Chɔŋ

5 Okoŋ kɔɔli, bɔŋaŋ Chuuwa wa Chulusalɛm,+ nduyɛ mi Chiisu bɛɛ kua loŋ. 2 Mɛŋma tiilaŋndaŋ ma wa Chulusalɛm loŋ o Dio Kpaki Saa Luɛiyo+ ikɛi, ma veelu maŋ o Hibuluiye niŋ aa Bɛtisata. Nduyɛ toŋgolaŋ la wa maŋ ikɛi la ŋuɛɛnu. 3 Wanaa sumɛiya, wanaa bɛvɛiya, wanaa pelei ɔɔ baa vi wa, a wanaa lanaa suu o suu wa ihini loŋ. 4* —— 5 Kɛ poo pum wa loŋ, ndoo chii niŋ wɔsilaŋ 38 a naa. 6 Mɛɛ Chiisu che poo hoo ihini loŋ, nduyɛ mbo sina maa o viou niŋ tau a naa, mbo nyuna ndu aa: “A yeema ma seŋgu?”+ 7 Mi po wa a naa wo mulul ndu aa: “Fallo, I nɔ wana o wana tusi ya o mɛŋndaŋ niŋ teleŋ ma wa muulɔŋndo wo le. Nduyɛ te I chɛŋ pɛ le tolɔɔ, wana cheleŋ kelu ya lachi.” 8 Mi Chiisu dimul ndu aa: “Chɔŋ ma chua wala numndo ma kuɛŋnuŋ!”+ 9 O lepilɛ niŋ kpe, mi poo hoo siaŋgu, mbo chua wala ndɔɔ mbo kandu kɔŋndaŋ.

O Paale Pɛŋgiaaleŋ choo hei yɔŋnuŋ ni. 10 Okoŋ mi Chuuwa kandu po nda siŋgi hoo wo dimullo aa: “Paale Pɛŋgiaaleŋ le cho hau ni. Lelaŋ, o bɛnda ma kuɛ a walaa o ba le.”+ 11 Kɛ mbo mulul nda aa: “Wana siŋgi ya wo dimul la ni aa: ‘Chua wala numndo ma kuɛŋnuŋ.’” 12 Ma nyuna ndu aa: “Nɛɛnɛ dimul lɛ num aa, ‘Chua ndu ma kuɛŋnuŋ’?” 13 Kɛ poo hoo ndoo sina wana siŋgi ndu wo le, kanifuule Chiisu ndoo luɛinuŋ niŋ faŋga wa loŋ ndo tɛɛŋ.

14 Okoŋ kɔɔli, mi Chiisu cha poo hoo o chiɛi Mɛlɛkaa niŋ. Mbo dimul ndu aa: “Mɛɛ ŋ seŋgu nuaa yɛ, tosa lɛ haki le pa, yɔŋii suɛi wɔɔŋii cheleŋ komal num mbo hiou hei.” 15 Mi poo hoo kua, mbo kɔ dimul Chuuwa maa Chiisu siŋgi ndu ni. 16 Le hei, mi Chuuwa loolaŋ Chiisu le mɛɛ o wa sɔɔŋ muŋ tosaa o Paale Pɛŋgiaaleŋ choo yɛ. 17 Kɛ mi Chiisu dimul nda aa: “Finya nuu cho wɔ hiouwɔɔ lachi a wallo tosaa huŋ bii a hau. Nduyɛ ya bɛɛ, I cho wɔ hiouwɔɔ lachi a wallo tosaa.”+ 18 Le saboo hoo Chuuwa kandu nɛilaŋ nuuviaa ni le Chiisu diyɔɔ. Kanifuule, ma yiyaŋ maa o cho sawa Paale Pɛŋgiaaleŋ tɛɛmbuuwo, mbo veelu vɛlɛ Mɛlɛka aa Finya ndɔ.+ Nduyɛ mbo chɔm maa a sulaŋ nda Mɛlɛka.+

19 Okoŋ, mi Chiisu dimul nda aa: “A tonya mi dimul nya, Poo nɔla mbo tosa nyɛ o nyɛ a ba ndɔ le, mɛɛ nyɛ o cha Finya ndɔ tosaa wo.+ Sɔɔŋ Finyaa tosa woŋ, muŋ koni Po ndɔɔ bɛɛ tosa ni. 20 Finyaa kaala Po ndɔɔ,+ nduyɛ mbo chɔm ndu sɔɔŋ o tosa woŋ kpou. O cho ndu chɔm walta hiou laŋ ndaŋ le mi kɔndɔfillo bii nya.+ 21 Mɛɛ Finyaa miŋgi wanaa vi wa yoomu yɛ,+ Po ndɔɔ bɛɛ, wana o wana o yeema pɛ o miŋgi ndu yoomu.+ 22 Finyaa kɔɔsa a wana o wana le. Kɛ o ke Po ndɔɔ dioo le mbo kɔɔsa a waŋnda kpou,+ 23 le mi nda kpou ke Po ndɔɔ bɛɛleŋ mɛɛ nda ke Finyaa bɛɛleŋ yɛ. Wana o wana ke Po ndɔɔ bɛɛleŋ te, mɛɛ Finya ndɔ vem ndu wo o kɛɛ koŋ bɛɛleŋ kioo ni.+ 24 A tonya mi dimul nya, wana o wana tuei pɛ nyɛ ya dimi wo, nduyɛ mbo laalaŋ wana vem ya wo, o cho yoomu fafɛɛŋndo sɔla.+ A kɔɔsa niŋ a ndu le, kɛ wana koŋ cho ko maa wana ndoo vi mbo wa niŋ yoomu wo.+

25 “A tonya mi dimul nya, teleŋ cho fuuluu, nduyɛ o fuuluu niŋ bɛɛ, mi wanaa vi wa tuei Po Mɛlɛkaa diomndo. Nduyɛ, wanaa yaŋ ndu nilaŋ nda cho miiŋgu yoomu. 26 Finyaa nɔ kpaayaa le yoomoo yɔŋgoo.+ Nduyɛ Po ndɔɔ bɛɛ, o ke ndu kpaayaa le yoomoo yɔŋgoo.+ 27 O ke ndu kpaayaa le waŋnda kɔɔsaa,+ kanifuule ndu cho Po wanachioo ni.+ 28 Kɔndɔfili bii nya a hei le, kanifuule teleŋ cho fuuluu mi wanaa cho o sɛila loonaŋndaŋ niŋnda kpou tuei diom ndɔɔ,+ 29 okoŋ ma fula. Wanaa tosa sɔɔŋ kɛndɔŋ nda cho miiŋgu yoomu ma wa achal. Kɛ wanaa tosa sɔɔŋ wɔɔŋndoŋ nda cho miiŋgu yoomu ma kɔɔsa a nda.+ 30 I nɔla mi tosa nyɛ o nyɛ a ba ni le. Mɛɛ Finya nuu dimul la yɛ, lende ya kialu yamɛi ni. Nduyɛ yamɛi nii cho sakpo,+ kanifuule o cho hɛnaŋ ni le ya tosa le, kɛ hɛnaŋ wana vem ya wo.+

31 “Te ya kinɛi yaa timbi seileŋ a yapila okɔɔ ni, seile nileŋ le ve wa tonya le.+ 32 Wana cheleŋ cho o timbi seileŋ a ya okɔɔ wo. Nduyɛ I sina maa seile o timbi a ya okɔɔ leŋ le cho tonya.+ 33 La vem waŋnda o Chɔŋ lo, mbo timbi seile tonyaleŋ a ya okɔɔ.+ 34 Kɛ nduyɛ, I heu ba le mi wanachiee timbi seileŋ a ya okɔɔ le. Kɛ le mi la sɔla yoomoo ya dimi sɔɔŋ muŋ ni. 35 Chɔŋ wa ko maa lambui wa biyɔɔ mi nyɔɔ wa teŋgaa wo. Nduyɛ le teleŋ biŋgi, la wa a nyaaloo tau o nyɛ teŋgaa ndɔɔ niŋ.+ 36 Kɛ seile nileŋ le hiou poloŋ a seile Chɔŋ timbi a ya okɔɔ leŋ, kanifuule walta Finya nuu ke ya le tosaa laŋ, laŋ ya cho tosaa ni. Nduyɛ laŋ la chɔm ni maa Finya nuu vem ya ni.+ 37 Finya ni vem ya wo bɛɛ, mi ndupila timbi seileŋ a ya okɔɔ.+ Kani bɛɛ la tuiyɔ diom ndɔɔ, kɛlɛŋgaa mi la che mɛɛ o cho yɛ le.+ 38 Nduyɛ diom ndɔɔ chel nya o lakɔl te, kanifuule la laalaŋ wana o vem ndo le.

39 “La cho yaasiaa o Yau Mɛlɛkaa niŋ,+ kanifuule la yiyaŋ maa leniŋ nya cho yoomu fafɛɛŋndo sɔla ni. Nduyɛ ndu* kpeekpei timbi seileŋ a ya okɔɔ ni.+ 40 A koŋ kpou, la yeema mi la hiŋ naa ya chua,+ mi la sɔla yoomoo le. 41 I heu ba le mi waŋnda chieeya saŋgala ya le. 42 Nduyɛ I sina kpendekele maa la nɔ kaala Mɛlɛkaa nya o lakɔl te. 43 I hiŋ o diola Finya nuu niŋ, kɛ la chɛl la le. Te wana cheleŋ hiŋ pɛ a ba ndɔ, koŋ ndu la chɛl ndu. 44 Vɛɛ nya nɔla yɛ mi la laalaŋ ya, te la wa pɛ saŋgaliaŋndo nyapila tɛɛŋ, kɛ la kindiŋ le saŋgalaa sɔlaa Mɛlɛka tonyaa o ba le?+ 45 La yiyaŋ nuaa maa I cho nya loli o Finya nuu lo le. Wana cho nya loli wo cho Muuse ni,+ o nya dɔu tiindaŋndo o ndu niŋndo. 46 Nduyɛ te nyaa laalaŋ pɛ Muuse, mɛɛ la wa ya laalaŋ, kanifuule mbo poonyiaa a ya okɔɔ.+ 47 Kɛ te la laalaŋ nyɛ o poonyiaa wo le, vɛɛnɛ nya laalaŋ yɛ niŋ nyɛ ya dimi wo?”