Kɔliŋtiaŋ Diiŋ Ndɔɔ

7 Lelaŋ, chaaŋaa niaa kaalaa, mɛɛ Mɛlɛka chuel naa buŋgaŋ muŋ yɛ,+ la ŋ dindiŋ niko naapila, miŋ malnuŋ nyɛ o nyɛ nɔɔliaa dialuŋ naŋ a yiyaŋnda naalaŋ.+ Koŋ tosa miŋ chɔɔlu diondɔɔ Mɛlɛka o hɔl le mɛɛ naŋ nɔ siooŋii nduɛi yɛ.

2 La chɔm naa kɔlta nyalaŋ.+ Ŋ tosal wana o wana suɛi wɔɔŋ te. Ŋ laasiaa wana o wana le, nduyɛ ŋ nuuviaa wana o wana tɔnɔ o ŋdial te.+ 3 O cho le nya pɛɛsa le ya dimi hei le, kanifuule I dimi niŋ paandu maa ŋ wa yoomu, ŋ wu, la cho o kɔlta naalaŋ niŋ. 4 I cho fɛɛsɛŋ le suɛi o nya lo. I nɔla mi kelu yoŋgaa tau o nya niŋ. A nyɛpalaa cho naa choo wo kpou, I sɔla kɔl dɛɛniaa a nyaaloo tau.+

5 Mɛɛ naŋ fuuluu Masidooniaa,+ fonda bɛɛ ŋ sɔla le pɛŋgioo le. Waŋnda wa naa simullo o nɛi o nɛi niŋ, nduyɛ ŋ wa buulaŋndo le kundala wanaa laalaŋnda. 6 Kɛ teleŋ Taitɔɔ hiŋndo, mi Mɛlɛka dɛɛniaa wanaa kɔlta tambɛiya+ kɔltaŋ ndo dɛɛniaa naa kɔltaŋ. 7 O cho ko le hunɔɔ ndɔɔ le, kɛ le kɔl dɛɛniaa o sɔla nya o ba wo. Mbo huŋ dimul naa mɛɛ nya cho a yeemɛi le ya chɔɔ yɛ, mɛɛ nya cho mɔnɛi biyɔɔ le ya yɛ, a mɛɛ nya cho buulaŋndo le ya yɛ. Lelaŋ, mi chɔɔlu nyaaloo dɔɔnɔŋ.

8 A yɔŋ bɛɛ mi tɛɛmbuu nya kɔltaŋ o yau ya poonyial nya wo niŋ,+ I tembu kɔl te. Ndoo yɔŋ bɛɛ aa mi tambu kɔl o tasela ndɔɔ (mɛɛ ya che maa le teleŋ biŋgi koni yau ya poonyial nya wo tɛɛmbuu nya kɔltaŋ ni), 9 suŋ suŋ niŋ I cho a nyaale. O cho ko le mɛɛ nya tambu kɔltaŋ yɛ le, kɛ le mɛɛ nya tambu kɔltaŋ mi la wookuŋ yɛ. Kanifuule, o nɛi Mɛlɛka hɛnaŋndo choo nya tambu kɔltaŋ ni. Lelaŋ, ŋ tosal nya nyɛ o nyɛ wɔɔŋ te. 10 Te waŋndo tambu pɛ kɔl le mɛɛ o tɛɛmbuu Mɛlɛka kɔl lɛ, koŋ tosa mbo wookuŋ le mbo sɔla pioŋɔɔ. Nduyɛ o kil iso kposoŋ te.+ Kɛ kɔllo tambei maa waŋnda o chieeŋndo niŋ tosa mi wana sɔla piɔmndo. 11 Kɔl nya tambu hoo o nɛi Mɛlɛka hɛnaŋndo choo wo, la nuawɔ se sɔɔŋ kɛndɛŋ o chuu nya woŋ! O tosa mi la dindi nyapila, mi la tul yɔŋ wɔɔŋndo leyɛ, mi la nɔ siooŋii Mɛlɛkɛi, nduyɛ mi la nɔ yeemɛi a sɛmbɔɔ le kaala wɔɔŋndaŋ siɛɛnduuwo.+ O nɛi o nɛi niŋ, mi la chɔm maa tɔɔyaŋ cho nya choo le suɛi hei le. 12 O cho le wana tosa suɛi wɔɔŋnde wo, ɔɔ le wana nda tosal suɛi wɔɔŋnde wo le ya poonyial nya le,+ kɛ le mi sɛmbɛ nya nɔ le naa nilaŋ yaŋɔɔ wo chɔmnuŋ nya tɛɛŋ kpendekele Mɛlɛka o hɔl. 13 Le saboo hoo naŋ sɔla kɔl dɛɛniaa ni.

Kɛ o fulawɔ o kɔl dɛɛniaa naŋ sɔla wo kɔɔli, miŋ naŋ kɔl tau le nyaale Taitɔɔ dɔɔnuŋndo, kanifuule mi la bii ndu nyɛkɛndɛi. 14 Nduyɛ siɔmbula bii ya le yoŋga ya kelu ndu o hɔl a nya okɔɔ wo le. Mɛɛ nyɛ o nyɛ naŋ dimul nya wo cho tonya yɛ, lende koni yoŋga naŋ kelu Taitɔɔ o hɔl lo cho tonya ni. 15 Te Taitɔɔ yiyaŋ pɛ mɛɛ nya kpou ke ndu bɛɛle yiŋgoloŋndeŋ, nduyɛ mi la chɛl sɔɔŋ o pɛɛku nya woŋ yɛ,+ mbo chɔɔlu kaalaa nɔ tau le nya. 16 I cho a nyaale, kanifuule I nɔla mi tiindaŋ nya o nyɛ o nyɛ niŋ.