Chɔɔsuaa
9 Mi masaa wa chɔŋ o pioo Chɔɔdaŋ ba paaleŋ le del lo+ mbo kua o lɛŋnde ŋpembuleŋ, tanda Siɛfila wo, lɛŋii holnuŋ Pee Bɛndu Mɛŋma Ihɛllo*+ ve, a o lɛŋnde Lebanɔŋ ndeŋ lachi wa kpou tuɛi a hei okɔɔ. Masaa haa cho masaa Hitaitiiya, Amɔluaitiiya, Kenanaitiiya, Pɛluisaitiiya, Hivaitiiya, a Chɛbusaitiiya+ ni. 2 Dimioo nuaa a tuei, ma tosa chɛlaŋndo le kɔlaŋ Chɔɔsuaa a Isɔluɛiya delɔɔ choo a sɔŋgɔɔ.+
3 Mi waŋnda Kibiɔŋ+ bɛɛ tuɛi a nyɛ Chɔɔsuaa tosa a Chɛluiko+ vɛlɛ a Eyai+ yo okɔɔ. 4 Le hei, ma tosa taasioo. Ma chua nyɛdiaa, ma wou o bɔlɔla siɔŋɛɛlaŋ niŋ ma kɛsi o sofɛliaa ndaa choo, a bɔlɔla mamuɛila siɔŋ ma suendi suendi laŋ latulu. 5 Ma chua kɔwɛila* siɔŋɛɛla nda suendi suendi laŋ a nyɛla yuululaŋ ma wounuŋ. Beedii* nda chua wo kpou bɛɛ wa o vesɛi, nduyɛ o wa o chuiinaŋ. 6 Okoŋ ma kua o Chɔɔsuaa lo o dɔɔŋgɔɔ Kikaa,+ ma dimul ndu a puaa Isɔluɛi aa: “Lɛŋnde naŋ chɛŋ ndeŋ, le cho levil a nanuŋ. Lelaŋ a yandii, la yii kpemaa a naa.” 7 Kɛ mi puaa Isɔluɛi dimul Hivaitiiya+ haa aa: “Kɛlɛŋgaa naa ikɛi pɛŋ nya cho ni. Vɛɛ naŋ nɔla yɛ miŋ yii kpemaa a nya?”+ 8 Ma mulul Chɔɔsuaa aa: “Buɛiyaa* numnda naŋ cho ni.”
Okoŋ, mi Chɔɔsuaa nyuna nda aa: “Wanaa maavɛɛ nya cho yɛ, nduyɛ kuɛɛ nya fula yɛ?” 9 Ma mulul ndu aa: “Lɛŋnde naŋ chɛŋ ndeŋ, le cho bɔɔ levil a nanuŋ.+ Bɛɛle naŋ nɔ le diola Chɛhowa Mɛlɛka numndo leŋ le tosa ni miŋ huŋ, kanifuule ŋ tuei ndu tɔɔ. Miŋ tuɛi a nyɛ o nyɛ o tosa o lɛŋnde Ichipi leŋ niŋ okɔɔ.+ 10 Miŋ tuɛi vɛlɛ nyɛ o tosal masaa ŋiɔɔŋaa Amɔluaitiiya o Chɔɔdaŋ ndaŋ leeloo* wo, Saihɔŋ Masaa le Hɛsibɔŋ,+ a Ɔku o wa Masaa le Baasiaŋ+ mbo wa ichali Asitalɔɔ wo. 11 Lelaŋ, mi wanaa naa banaa a waŋnda kpou o lɛŋnde naaleŋ niŋ dimul naa aa, ‘La chua nyɛdiaa le keiyo dioo o nɛi tɛɛŋ, mi la kuɛ o nda lo. La kɔ dimul nda aa: “Ŋ yeema miŋ wa buɛiyaa nyaa.+ Yandii, la yii kpemaa a naa.”’+ 12 Paale naŋ chɛŋ o naa lo le hunɔɔ leŋ, beediiyo* hoo wa o tuu kpɛi miŋ chua ndu. Kɛ la nuawɔ, o cho niŋ o vesɛi, nduyɛ o chuiinuŋ.+ 13 Nduyɛ, bɔlɔla mamuɛilaŋ ndaŋ la wa la sɛnɛi yuka miŋ duau muɛiyaŋ leniŋ. Kɛ laŋ bɛɛ la buuluu.+ Nyɛla naalaŋ a kɔwɛila naalaŋ kpou la siɔŋ a tiŋ vilɛi vilɛi naŋ buli hoo wo.”
14 Okoŋ, mi puaa Isɔluɛiya bii* nyɛdiaa ndaa o tiŋ, kɛ a nyuna Chɛhowa a ndi okɔɔ le.+ 15 Mi Chɔɔsuaa tosa chɛlaŋ kɔl nyuloo a nda.+ Mbo yii kpemaa a nda maa o cho nda malɔɔ ma wa yoomu. Simlachiaa Isɔluɛiya kpou bɛɛ, ma chua buŋgɛi hei nduyɛ ma mɛnaŋ o nda lo.+
16 Mɛɛ nda chii kpemaa yii a nda, palɛi i yaa okoŋ kɔɔli, ma tuɛi maa nda ikɛi kpɛɛluŋ nda cho ni, a ve levil te. 17 Okoŋ, mi Isɔluɛiya chaŋ le kɔlaŋ o chieeŋ ndaŋ, nduyɛ ma fuuluu o paale yaa ndɔ leŋ choo. Chieeŋ ndaŋ muŋ wa muŋ ni, Kibiɔŋ,+ Kɛfiluaa, Biaalɔti, a Kiliaati-chiaaluim.+ 18 Kɛ Isɔluɛiya del nda choo le. Kanifuule, simlachiaa ndaa chii niŋ waŋnda Kibiɔŋ buŋgɛi chuel nduyɛ ma mɛnaŋ o Chɛhowa lo,+ Mɛlɛka Isɔluɛiya. Le hei, mi waŋnda Isɔluɛi kpou kandu ŋɔɔchiaŋndo a simlachiaa okɔɔ. 19 Okoŋ, mi simlachiaa dimul Isɔluɛiya kpou aa: “Mɛɛ naŋ chii niŋ waŋnda haa buŋgɛi chuel miŋ mɛnaŋ o Chɛhowa, Mɛlɛka Isɔluɛiya lo yɛ, ŋ nɔ lɛ di miŋ yɔŋ nda nyɛ o nyɛ le. 20 Kɛ nyɛ naŋ nɔ miŋ tosa wo cho hoo ni: Ŋ cho nda malɔɔ ma wa yoomu, yɔŋii Mɛlɛka dɔɔnuŋ tumbe a naa. Kanifuule, ŋ chii nda niŋ buŋgɛi chuel, miŋ mɛnaŋ.”+ 21 Mi simlachiaa dimi vɛlɛ aa: “Ŋ yɔŋnuŋ nda nyɛ le. Kɛ nda cho niŋ wa yɔmnde tiŋgɔɔ a mɛŋndaŋ kɔndɔɔ le waŋnda Isɔluɛi ni.” Nyɛ simlachiaa kɛɛsiaa le nda wo cho koŋ ni.
22 Mi Chɔɔsuaa veelu nda mbo dimul nda aa: “Le yɛɛnɛ nya hui yɛ naa mi la dimi aa, ‘Fondaŋ naŋ fula wo o cho bɔɔ levil a nya,’ mi che bɛɛ naa ikɛi kpɛɛluŋ nya cho ni?+ 23 Chɔŋ a hau mbo kuɛ kɛ, sendioo cho nya choo,+ nduyɛ chiaa nya cho wa ni. Nya cho wa yɔmnde tiŋgɔɔ a mɛŋndaŋ kɔndɔɔ le chiɛi Mɛlɛka nuu ni.” 24 Ma dimul Chɔɔsuaa aa: “Le mɛɛ naŋ tuei maa mi Chɛhowa Mɛlɛka numndo dimul buɛi ndɔɔ Muuse maa o cho nya lɛŋndeŋ ndeŋ kpou ke, nduyɛ mi la diu wanaa cho leniŋ nda kpou yɛ naŋ tosa hei ni.+ Ŋ wa buulaŋndo le yoomula naalaŋ,+ kanifuule siooŋnde wa naa le nya.+ 25 Ŋ cho num niŋ o ba. Tosal naa nyɛ o nyɛ ŋ yiyaŋ pɛ maa o bɛnda, mbo wa sakpo.” 26 Nduyɛ, lende o tosa a nda ni. Mbo piŋi nda Isɔluɛiya o ba, a dii nda le. 27 Kɛ chɔŋ a paale leŋ, mi Chɔɔsuaa ke nda wallo le yɔmnde tiŋgɔɔ a mɛŋndaŋ kɔndɔɔ le Isɔluɛiya.+ Ba o ba Chɛhowa ndoo hɛli vɛlɛ pɛ le mi bandu luamaa lasala ndɔɔ wa loŋ, nda ndaa tosa wallo hoo loŋ ni.+ Nduyɛ haaa a paale hauleŋ ndeŋ, wali koŋ nda cho tosaa ni.+