Ditɔnɔmii
10 “A teleŋ koŋ, mi Chɛhowa dimul la aa, ‘Siɔl pouta yɛndɛlaŋ la tiɔɔŋ maa la taselaŋ,+ ma hiŋ naa ya chua o pembei choo. Okoŋ kɔɔli, ma toosiaa vɛlɛ kɔfu iyɔmndo. 2 Nduyɛ diomnda wa o pouta yɛndɛla tasela ŋ pɛl taŋ choo laŋ, I cho laŋ miŋgi poonyiaa lechoo, ma kɔ kɛsi laŋ o kɔfoo niŋ.’ 3 Okoŋ mi toosiaa kɔfoo a yɔm akeesiaa wo, mi sial pouta yɛndɛlaŋ la tiɔɔŋ maa la taselaŋ, nduyɛ mi hel a pouta yɛndɛla tiɔɔŋnda laŋ o pembei choo.+ 4 Sawala Tɔ La*+ Chɛhowa poonyiaa o pouta yɛndɛla taselaŋ choo laŋ,+ mbo miŋgi laŋ poonyiaa o pouta yɛndɛlaŋ ndaŋ choo, mbo ke ya. Teleŋ nya chuuŋgiaŋ+ mi Chɛhowa wa suɛi o nya lo o pembei choo o yiŋndeŋ niŋndo+ o yɔŋgu laŋ ni. 5 Okoŋ mi muliŋ, mi tual pembei,+ mi kɔ kɛsi pouta yɛndɛlaŋ ndaŋ o kɔfu ya toosiaa wo niŋ, le mi la wa loŋ mɛɛ Chɛhowa dimul la yɛ.
6 “Mi Isɔluɛiya faŋaŋ Biaalɔti Bɛni-chaakaŋ, ma kua Mosɛluaa. Loŋ Elɔŋ vi ni, ma kumbu ndu.+ Okoŋ mi Ɛlieesa po ndɔ miiŋgu wana soliaa lasalaa o foofo ndɔɔ.+ 7 Mɛɛ nda faŋaŋ loŋ, ma kua Kɔdikuda. Faŋaŋndo Kɔdikuda, ma kua Chotibata.+ Peela pɔmbɔlaŋ* la wa tau o lɛŋnde leŋ niŋ.
8 “A teleŋ koŋ, mi Chɛhowa hɛli kaale Livai leŋ+ le kɔlaŋ a kɔfu kpema Chɛhowa wo,+ nduyɛ ma sim Chɛhowa lachi le ndu waltaŋ tosallo, okoŋ ma dɔu waŋnda sala o diola ndɔlaŋ niŋ,+ a mɛɛ nda cho ndi tosaa suŋ suŋ yɛ. 9 Le saboo hoo, a ke Livai nyɛm kɛ puaapiliaa nduaa Isɔluɛiya tɛɛŋ te. Chɛhowa cho nyɛm kɛŋ ndɔŋ ni, a mɛɛ Chɛhowa Mɛlɛka nyaa dimul ndu yɛ.+ 10 Mi lo vɛlɛ o pembei choo le palɛi 40 a nyumndaŋ 40 mɛɛ ya tosa o tasela ndɔ yɛ.+ Nduyɛ a teleŋ koŋ bɛɛ, mi Chɛhowa yaŋ ya nilaŋ.+ Chɛhowa ndoo yeema mbo tɛɛmbuu nya le. 11 Okoŋ mi Chɛhowa dimul la aa, ‘Dimul waŋnda ma bɛɛndiaŋ, nduyɛ ma sim nda lachi le ma kɔ bii lɛŋnde ya chuel finyaa ndaa mamaa buŋgɛi le nda kioo leŋ.’+
12 “Nya waŋnda Isɔluɛi, nyɛ Chɛhowa Mɛlɛka nyaa yeema nya+ mi la tosa kinɛiyo cho hoo ni: la nɔ siooŋii Chɛhowa Mɛlɛka nyaa,+ mi la kuɛ o nɛila ndɔlaŋ choo,+ mi la kaala ndu, mi la piɛi Chɛhowa Mɛlɛka nyaa a kɔl nyaa kpou vɛlɛ a yoomu* nyaa kpou,+ 13 nduyɛ mi la bii sawala Chɛhowa laŋ, la ya cho nya hau kioo laŋ, le mi nyɛ o nyɛ wa o kɛndɛ a nya.+ 14 Chɛhowa Mɛlɛka nyaa nɔ choo choo a nyɛ o nyɛ cho leniŋ ni. Nduyɛ, ndu nɔ vɛlɛ lɛŋndeŋ a nyɛ o nyɛ cho leniŋ ni.+ 15 Kɛ finyaa nyaa mamaa kinɛi Chɛhowa Mɛlɛka sɔɔŋguu ikɛi ni, mbo chɔm nda kaala ndɔɔ, nduyɛ mbo hɛli nya cho chuauwaa ndaa mamaa+ wa waŋnda tɛɛŋ kpou a mɛɛ i cho hau nuaa a nya yɛ. 16 La nɔ mi la dindi kɔlta nyalaŋ,+ nduyɛ mi la mal bolle kalaleŋ.*+ 17 Kanifuule, Chɛhowa Mɛlɛka nyaa cho Mɛlɛka hiou mɛlɛkaa,+ a Masanɔ hiou masaa kpou wo ni. O cho o bɛndu, o nɔ kpaayaa, nduyɛ Mɛlɛka waŋnda nɔ ma nɔ siooŋii nduɛi yo o cho ni. O hɛli ŋwaŋnda chiee le,+ nduyɛ o bii luɛiyɔɔ niŋ te. 18 Mbo suŋgu le chuaambuaa nɔ ŋfinya le wa,* vɛlɛ a waŋ laanduaa vii piaanduaa wa.+ O kaala mialla,+ nduyɛ mbo ke nda nyɛdiaa a nyɛ chuɛɛnaŋndo. 19 Nya bɛɛ, la nɔ mi la kaala mialla. Kanifuule, mialla nya wa o lɛŋnde Ichipi leŋ niŋ ni.+
20 “La nɔ siooŋnde le Chɛhowa Mɛlɛka nyaa. Ndu nya nɔ ni mi la piɛi,+ ndu nya nɔ ni mi la holnuŋ, nduyɛ o diola ndɔlaŋ niŋ nya nɔ ni mi la mɛnaŋ. 21 Ndupilɛ kpe nya nɔ ni mi la saŋgala.+ Ndu cho Mɛlɛka nyaa, o tosal nya sɔɔŋ kɔndɔfiliŋ bɛnduŋ nya che muŋ a lehɔl loŋ kpou ni.+ 22 Finyaa nyaa mamaa ŋwaŋ 70 kuɛ Ichipi ni,+ nduyɛ mi Chɛhowa Mɛlɛka nyaa tosa mi la kui tau tau mɛɛ looŋ cho nuaa o choo choo niŋ yɛ.+