, Nobaa a Chokpɛhaa+ ba paaleŋ le chaŋ ndo. Okoŋ mbo kɔ del dɔɔŋgɔ ndaa choo, a ve pɛŋ kɔl te. 12 Mɛɛ masaa Midiaŋ, Sɛbaa nda Salimuna nyaanuŋ, mbo tisa nda kɔɔli mbo kɔ bii nda. Okoŋ mi waŋnda o dɔɔŋgɔɔ niŋ kpou yɔŋnuŋ pulaŋ pulaŋ.

13 Mi Kidiɔŋ po Chowaasi wo fula o chɔuwo, mbo keeku a nɛi kuɛ Hɛluɛsi wo le miiŋgoo o ndu lo. 14 Mɛɛ o wa miiŋgoo, mbo kei po chua piaandu pilɛ biyɔɔ o nɛi tɛɛŋ fulaa Sukɔti, mbo nyuuniaa ndu. Okoŋ, mi poo hoo poonyial ndu diola waŋ banaa a laŋgbaa kalla o Sukɔti niŋ ŋwaŋ 77. 15 Mi Kidiɔŋ kua o waŋ banaa Sukɔti lo, mbo dimul nda aa: “Sɛbaa a Salimuna wo hoo nya wa ya mamɔɔ ni aa, ‘Baa a chii niŋ Sɛbaa a Salimuna biyɔɔ, le miŋ ke puaa num aa cho haa a saŋgɛiya wa nyɛdiaa? La che nda niko.’”+ 16 Okoŋ, mi Kidiɔŋ bii laŋgbaa kalla o chiee koŋ niŋ, mbo kuaŋ nda koŋɔɔ pila a yɔɔŋ o pollo niŋ, le nda chɔmndo maa nyɛ nda tosa wo niŋ te.+ 17 Okoŋ kɔɔli, mbo tɛɛmbuu bandu vilɛi wa Pɛnuɛɛ wo,+ nduyɛ mbo diu diu puaa o chioo niŋ.

18 Mi Kidiɔŋ nyuna Sɛbaa nda Salimuna aa: “Wanaa suu kuɛɛ nya diu diu yɛ o Tabɔɔ niŋ?” Ma muli aa: “A wa ko maa num. O kɛ kɛ wa ko maa po masa.” 19 Okoŋ mbo dimi aa: “A nya diu kaŋ nda, kala pilɔɔ velu naa ni. I mɛnaŋ po o Chɛhowa, Mɛlɛka cho yoomu wo lo maa, te nyaa diu diu puaa kaŋ te, nya bɛɛ I ve nya diyɔɔ le.” 20 Okoŋ, mi Kidiɔŋ dimul Chɛtɛɛ po ndɔ tasoo aa: “Chɔŋ, ma diu diu nda.” Kɛ Chɛtɛɛ soli muɛi nduɛi faŋnde le, kanifuule o wa siooŋnde le mɛɛ o wa wɔ feleŋgɔnɔ yɛ. 21 Mi Sɛbaa nda Salimuna dimi aa: “Numpila chɔŋ ma dii naa, kanifuule mɛɛ waŋndo cho yɛ, lende kpaaya ndɔɔ wa ni.” Mi Kidiɔŋ chaŋ mbo dii Sɛbaa nda Salimuna.+ Nduyɛ, mbo sooluu nyɛm kɛvɛlɛŋ* wa nyɔɔmiaa ndaa ŋ bayiaa o labolo woŋ.

22 Okoŋ kɔɔli, mi waŋnda Isɔluɛi dimul Kidiɔŋ aa: “Wa naa choo masa, num ni, po numndo ni, a po num mamaa, kanifuule num piŋi naa waŋnda Midiaŋ o ba ni.”+ 23 Kɛ mi Kidiɔŋ dimul nda aa: “I cho nya wa masa choo le, kɛlɛŋgaa niŋ te mi po nuu wa nya masa choo. Chɛhowa cho nya wa masaa choo ni.”+ 24 Mi Kidiɔŋ hiau lachi a suɛi aa: “I yeema mi la tosal la nyɛ: I yeema mi wana o wana ke ya kelɛi miliŋnde o nyɛm ndɔŋ o puŋga woŋ tɛɛŋ.” (Yaamɔɔwaa ndaa, ndaa nɔ kelaŋ lamiliŋ nda toosiaa a kooliiyoŋ ndoŋ, kanifuule Isimɛlaitiiya nda wa ni.)+ 25 Ma dimi aa: “Ŋ cho num muŋ ke a mɛɛ ŋ dimi yɛ.” Okoŋ ma pɛŋgɛla domaa, mi wana o wana chua kelɛi miliŋnde o nyɛm o puŋga woŋ tɛɛŋ mbo mal lechoo. 26 Lusul kelaŋ lamiliŋ o nyuna le muŋ ndoŋ wa siɛkɛlloŋ 1,700.* Nyɛm cheleŋ o sɔla vɛlɛ o muŋ kɔɔli woŋ cho muŋ ni: kelaŋ, domala kɛndɛ kɛndɛla masaa Midiaŋ ndaa wounuŋ ndaŋ, a yɔlɔŋ ndaa bayiaa nyɔɔmiaa woŋ.+

27 Okoŋ mi Kidiɔŋ toosiaa doma biŋgioo*+ mbo kɔ kɛsi ndu o ndu lo chiee Ofiluaa.+ Mi Isɔluɛiya kpou muliŋ domaa hoo sooluuwo* loŋ.+ Nduyɛ, mi hei simnuŋ yaŋɔɔleŋ le Kidiɔŋ a yuŋgu ndɔɔ.+

28 Mi Isɔluɛiya yam Midianaitiiya.+ Nduyɛ, fɛɛŋ bɛɛ a kindiŋ lɛ le nda simullo le. Le wɔsilaŋ 40 kɔl nyuloo wa o lɛŋndeŋ niŋ o palɛi Kidiɔŋ nde niŋ.+

29 Okoŋ, mi Chɛlubaal+ po Chowaasi wo miiŋgu o ndu lo, mbo kɔ wa loŋ.

30 Mi Kidiɔŋ vialu puaa 70, kanifuule ndoo nɔ laanduaa tau. 31 Mi laa ndɔ pɔmbɔɔ o Siɛkɛm niŋ bɛɛ vilul ndu poo, mbo ke ndu diolaŋ aa Abimɛlɛki.+ 32 Mi Kidiɔŋ po Chowaasi wo wu, nduyɛ o wa niŋ o yuwɛi kudɛɛ. Ma kumbu ndu o sɛi finya ndɔ wo niŋ Ofiluaa, o chiee bɛndu Abi-isaitiiya niŋ.+

33 Dimioo nuaa mi Kidiɔŋ wu, mi Isɔluɛiya kandu vɛlɛ suŋgbuma Baal laŋ sooluuwo.+ Nduyɛ, ma hɛli Baal-bɛluiti le mbo wa mɛlɛka ndaa.+ 34 Mi Isɔluɛiya puɛɛnuŋ a Chɛhowa Mɛlɛka ndaa,+ o piŋi nda yaamɔɔwaa ndaa kpou o ba wo.+ 35 A sɔɔŋ kɛndɛŋ Chɛlubaal, koŋ cho ni, Kidiɔŋ, tosal waŋnda Isɔluɛi yoŋ kpou, ma kɛɛ le yuŋgu ndɔɔ kaala lo lechoo wo chɔmndo.+