Sam
O wana sim lachi le chondei yo lo. Chondii Deeve ve.
19 Choo choo cho yondaa a tɔɔmayɛi Mɛlɛkɛi okɔɔ,+
Mi halaa* wa yondaa a walta o tosa a bala ndɔlaŋ ndaŋ okɔɔ.+
2 Lepaa o lepaa, nyɔɔŋ muŋ cho suɛi a ndu okɔɔ,
Nduyɛ ichɔl o ichɔl, miŋ chɔm kɔl kalu ndɔɔ.
3 Nyɔɔŋ muŋ suu le,
Nduyɛ wana tuii muŋ diom te.
4 Kɛ o lɛŋndeŋ choo kpou, mi diomnda wanaa dimi yooŋgoo wa tiu,
Nduyɛ yooŋgu nyɔɔŋ muŋ cho o tiuwaa o lɛŋndeŋ choo kpou.+
O kindu tɛndiiyo o choo choo niŋ le paaleŋ.
5 Te le wa pɛ fulaa, le wa ko mɛɛ wana wa lanɔɔ chuaa wo wa fulaa o chiɛi nda toosiaa ndu wo niŋ yɛ.
Mi le dɔɔnuŋ nyaale mɛɛ wana kpaaya bɛndoo duaunuŋ nuaa nyaale yɛ te o wa pɛ nyaanɔŋndo.
6 Te le chɛŋ pɛ o halaa niŋ kumbuei i pilɛ,
Le kɔ del o mɛɛlulaŋ kumbuei i pilɛi,+
Nduyɛ nyɛ o nyɛ viŋnuŋ haŋgul ndɔɔ le.
7 Sawala Chɛhowa laŋ la cho walaŋ,+ mi la miŋgi waŋndo yoomuaŋ luei.+
Silala Chɛhowa laŋ la cho nyɛ wana tiindaŋ,+ mi la tosa mi wana nɔ taasi le wo sɔla taasioo.+
8 Nɛila chɔmaala Chɛhowa laŋ la cho sakpo, mi la tosa mi waŋndo dɔɔnuŋ nyaale.+
Sawala Chɛhowa laŋ la cho la diandaa, mi la tosa mi waŋndo che walaŋ.+
9 Siooŋii Chɛhowa ve+ naŋ, nduyɛ i cho le fɛɛŋ a fɛɛŋ.
Yamaŋ Chɛhowa kialu woŋ cho tonya, teleŋ o teleŋ ŋ cho sakpo.+
10 Ŋ cho ŋ sɔvɛ mbo hiau kooliiye.
Ŋ hiou koolii kɛndɛ kɛndɛi* naŋɔɔ,+
Nduyɛ ŋ yeela ŋ hiou liaaŋ,+ lɛma wa delioo o waa maliɔɔ niŋndaŋ.
11 Sawala numndaŋ la sila buɛi numndo ni.+
Nduyɛ te o bii laŋ pɛ, o sɔla tɔnɔɔ tau.+
12 O nɛɛnɛ sina yɛ biondɔŋnda ndupila tosa laŋ?+
Mal la haki le hakila ya tosa I ve o sina choo le laŋ.
13 Chɛl mi ya buɛi numndo chua kaa heelaŋndo le.+
Chɛl mi kaa heelaŋndo nɔ ya kpaayaa choo le.+
Mɛɛ o hei niŋ, I cho nɔ sɔŋ o sɔŋ te,+
Nduyɛ tɔɔyaŋ ve lɛ ya choo le hakila wɔɔŋ wɔɔŋndaŋ te.
14 Oo Chɛhowa, num cho Pou Kpoowa nuu+ a Wana Ni Piŋiaa ni.+
Maa nyɛ ya dimi wo a nyɛ ya yiyaŋ o kɔl nuu niŋndo nɛŋi num kɔllo fɔ!+