Maatiu
28 Mɛɛ Paale Pɛŋgiaaleŋ le hiou, a teleŋ nyɔɔ kandu teŋgaa wo kinɛi, mi Meele Madaliŋ nda Meele wo o pilɔɔ huŋ sɛiyo tofaa+ o paale taseleŋ choo o lɔɔ bɛŋgu.
2 O lepilɛ niŋ kpe, mi lɛŋndeŋ le nyiiya tau tau. Kanifuule mi maalikɛinɔ Chɛhowa* wo fula o choo choo niŋ mbo huŋ faŋa pou wa o sɛiyo sondoo wo, mbo chal lechoo.+ 3 Wana ndoo che ndu pɛ aa nyɛ ŋualalɛiyo ni. Nduyɛ nyɛla wa ndu lekɔɔ laŋ la wa la humbu fo fo bɛndu.+ 4 Le hei, mi siooŋnde bii puaa chɔuwaa wa sɛiyo mandaa wa, ma nyiiya kpa kpa, nduyɛ ma yɔŋnuŋ maa wanaa vilɛi.
5 Kɛ mi maalikɛinɔɔ dimul waŋ laanduaa haa aa: “La yɔŋ isiooŋ te. Kanifuule, I sina maa Chiisu nda dii o yɔmndo choo wo nya cho nuuviaa ni.+ 6 O cho lɛ naŋ te. O miiŋgu yoomu a mɛɛ o dimi yɛ.+ La huŋ chɔ fondaŋ o wa o yambaa wo. 7 Okoŋ, mi la kuɛ chɔ chɔ mi la kɔ dimul buɛiyaa nduaa maa o miiŋgu yoomu. O cho nya pɔɔ kɔlaŋ lachi Kalili.+ La cho ndu lakɔ chɔ loŋ. Yooŋgoo hoo ya nɔ le nya ni.”+
8 Okoŋ, mi waŋ laanduaa haa faŋaŋ o sɛiyo* chɔ chɔ. Siooŋnde wa nda, kɛ a wa vɛlɛ a nyaale. Ma nyaanuŋ le ma kɔ doonuŋ buɛiyaa nduaa kona.+ 9 A lo kɔlaŋ, o lepilɛ niŋ kpe ma bɔŋaŋ nda Chiisu waa, mbo yil nda aa: “La wosɛ!” Ma sɔɔŋguu ndu ikɛi, ma saa ndu peloŋ le ndu bɛɛleŋ kioo.* 10 Mi Chiisu dimul nda aa: “La yɔŋ isiooŋ te! La kɔ dimul puaapiliaa niaa maa a kɔ Kalili. Loŋ nda cho ya lakɔ chɔ ni.”
11 Waŋ laanduaa haa wa wɔ nɛi tɛɛŋ, mi puaa chɔuwaa wa sɛiyo mandaa wa apum+ kua chiee ma kɔ dimul masaa wanaa soliaa lasalaa nyɛ o nyɛ yɔŋnuŋ. 12 Mɛɛ nda naŋgu nda laŋgbaa kalla a ndi okɔɔ, ma ke puaa chɔuwa kaniŋ humboŋ tau. 13 Ma dimul nda aa: “La dimi aa, ‘Ŋ wa o malɔ, mi buɛiyaa nduaa huŋ a nyumndaŋ ma chiimbuu dialuŋ ndɔŋ.’+ 14 La yɔŋ isiooŋ te. O yɔŋ bɛɛ mi Paile tuei a ndi okɔɔ, ŋ cho isɔɔ o ndu lo.” 15 Okoŋ mi puaa chɔuwaa wa sɛiyo mandaa wa bii kaniŋ humbuŋ muŋ, ma tosa mɛɛ nda dimul nda yɛ. Nduyɛ mi suɛi hei tiu Chuuwa tɛɛŋ silɔ haaa a paale hauleŋ ndeŋ.
16 Mi kiilaa 11 kua Kalili+ o pembii Chiisu dimi le ma kɔ chiikaŋ nde choo.+ 17 Mɛɛ nda che ndu, ma ke ndu bɛɛleŋ,* kɛ apum wa kiisaŋndo. 18 Mi Chiisu sɔɔŋguu nda ikɛi mbo dimul nda aa: “A ke ya kpaayaa nyɛ o nyɛ choo o choo choo niŋ a o lɛŋndeŋ choo.+ 19 Lelaŋ, la kɔ o ŋwaŋnda chiee lo ba o ba fee mi la siiŋguu nda buɛiyaa ni,+ mi la yiŋ nda+ o diola Finyaa niŋ, a Poo, vɛlɛ a nyina diandaa. 20 La pɛɛku nda le ma tosa nyɛ o nyɛ ya dimul nya le tosaa.+ Nduyɛ, la kɛsiŋ o kɔl maa I cho wa a nya latulu lepaa o lepaa haaa mi chieeŋndo fuuluu o mɛɛlulaŋ.”*+