Malakai

1 Yooŋgoo:

Nyɛ Chɛhowa dimul Malakai* le mbo dimul waŋnda Isɔluɛiyo cho hoo ni:

2 “I chɔm nya kaalaa,”+ Chɛhowa dimi lende ni.

Kɛ mi la nyuna aa: “Vɛɛ ŋ chɔm yɛ naa kaalaa?”

Mi Chɛhowa dimi aa: “Baa o cho Iisɔ le wa bɛndoo Chekɔpu le?+ Kɛ mi kaala Chekɔpu, 3 nduyɛ mi tul Iisɔ leyɛ.+ I pesi pembuŋ ndɔŋ bɛndoŋ,+ nduyɛ mi mal nyɛm kɛŋ ndɔŋ tuŋaa yonduaa cho o pollo niŋnda o ba.”+

4 “Waŋnda Idɔm dimi aa, ‘A pɛl chiee naa wɔ wɔ, kɛ ŋ cho miiŋgu miŋ miŋgi ndu taŋgul.’ Nyɛ Chɛhowa, Mɛlɛka puaa chɔuwa* dimi wo cho hoo ni, ‘A cho ndu miŋgi taŋgul, kɛ mi pɛl ndu. A cho nda veelu aa “tanda dɛnɛ wɔɔŋndo” a “wanaa Chɛhowa handu sendioo choo le fɛɛŋ a fɛɛŋ nda.”+ 5 La cho hei chɔ a hɔlta nyalaŋ pɛɛŋ, nduyɛ mi la dimi aa: “Maa Chɛhowa sɔla saŋgalaa o tanda Isɔluɛiyo niŋ.”’”

6 “‘Poleŋ le cho finya ndɔ bɛɛleŋ kioo,+ nduyɛ mi buɛiyo ke masanɔ ndɔɔ bɛɛleŋ. Te o yɔŋ pɛ maa ya cho finya nya ni,+ ɔɔ bɛɛle nya nɔ le ya leŋ?+ Te ya cho masanɔ nyaa ni,* ɔɔ siooŋii nya nɔ le ya ve?’ Hei Chɛhowa, Mɛlɛka puaa chɔuwa dimul wanaa soliaa lasalaa cho diola ndɔlaŋ tɛɛmbuuwo wa ni.+

“‘Kɛ mi la nyuna aa: “Vɛɛ naŋ tɛɛmbuu yɛ diola numndaŋ?”’

7 “‘La cho nyɛdiaa* nɔɔlɛiyo handɔɔ o bandu ni luamaa lasalaa choo.’

“‘Nduyɛ mi la nyuna vɛlɛ aa: “Vɛɛ naŋ nɔɔliaa yɛ num?”’

“‘La cho dimioo aa: “Wana nɔɔliaa bɛɛ tibii* Chɛhowa wo,+ o cho isɔɔ le.” 8 Te la wa pɛ chɔlu sumɛiyo salaa solioo, la dimi aa: “O cho suɛi wɔɔŋ te.” Nduyɛ, te la wa pɛ chɔlu namtaa ɔɔ o cho a naa wo salaa solioo, la dimi aa: “O cho suɛi wɔɔŋ te.”’”+

“Kɛ a yandii, la chua wɔ nda, mi la yoo masa nya ibuŋgaa. La yiyaŋ pa maa o cho nya nda biyɔɔ o ba, nduyɛ mbo hini kɔl a nya?” Chɛhowa, Mɛlɛka puaa chɔuwa dimi lende ni.

9 “Lelaŋ a yandii, la nyɔɔlu Mɛlɛka le mbo tuiinuŋ naa inyiɛɛ. Te la wa pɛ salala waa nuaa solioo, vɛɛ ya hini yɛ kɔl a nya?” Chɛhowa, Mɛlɛka puaa chɔuwa dimi lende ni.

10 “O nɛɛnɛ cho yɛ nya tɛɛŋ mbo yɔŋguŋ le diolaŋ kiindiaa?*+ Kanifuule, le yiŋndeŋ mɛndullo bɛɛ o bandu ni luamaa lasalaa choo, la tosa ndi fondo le.+ I hini kɔl a nya le, nduyɛ sala kɛ kɛ nya cho solioo, I niŋ kɔl a ndu le.”+ Chɛhowa, Mɛlɛka puaa chɔuwa dimi lende ni.

11 “Chɔŋ ba paaleŋ le chaŋ ndo mbo kɔ bii ba le del lo, diola nilaŋ la cho wa diola tɔɔma bɛndu kaalaŋ tɛɛŋ.+ Waŋnda cho wa salalaŋ lomɔɔ ba o ba fee, nduyɛ ma wa vɛlɛ salalaŋ yɔŋgoo maa kela diandaa o diola nilaŋ niŋ. Kanifuule, diola nilaŋ la cho wa diola tɔɔma bɛndu kaalaŋ tɛɛŋ.”+ Chɛhowa, Mɛlɛka puaa chɔuwa dimi lende ni.

12 “Kɛ la cho diola nilaŋ nɔɔliaa+ mi la wa dimioo aa, ‘Tibii Chɛhowa wo cho o nɔɔlɛi, nduyɛ nyɛm kuamaŋ a nyɛdiaa cho lechoo wo bɛɛ cho nyɛ o nyɛ le.’+ 13 La cho vɛlɛ dimioo aa, ‘Ŋ saŋga niŋ a wallo hoo!’ Nduyɛ mi la yii hɔlla o ndu tosaa niŋ.” Chɛhowa, Mɛlɛka puaa chɔuwa dimi lende ni. “La cho hunɔɔ a chɔluaa leviiya, a namtaa, vɛlɛ a chɔluaa cho a naalaŋ nda. A tonya, nyɛm waa nuaa nya cho ya chuuwo ni maa ke. Baa I nɔ pa mi bii nya muŋ o ba?”+ Chɛhowa dimi lende ni.

14 “Wana lakafa nɔ hoo chɔlu piaandu kɛndɛ kɛndɔɔ o chɔluaa nduaa tɛɛŋ ndo, kɛ mbo chua buŋgɛi, mbo soli chɔlu namtaa salaa o Chɛhowa lo wo, sendioo cho ndu choo. Kanifuule, ya cho Masa bɛndu bɛndoo ni.”+ Chɛhowa, Mɛlɛka puaa chɔuwa dimi lende ni. “Nduyɛ waŋnda o kaalaŋ tɛɛŋ kpou cho nɔ bɛɛleŋ le diola nilaŋ.”+