Maki
11 Mɛɛ nda wa fuuluuwo Chulusalɛm, Bɛfee a Bɛtani ikɛi+ o Pembii Ɔlifii Ve, mbo viam buɛiyaa nduaa a ŋiɔɔŋ.+ 2 Mbo dimul nda aa: “La kɔ o sɔndɔkɔlɔɔ hoo nya lachi. Te la fuuluu dɔɔ pɛ, la cho chɔ sofɛlɛ wana o wana chellɔ lechoo le wo o baa. La timbi ndu mi la chuu ya. 3 Te wana nyuna nya pɛ aa, ‘Le yɛɛnɛ nya cho yɛ ndu timbioo?’ la dimul ndu aa, ‘Masanɔɔ hau ba a ndu, o cho ndu miŋgi naŋ suŋ suŋ.’” 4 Mɛɛ nda kuɛ, ma komal sofɛlɔɔ o baa o dio o nɛiyo daŋgala. Okoŋ ma timbi ndu.+ 5 Mi wanaa wa isisi loŋ nda apum nyuna nda aa: “Le yɛɛnɛ nya cho yɛ sofɛlɛ koŋ timbioo?” 6 Ma dimul nda mɛɛ Chiisu dimul nda yɛ, okoŋ ma mal nda ma kuaŋnuŋ.
7 Ma kua a sofɛlɔɔ+ naa Chiisu chua, okoŋ ma pɛŋgɛliaa domala ndalaŋ sofɛlɔɔ o kɔɔ, mi Chiisu chal lechoo.+ 8 Mi wanaa bɔɔbɔɔ pɛŋgɛliaa domala ndalaŋ o nɛi. Kɛ mi apum bɛɛsiaa lɛuwuŋ yɔmnde o nɛiyo daŋgala.+ 9 Mi wanaa wa ndu kɔlaŋ lachi wa, a haa ndu kɔɔli wa deŋioo choo choo aa: “Mɛlɛka, piŋi ndu fɔ!+ Salaa cho le wana hiŋ hoo o diola Chɛhowa* laŋ niŋndo!+ 10 Dɔu Masale cho hunɔɔ leŋ sala, Masale finya naa Deeve leŋ!+ Mɛlɛka, piŋi ndu fɔ, num cho hoo o choo choo niŋndo!” 11 Mɛɛ o luɛi Chulusalɛm, mbo kua o chiɛi Mɛlɛkaa niŋ, mbo mɛɛndaŋ nyɛ o nyɛ fee. Kɛ le mɛɛ teleŋ ve lɛ le yɛ, mbo kuaŋnuŋ Bɛtani nda kiilaa 12 nda.+
12 Diimandɔɔ mɛɛ nda wa faŋaŋndo Bɛtani, yiaaŋ ma wa ndu nɛiyo.+ 13 O lo landaŋ mbo cha yɔm mafikiiyo o puiyaa. Mbo kua tofaa te o saaluŋ niŋ pɛ nyɛ lechoo le mbo de. Kɛ mɛɛ o fuuluu, o chi komɔɔ lechoo le, mɛɛ pei. Kanifuule, o ve teleŋ yɔm mafikiiyo kom te. 14 Mbo dimul yɔmndo aa: “Fɛɛŋ bɛɛ wana di lɛ komɔɔ num te.”+ Nduyɛ buɛiyaa nduaa wa nilaŋ yaŋɔɔ.
15 Mɛɛ nda fuuluu Chulusalɛm, mbo luɛi o chiɛi Mɛlɛkaa niŋ. Mbo kandu wanaa wa nyɔɔŋ pisioo a piinduuwo o chiɛi Mɛlɛkaa niŋnda touwɔɔ. Mbo nyiinduu tibiila* wanaa wa kanioŋ* siŋgaa wa, a kpeŋgbeila* wanaa wa kaŋgbuaa pisioo wa.+ 16 Nduyɛ o chɛllɛ mi wana o wana keeku a nyɛ o nyɛ o luŋ chiɛi Mɛlɛkaa le. 17 O wa nda pɛɛkoo mbo dimul nda aa: “I cho i poonyiaa aa, ‘A veelu niŋ chiɛi nuu aa chiɛi lepiɛiyo le kaalaŋ kpou,’+ kɛ mi nya siiŋguu ndu buulu viiya.”+ 18 Mɛɛ masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda tuei a ndi okɔɔ, ma kandu nɛilaŋ nuuviaa le ndu diyɔɔ.+ Kɛ siooŋii nduɛi wa nda, kanifuule waŋnda kpou kɔndɔfillo wa nda a mɛɛ ndoo pɛɛku yɛ.+
19 A paale delaaleŋ, ma faŋaŋ chiee ma kuaŋnuŋ. 20 Kɛ idiiyo puŋ, mɛɛ nda wa miiŋgoo, ma cha yɔm mafikii koŋ o vesɛi chɔŋ o puundoŋ mbo hel di.+ 21 Mi Pitɛ loonuŋ yɔm kalaa, mbo dimul ndu aa: “Luabai, tofawɔ! Yɔm mafikii ŋ mɛna maa fɛɛŋ bɛɛ wana di lɛ komɔɔ ndɔ le wo, o vesa.”+ 22 Okoŋ mi Chiisu dimul nda aa: “La nɔ laalaŋndo o Mɛlɛka niŋ. 23 A tonya mi dimul nya, wana o wana dimul pɛ pembei hei aa, ‘Suŋguŋ ma kɔ del o pee mɛŋma ihɛllo niŋ,’ mbo nɔ kiisaŋ o kɔl te, nduyɛ mbo nɔ laalaŋndo maa nyɛ o dimi wo nɔ le yɔŋnɔŋndo, o nɔla mbo yɔŋnuŋ.+ 24 Lelaŋ ya dimul nya ni maa, nyɛ o nyɛ nya piɛi pɛ le ndu, la nɔ laalaŋndo maa la chii ndu sɔla, nduyɛ maa la cho ndu sɔla.+ 25 Te la sim pɛ piɛileŋ, la mal wanaa tosal nya yɔŋ wɔɔŋndo wa haki. Okoŋ, Finya nya cho o choo choo niŋndo bɛɛ nɔla mbo mal nya haki le yɔŋnda nyala wɔɔŋndaŋ.”+ 26* ——
27 Ma miiŋgu vɛlɛ Chulusalɛm. Mɛɛ o wa balɔɔ o luŋ chiɛi Mɛlɛkaa, mi masaa wanaa soliaa lasalaa, wanaa pɛɛku waŋnda sawala Mɛlɛkalaŋ nda, a laŋgbaa kalla huŋ naa ndu chua. 28 Ma nyuna ndu aa: “A kpaaya nɛɛnɛ ŋ cho yɛ sɔɔŋ muŋ tosaa? Nɛɛnɛ ke yɛ num kpaayaa hoo le sɔɔŋ muŋ tosaa?”+ 29 Mi Chiisu dimul nda aa: “I nyuna wɔ nya. Te la mulul la pɛ, mɛɛ ya bɛɛ I chɔm nya wana ke ya kpaayaa le sɔɔŋ muŋ tosaa wo. 30 Nɛɛnɛ ndoo vem yɛ Chɔŋ le waŋnda yiŋɔɔ?+ Mɛlɛka ɔɔ waŋnda chieeya? La mulullɔ ya.”+ 31 Ma kandu suukaŋndo ndapila tɛɛŋ aa: “Te ŋ dimi pɛ aa, ‘Mɛlɛka,’ o cho naa dimul aa, ‘Mɛɛ le yɛɛnɛ la laalaŋ a nyɛ o wa nya dimullo wo le?’ 32 Kɛ baa miŋ dimi aa, ‘Waŋnda chieeya’?” A wa siooŋii faŋgaa, kanifuule waŋnda kpou ndaa chua Chɔŋ maa wana ndoo suaa le Mɛlɛka wo kɛsɛ o wa ni.+ 33 Okoŋ, ma mulul Chiisu aa: “Ŋ sina le.” Mi Chiisu bɛɛ dimul nda aa: “Mɛɛ ya bɛɛ I cho nya chɔm wana ke ya kpaayaa le sɔɔŋ muŋ tosaa wo le.”