Ɛfisiaŋnda

6 Nya chuauwa, la diikuŋ wanaa velu nya wa+ mɛɛ Masanɔɔ hɛnaŋ yɛ. Kanifuule, hei cho sakpo le tosaa ni. 2 “Ke finya num a kala num bɛɛleŋ.”+ Sawa tase Mɛlɛka yɔŋgu wo cho hoo ni. Nduyɛ mbo chua buŋgɛi aa: 3 “Nyɛ o nyɛ cho wa o kɛndɛ a num, nduyɛ ma viou achal o lɛŋndeŋ choo.” 4 Nya finyaa, la wa chuauwaa nyaa kɔltaŋ tɛɛmbuuwo le.+ Kɛ la wa nda pɛɛkoo, nduyɛ mi la manda nda+ o nɛi Chɛhowa* wo choo.+

5 Nya chiaa, la diikuŋ wanaa nyaa banaa.+ La nɔ bɛɛleŋ le nda, nduyɛ mi la nɔ siooŋii ndɛi. La tosa ndi a kɔl nyaa kpou, mɛɛ nya tosa le Kiliti yɛ. 6 O wa ko le waŋnda chieeya kɔllo nɛŋioo teleŋ nda wa o hɔlndɔ wo le.+ Kɛ la tosa ndi maa chiaa Kiliti wa, a cho hɛnaŋ Mɛlɛkaa tosaa a kɔllo kpou wa.+ 7 La tosal nda wallo a kɔllo kpou. O wa maa le Chɛhowa,*+ kɛ o wa le wanachiee le. 8 La sina maa chɛ ni, wana baŋaŋ ni, Chɛhowa*+ cho ndu hunɔɔ fanda le wali o wali kɛndɛ o cho tosaa. 9 Nya wanaa nɔ chiaa wa bɛɛ, la bii nda nyɛkɛndɛi. La wueenuŋ nda le. Kanifuule, nya ndaa, Masanɔ pilɔɔ kpe nya nɔ o choo choo niŋ ni,+ nduyɛ o cho wana hɛliaa le.

10 Le suɛi siouwo, la hiou lachi a yoomuaŋ sɔlaa+ o Masanɔɔ niŋ, kanifuule kpaaya ndɔɔ cho o bɛndu. 11 La wounuŋ wolɔɔla chɔula+ Mɛlɛka ke nya laŋ kpou. Koŋ tosa mi la simul Setana* a nɛila ndɔla kaŋgalaa laŋ. 12 Kanifuule, o cho a wanachiee le naŋ cho chɔulabaa+ le, kɛ a masɛi, kpaayalaŋ, wanaa cho masaa o chieeŋ manyumndo hoo niŋnda, vɛlɛ a nyinaa wɔɔŋaa+ cho o choo choo niŋnda. 13 Le saboo hoo, la wounuŋ wolɔɔla chɔula Mɛlɛka ke nya laŋ kpou.+ Okoŋ te nyɛ o nyɛ wɔɔŋ chiŋalaŋ nya pɛ, koŋ tosa mi la simul ndu. La nɔla mi la sim yi, te la chii pɛ toosiaŋ kpou.

14 Lelaŋ, la sim yi. La yiinuŋ tonyaa o chaŋ maa leyau,+ nduyɛ mi la wounuŋ sandei maa doma chɔu.+ 15 La wa a bɛɛndiaŋ lɔɔlɔɔ le waŋnda yooŋgu kɛndɛ kɔl nyuloo dimullo. La wounuŋ ndu maa lakɔwɛi.*+ 16 Okoŋ kɔɔli, la chua laalaŋndo maa boo bɛndu puaa chɔuwa bii o ba wo.+ Koŋ mala mi la nyumi chiŋɔma leyiŋ wana dɛnɛ wɔɔŋndo wuu le nya viɔɔ waŋ.+ 17 La wounuŋ mɔsil piŋiaa,+ nduyɛ mi la chua muɛi faŋii nyina diandaa ke nya le chɔuwo ve. Ndi cho diom Mɛlɛkaa ni.+ 18 La wa Mɛlɛka piɛiyo teleŋ o teleŋ.+ La wa ndu nyɔɔloo o piɛileŋ niŋ mɛɛ nyina diandaa chɔm nya yɛ.+ Le saboo hoo, la wa lahɔl, nduyɛ mi la wa ndu nyɔɔloo lɔɔlɔɔ o piɛileŋ niŋ le wanaa laalaŋnda* kpou. 19 La piɛi vɛlɛ Mɛlɛka le ya le mbo mala ya mi soo diomnda bɛnda laŋ. Okoŋ te I wa pɛ yooŋgu kɛndɔɔ dimioo a sɔɔŋ viaŋnaŋndoŋ okɔɔ, I nɔla mi soo a dialuŋ fulaa.+ 20 Mɛlɛka vem ya yooŋgu kɛndɔɔ hoo dimioo ni.+ Le yooŋgoo hoo nda wou ya o yɔlɔŋ ni. Lelaŋ, la piɛi Mɛlɛka le mi dimi ndu a dialuŋ fulaa.

21 Le sinaa la waa naŋ a ya okɔɔ, Tichikɔɔ,+ puaapilɛnɔ naa kaalaa, o cho wana wana nɔla ma tiindaŋ o wali Masanɔɔ niŋndo, cho nya lakɔ kona doonɔŋ kpou.+ 22 Le saboo hoo kpeekpei ya cho ndu viomɔɔ naa nya chua ni, le halikpeŋ mi la sina la waa naŋ a naa okɔɔ, nduyɛ mbo dɛɛniaa nya kɔltaŋ.

23 Maa Mɛlɛka Finya naa a Masanɔɔ Chiisu Kiliti tosa mi la nɔ kɔl nyuloo, mi la kaala acheleŋnda, nduyɛ mi la nɔ laalaŋndo. 24 Maa kɛndɛi bɛnduii Mɛlɛkɛi wa a wanaa kaala Masanɔ naa Chiisu Kiliti kaala kpeekpeiyo wa fɔ!