Polowaa
22 Diola kɛndɛlaŋ* nɔɔ bɛnda mbo hiau sullo.+
Nduyɛ, waŋnda num bɛɛleŋ kioo* bɛnda mbo hiau kaniŋ humboŋ a kooliiyoŋ.
2 Wana sulaa a wana bala fondoo, nyɛpilɔɔ kpe nda cho ni.
Nda ŋiɔɔŋ kpou Chɛhowa toosiaa nda ni.+
3 Wana taasioo cha kpundɔɔ hunɔɔ ni mbo fafaŋ ndu.
Kɛ diɔmndo ndu hiouwɔɔ lachi tuŋ a kɔlaŋ, nduyɛ mbo sɔla fulamakɔɔlila wɔɔŋndaŋ.
4 Fulamakɔɔlila wana sɔla le tusiŋndo a siooŋnde nɔɔ le Chɛhowa laŋ,
La cho sullo, bɛɛleŋ, a yoomoo ni.+
5 Yɔɔŋ a yaŋɔɔlaŋ la cho o nɛi wana dɛnɛ wɔɔŋndo choo,
Kɛ wana o wana che pɛ yoomu ndɔɔ o sɔvɛ, o sɔɔŋguu muŋ ikɛi le.+
6 Pɛɛku po numndo* nɛi o nɔ mbo kuɛ choo wo.+
O yɔŋ bɛɛ mbo sul kaasoŋnɔ, o feŋaŋ o nɛi koŋ choo le.+
7 Wana sulaa cho masaa le wana bala fondoo ni.
Nduyɛ, mi wana bii kuoo wo simnuŋ chiɔɔ le wana ke ndu kuoo wo.+
8 Wana o wana saŋ pɛ kafalaŋ, dɛnɛ palaa o kuau ni.+
Nduyɛ, sioŋnde o tusi waŋnda dɛnɛ palaa choo a kɔl ndɔ tuuwo leŋ le cho yom.+
9 Salaa cho le wana tosa kɛndɛi yo,
Kanifuule, mbo piɔu wanaa bala fonduaa nyɛdiaa ndɔɔ.+
11 Wana kɔl ndɔɔ cho walaŋ nduyɛ mbo dimi sɔɔŋ kɛndɔŋ ndo,
Masaa cho ndu biyɔɔ ichaŋya.+
12 Mi hɔlte Chɛhowa leŋ le manda kɔl kaloo,
Kɛ mbo chɔɔmuu sɔɔŋ wanaa mulu muluaŋnda dimi woŋ.+
13 Mi wana siɛlɛiyo dimi aa: “Kpɔkuŋndo* cho o bɛɛ!
O cho ya lakɔ diyɔɔ o luŋ kpendekele!”+
14 Sondo wana lanɔ suundɛiyo,* sooŋ yiŋgilɛiyo pila o cho ni.+
Wanaa Chɛhowa duaunuŋ tumbe a nda wa del o sooŋ koŋ niŋ ni.
16 Wana tosal wana bala fondoo kafalaŋ le mbo chɔɔlu sul lo,+
A wana ke wana sulaa nyɔɔŋ ndo,
Nda ŋiɔɔŋ kpou cho mɛɛlu o bala fondolaŋ niŋ.
18 A cho wa a kɔl kɛndɛ te a kɛsiŋ pɛ diomndaŋ ndaŋ o kɔl,+
Le halikpeŋ ma wa suɛi a laŋ okɔɔ teleŋ o teleŋ.+
19 I cho num hau kɔl kaloo kioo,
Le ma nɔ tiindaŋndo o Chɛhowa niŋ.
20 I poonyial num sɔɔŋ,
Le num silaa kioo tau.
21 Le num pɛɛkoo diomnda tonyala wana nɔla ma tiindaŋ ndaŋ,
Okoŋ ma miiŋgu wana vem num ndo o ibuŋ a kona tonyaa.
22 Poonda wana bala fondoo nyɛ o ba le mɛɛ o cho wana bala fondoo yɛ le,+
Tusi wana nɔ nyɛsɔlaa bɔɔ le wo nyɛpalaa choo o dio kpaki chioo le,+
23 Kanifuule, Chɛhowa pila cho suŋgɔɔ le nda le ma sɔla di ndaa.+
Nduyɛ, o cho tɛɛmbuu yoomula wanaa poondiaa nda nyɔɔŋ o laba wa.
24 Tosa chaŋyɛi a wana keleŋa kɔllo tuulu wo le,
Kɛlɛŋgaa niŋ te ma holnuŋ wana kɔl biŋgioo,
25 Le halikpeŋ a tul nɛila ndɔlaŋ kɔɔli,
Okoŋ ma hau o yaŋɔɔleŋ niŋ te.+
26 Lɔɔlɔɔ chua waŋndo bɔŋ le kuee o biiyo le,
Kɛlɛŋgaa niŋ te ma yɔŋgu landei le kuee waŋndo biiyo.+
27 Te a nɔ nyɛ le kuee koŋ paawa* le,
A cho hunɔɔ kpele ŋ lɔl choo wo chua ma kuɛŋnuŋ a ndu.
28 Faŋa pɛŋgula finyaa nyaa mamaa kɛsi sindɛ laŋ,
Ma hivi laŋ naa cheleŋ te.+
29 A che niŋ wana chaa wali ndɔɔ nyɛkɛndɛiyo?
Le masaa waa o tosa wallo ni,+
O tosa wallo le wanaa bala fonduaa le.