Masaa Tasiaa

17 Paale pilɛ, mi Ilaicha*+ Tisibaitiinɔɔ, o wa o buŋgɛi Kiliaadi ve+ niŋndo dimul Ehaabi aa: “I mɛnaŋ po o Chɛhowa lo, Mɛlɛka Isɔluɛiya, o cho yoomu mi wa ndu piɛiyo wo* maa, chɔŋ a hau, wɔsilaŋ la tiŋ la cho hiouwɔɔ, mɔmndo bɛɛ o chuchu le, kɛlɛŋgaa niŋ te mi piɔɔ sia. Mɛɛ mi dimi malaŋ i yɔŋnuŋ!”+

2 Okoŋ kɔɔli, mi Chɛhowa dimul Ilaicha aa: 3 “Faŋaŋ naa ŋ cho haa wa ma kuɛ ba paaleŋ le chaŋ ndo ma kɔ vioŋnuŋ o Kpoloŋndo Kɛluiti,* o Chɔɔdaŋ ndaŋ ba paaleŋ le chaŋ ndo. 4 O pee pɔmbɔɔ ŋ cho wa kolɔɔ ni, nduyɛ I cho wa basabasakuendiaa yɔŋndo loŋ a nyɛdiaa le num.”+ 5 Mbo chaŋ mbo kua sakpo a mɛɛ Chɛhowa dimul ndu yɛ. Mɛɛ o kuɛ, mbo kɔ chal o Kpoloŋndo Kɛluiti* ikɛi, o Chɔɔdaŋ ndaŋ ba paaleŋ le chaŋ ndo. 6 Idii o idii, basabasakuendiaa wa ndu chuuwo beediiyo* a visioŋ. Te paaleŋ lee yɔŋguŋ vɛlɛ pɛ, a chuu ndu beediiyo a visioŋ. Nduyɛ, o pee pɔmbɔɔ ndoo kol ni.+ 7 Kɛ mɛɛ palɛi hiou i tiŋ, mi pee pɔmbɔɔ hoo vela,+ kanifuule piɔɔ ve sia o lɛŋndeŋ niŋ te.

8 Okoŋ, mi Chɛhowa dimul ndu vɛlɛ aa: 9 “Chɔŋ ma kuɛ Saluɛfati o lɛŋnde Saidɔŋ ndeŋ niŋ ma kɔ wa loŋ. Chua pilɛ cho loŋ mbo vii pɔnɔɔ. I cho ndu dimul mbo wa num nyɛdiaa kioo.”+ 10 Okoŋ, mbo chaŋ mbo kua Saluɛfati. Mɛɛ o fuuluu chiee lekɔɔ, mbo komal chua vii pɔnɔɔ wo yɔmnde tiŋgɔɔ. Mbo veelu chuaa hoo mbo dimul ndu aa: “Yandii, chuu ya mɛŋndaŋ nyɛɛmbɔ o taalaa niŋ mi kol.”+ 11 Mɛɛ o wa kɔlaŋ le mɛŋndaŋ, mbo dimul ndu vɛlɛ aa: “Yandii ma chuu ya beedii pɔmbɔɔ o ba.” 12 Okoŋ, mi chuaa dimul ndu aa: “I mɛnaŋ po o Chɛhowa, Mɛlɛka num cho yoomu wo lo, beedii bɛɛ i nɔ le. Mɛɛ le kpeyaŋndo baa cha mbo wa ya o ba o kpɛɛnɛi bɛnduei niŋ a chuɛiyaŋ nyɛɛmbɔ o kpɛɛnɛi pɔmbuɛi niŋ.+ Yɔmii keŋ ya hiŋ nuaa tiŋgɔɔ ni, le mi kɔ toosiaa nyɛdiaa pɔmbɔ a ndu le miŋ de naa po nuu. Te ŋ chii yɛ koŋ dio pɛ, ŋ chal piɔmndo chum.”

13 Okoŋ mi Ilaicha dimul ndu aa: “Buulaŋ te. Kɔ ma tosa mɛɛ ŋ dimi yɛ. Kɛ toosiallɔ ya wɔ fɛŋ kpuŋgbɛi beedii pɔmbɔ a nyɛ cho loŋ ndo ma chuu ya. Okoŋ kɔɔli, ma toosiaa niko nyɛdiaa le num a po numndo. 14 Kanifuule, nyɛ Chɛhowa, Mɛlɛka Isɔluɛiya dimi wo cho hoo ni: ‘Kpeyaŋ cho o kpɛɛnɛi bɛnduei niŋndo chuu niŋ te, nduyɛ chuɛima cho o kpɛɛnɛi pɔmbuɛi niŋndaŋ bɛɛ ma chuu niŋ te, haaa paale Chɛhowa cho tosa mi piɔɔ sia o lɛŋndeŋ choo leŋ.’”+ 15 Okoŋ mbo kɔ tosa mɛɛ Ilaicha dimul ndu yɛ. Le palɛi bɔɔbɔɔ, ndu ni, Ilaicha ni, vɛlɛ a yuŋgu ndɔɔ kpou, nyɛdiaa lepɛŋ ve nda le.+ 16 A mɛɛ Chɛhowa dimul Ilaicha yɛ, kpeyaŋ wa o kpɛɛnɛi bɛnduei niŋndo chuu le, nduyɛ chuɛima wa o kpɛɛnɛi pɔmbuɛi niŋndaŋ ma chuu le.

17 Okoŋ kɔɔli, mi chuaa hoo po ndɔɔ del a naa. Nduyɛ mɛɛ naa kendu tei, mbo wu.+ 18 Le hei, mi chuaa nyuna Ilaicha aa: “Yɛɛ kpeekpei ya yɔŋ yɛ num, num wana Mɛlɛka tonyaa? Baa le ya loonɔŋndo a hakila nilaŋ ŋ hiŋ nanuŋ ni nduyɛ ma dii po nuu?”+ 19 Kɛ mi Ilaicha dimul ndu aa: “Ke ya po numndo nanuŋ.” Okoŋ mbo bii ndu poombɔɔ o ba, mbo hel a ndu o lumui wa o chiɛiyo choo wo, naa o wa o yiya wa, mbo kɔ yambu ndu o ndu lo kpele.+ 20 Mbo piɛi o Chɛhowa lo choo choo kpeleŋ aa: “Oo Chɛhowa Mɛlɛka nuu,+ chua vii hoo pɔnɔɔ mi wa ndu o bɛŋgu choo wo, baa le ndu nyɛpalaa tusioo choo ŋ chɛl vɛlɛ ni mi po ndɔɔ wu?” 21 Okoŋ, mbo hini poombɔɔ choo bɛmbɔɔ le yaa, nduyɛ mbo piɛi choo choo kpeleŋ o Chɛhowa lo aa: “Oo Chɛhowa Mɛlɛka nuu, yandii tosa mi yoomoo miiŋgu poombɔɔ hoo o miliŋ.” 22 Mi Chɛhowa yaŋ Ilaicha nilaŋ,+ okoŋ mi poombɔɔ miiŋgu yoomu.+ 23 Mi Ilaicha chaŋ a poombɔɔ o lumui o wa o chiɛiyo choo wo, mbo tual a ndu chiɛiniŋ naa kala ndɔ chua mbo ke ndu. Mbo dimul ndu aa: “A che po numndo, o miiŋgu yoomu.”+ 24 Okoŋ, mi chuaa dimul Ilaicha aa: “I sina niŋ kɛsɛ maa wana Mɛlɛkaa kpeekpei ŋ cho ni,+ nduyɛ maa diomnda Chɛhowa dɔu num o sondo laŋ bɛɛ, tonya la cho ni.”