Saamiɛɛ Tasoo
30 Mɛɛ Deeve nda puaa nduaa miiŋgu Sikila+ o paale yaa ndɔleŋ choo, a komal niŋ Amalɛkaitiiya+ del kumbuii ba tou wo* a Sikila choo, okoŋ ma mal Sikila o yiŋ. 2 Ma biu biu waŋ laanduaa+ a wana o wana wa loŋ, chuaambɔ ni, kaasoŋnɔ ni. Kɛ a dii wana o wana le. Ma chua nda, ma kuaŋnuŋ a nda. 3 Mɛɛ Deeve nda puaa nduaa fuuluu, a komal chioo o ŋualɛi. Nduyɛ mi Amalɛkaitiiya kuaŋnuŋ a landaa ndaa, puaa ndaa, a chuauwaa ndaa laanduaa kpou. 4 Okoŋ mi Deeve nda puaa nduaa kandu chaŋndo choo choo kpeleŋ, nduyɛ a lo chaŋndo haaa mi yoomuaŋ ma chuu nda fo. 5 Laandaa ŋiɔɔŋaa Deeve wa bɛɛ, Ahinowam fulaa Chɛsiluɛɛ, a Abikɛɛ fulaa Kamɛl, lanɔ Nabal mɛiyo, ma kuaŋnuŋ a nda.+ 6 Mi Deeve tambu kɔl tau, kanifuule puaa nduaa wa dimioo le ndu vii viiyo a poutaŋ. Nduyɛ, nda kpou wa a kɔlta tambɛilaŋ le mɛɛ nda kuɛŋnuŋ a puaa ndaa vɛlɛ a chuauwaa ndaa laanduaa yɛ. Kɛ mi Deeve muliŋ o Chɛhowa Mɛlɛka ndɔɔ lo, mbo sɔla yoomuaŋ.+
7 Okoŋ mbo dimul Abiaata+ wana soliaa lasalaa, po Ahimɛlɛki wo aa: “A yandii, huŋ a doma biŋgioo* nanuŋ.”+ Mi Abiaata kua a doma biŋgioo naa Deeve chua. 8 Mi Deeve nyuna Chɛhowa aa:+ “Baa I tisa wanaa huŋ del naa haa choo wa kɔɔli? Baa I bendal nda niŋ pa?” Mbo muli aa: “Ei, tisa nda kɔɔli. A cho nda bendal, nduyɛ nyɛ o nyɛ nda chua, ma poondiaa nda o laba.”+
9 O lepilɛ niŋ kpe, mi Deeve mal a puaa 600+ wa a ndu latulu wa, ma kua haaa o Kpoloŋndo* Bɛsɔɔ. Nduyɛ mi puaa nduaa apum lo loŋ. 10 Mi Deeve a puaa nduaa 400 hiau lachi a nda kiltaŋ kɔɔli, kɛ puaa nduaa 200 wa a saŋgɛiya yɔkɔɔ, nduyɛ a nɔla ma hiou Kpoloŋndo Bɛsɔɔ le. Le hei, ma loŋnuŋ loŋ.+
11 A lo kɔlaŋ ma saaluŋ po Ichipiaŋnɔɔ, ma huŋ a ndu naa Deeve chua. Ma ke ndu nyɛdiaa mbo dia, nduyɛ ma ke ndu mɛŋndaŋ mbo kol. 12 Ma ke ndu vɛlɛ beedii* mafikiiyo nyɛɛmbɔ a beedii makilepiiyo kpuŋgbaŋ ŋ muuŋ. Mɛɛ o chii dio, mbo miiŋgu yoomuaŋ sɔla, kanifuule le palɛi i yaa a nyumndaŋ ma yaa o di nyɛdiaa kɛlɛŋgaa mbo kol te. 13 Mi Deeve nyuna ndu aa: “Buɛi nɛɛnɛ ŋ cho yɛ, nduyɛ kuɛɛnɛ ŋ fula yɛ?” Mbo muli aa: “Ichipiaŋnɔɔ ya cho ni, buɛi po Amalakaitiinɔ pilɛ. Kɛ o cho niŋ hau le palɛi i yaa mi del a naa. Lelaŋ masanɔ nuu mal la ni. 14 Miŋ del Kɛluitaitiiya+ choo ba tou wo* a tanda Chuda wo Kelɛbi+ ba tou wo, nduyɛ miŋ mal Sikila o yiŋ.” 15 Okoŋ mi Deeve nyuna ndu aa: “A nɔla pa ma kɔ chɔm ya naa wanaa puŋga nyɛm naŋ nda cho wa?” Mbo muli aa: “Te a mɛnaŋ pɛ a Mɛlɛka maa a cho ya diyɔɔ le, nduyɛ maa a cho ya malɔɔ masanɔ nuu o ba le, mɛɛ I cho lakɔ a num naa wanaa puŋga nyɛm nyaŋ nda cho wa.”
16 Okoŋ, mbo kua a ndu o tanda nda wa a tiuwaa kpou wo niŋ. A wa diolaŋ ma kol, nduyɛ ma tosa dunyɛi le nyɛm nda puŋga o lɛŋnde Filitiaa leŋ niŋ a o lɛŋnde Chuda leŋ niŋndoŋ. 17 Mi Deeve kandu nda diu diuwo chɔŋ a ditɛɛŋ paale siaa haaa mi paaleŋ le del doŋ. Wana pilɛ bɛɛ heluŋ te,+ mɛɛ puaa 400 nyaanuŋ o nyɔɔmiaa choo wa. 18 Nyɛ o nyɛ Amalɛkaitiiya ndaa chua, mi Deeve poondiaa nda muŋ o laba kpou.+ Nduyɛ, mbo piŋi vɛlɛ laandaa nduaa ŋiɔɔŋnda. 19 Nyɛm ndaŋ o pilɛ bɛɛ luusiaŋ te, o pɔmbɔ ni, o bɛndu ni. Ma miŋgi puaa ndaa, chuauwaa ndaa laanduaa, a nyɛm ndaŋ nda puŋga woŋ kpou sɔla.+ Nyɛ o nyɛ ndaa chua, mi Deeve miŋgi muŋ poondiaa kpou. 20 Mi Deeve chua saa, chuiŋnda, a nauwaa Amalɛkaitiiya kpou, okoŋ ma simi nda chɔluaa ndaa lachi. Ma dimi aa: “Nyɛm Deeve poondiaa woŋ cho muŋ ni.”
21 Okoŋ mi Deeve miiŋgu o Kpoloŋndo Bɛsɔɔ.+ Loŋ puaa 200 wa a saŋgɛi yɔkɔɔ wa a wa ni. Puaa haa ndaa loŋnuŋ kɔɔli ni, kanifuule a tiu lɛ ba le ma kuɛ latulu a Deeve le. Okoŋ ma chaŋ, ma kua Deeve a wanaa wa latulu a ndu wa lachi. Mɛɛ Deeve sɔɔŋguu nda ikɛi, mbo nyuna nda te a cho pɛ kɛndɛ. 22 Kɛ mi wanaa sɔŋgbɔɔŋnda a wanaa fonduaa o puaa kuɛ a Deeve latulu wa tɛɛŋ dimi aa: “Le mɛɛ nda kue a naa latulu le yɛ, ŋ cho nda nyɛ o nyɛ ke o nyɛm naŋ puŋga woŋ choo le. Laandaa ndaa a puaa ndaa kinɛi naŋ cho nda ke ni ma kuɛŋnuŋ.” 23 Kɛ mi Deeve dimi aa: “Puaapiliaa niaa, la nɔ mi la tosa hei a nyɛm Chɛhowa ke naa woŋ te. Ndu manda naa ni, nduyɛ wanaa huŋ del naa choo ma poondiaa nyɛm naŋ nda bɛɛ, ndu mal nda naa o ba ni.+ 24 O nɛɛnɛ kpeekpei chɛllɛ nyɛ nya dimi hoo wo? Wanaa kuɛ o chɔuwo wa ni, a wanaa lo wolɔɔlaŋ ikɛiya, kpeŋkpeŋ naŋ cho nyɛm naŋ poondiaa woŋ piɔu ni.+ Wana o wana nɔ mbo sɔla.”+ 25 Chɔŋ a paale leŋ haaa huŋ bii a paale hauleŋ ndeŋ, mi nyɛ Deeve dimi koŋ ndo simnuŋ sawaa o Isɔluɛi niŋ.
26 Mɛɛ Deeve miiŋgu Sikila, mbo chua nyɛm nda poondiaa woŋ ŋ tiŋ mbo yoo waŋ banaa o Chuda niŋ a wa chaaŋaa nduaa wa. Mbo dimul nda aa: “Nyɛm naŋ puŋga yaamɔɔwaa Chɛhowa wa o ba woŋ, ŋ nyaŋ cho muŋ ni.” 27 Mbo chua ŋ tiŋ, mbo yɔŋ waŋnda o Bɛtɛl+ niŋ, a haa Luamɔti o Nɛkɛbi niŋ, haa o Chatɛɛ+ niŋ, 28 haa o Aloya niŋ, haa o Sifimoti niŋ, haa o Ɛsitɛmɔɔ+ niŋ, 29 haa o Lueka niŋ, haa o chieeŋ bɛndoŋ niŋ Chɛluamɛɛ,+ haa o chieeŋ bɛnduŋ Kenaitiiya+ niŋ, 30 haa o Hɔɔma+ niŋ, haa o Boluasiaŋ niŋ, haa o Ataki niŋ, 31 haa o Hɛbulɔŋ+ niŋ, vɛlɛ a haa o fondaŋnda kɛ kɛ Deeve nda puaa nduaa kei paandu.