Chɔɔsuaa

24 Mi Chɔɔsuaa chuuŋgiaa kaalaŋ Isɔluɛi kpou Siɛkɛm. Okoŋ mbo veelu waŋ bɛnduaa Isɔluɛi, wanaa lebolla, wanaa kialaa ŋyamaa, a simlachiaa,+ ma sim Mɛlɛka tonyaa lachi. 2 Mi Chɔɔsuaa dimul waŋnda kpou aa: “Nyɛ Chɛhowa, Mɛlɛka Isɔluɛiya dimi wo cho hoo ni, ‘O sindɔɔ niŋ,+ Pee Bɛndoo* leeloo finyaa nyaa mamaa wa ichali ni.+ Nduyɛ, mɛlɛkaa cheleŋnda ndaa sooluu ni. O nda tɛɛŋ, Tɛlua, o wa finyaa Ebilaham a Nahɔɔ wo wa waŋndo o pilɛ.+

3 “‘Mɛɛ teleŋ tiŋ hiou, mi soli Ebilaham finya nya mama+ o Pee Bɛndu* koŋ leeloo, mi dimul ndu le mbo balu o lɛŋnde Kenaŋ ndeŋ niŋ kpou. Nduyɛ mi tosa mi chuauwaa nduaa* kui tau tau.+ Ya ke ndu Aase ni, + 4 mi tosa mi Aase vialu Chekɔpu nda Iisɔ.+ Okoŋ kɔɔli, mi ke Iisɔ Pembii Sɛyaa Ve.+ Nduyɛ, mi Chekɔpu nda puaa nduaa tuusu Ichipi.+ 5 Mɛɛ teleŋ tiŋ hiou, mi viam Muuse nda Elɔŋ+ nduyɛ mi tusi waŋnda Ichipi kpundɛlaŋ choo.+ Okoŋ mi soli nya o lɛŋnde leŋ niŋ. 6 Mɛɛ ya wa finyaa nyaa mamaa solioo Ichipi,+ mi Ichipiaŋnda tisa nda kɔɔli o nyɛm nyaanaŋ suaa naŋndoŋ niŋ a o suaa ndaa choo, haaa ma fuuluu o Pee Siaŋa Mɛŋma Ihɛllo. Mɛɛ nya fuuluu o pioo hoo,+ 7 mi finyaa nyaa koŋul o ya Chɛhowa lo.+ Okoŋ mi tusi nya nyumndaŋ tɛɛŋ nya Ichipiaŋnda, nduyɛ mi miŋgi nda pee mɛŋma ihɛllo choo mbo kumbu nda.+ Nduyɛ nyapila bɛɛ, mi la cha nyɛ ya tosa Ichipi wo a lehɔl pɛɛŋ.+ Okoŋ kɔɔli, mi la chii wɔsiŋ* bɔɔbɔɔ o lɛŋnde polteŋ niŋ.+

8 “‘Mi huŋ a nya o lɛŋnde Amɔluaitiiya, a wa ichali Chɔɔdaŋ leeloo* wa, nduyɛ ma chiŋalaŋ nya a sɔŋgɔɔ.+ Kɛ mi mal nda nya o ba le halikpeŋ mi la chua lɛŋnde ndaleŋ. Nduyɛ, mi tɛɛmbuu nda nya lachi.+ 9 Okoŋ mi masaa le Mowaabi, Belaki po Sipɔɔ wo chaŋ mbo chiŋalaŋ Isɔluɛiya a sɔŋgɔɔ. Mbo yooŋgu Belam po Biyɔɔ wo, le mbo huŋ handu nya sendioo choo.+ 10 Kɛ Belam kundaŋ fee I chɛl ndu diom te.+ Le hei, mbo miiŋgu nya salaa dɔwɔɔ le diiŋ diiŋ.+ Nduyɛ, mi piŋi nya ndu o ba.+

11 “‘Mɛɛ nya taŋ Chɔɔdaŋ ndaŋ,+ mi la fuuluu Chɛluiko.+ Okoŋ, mi simlachiaa* Chɛluiko, Amɔluaitiiya, Pɛluisaitiiya, Kenanaitiiya, Hitaitiiya, Kikasaitiiya, Hivaitiiya a Chɛbusaitiiya chiŋalaŋ nya a sɔŋgɔɔ. Kɛ mi mal nda nya o ba.+ 12 Mi tosa mi siooŋii bɛnduei bii* wanaa wa o lɛŋndeŋ niŋnda. Nduyɛ mi hei tuau nda nya lachi,+ a masaa ŋiɔɔŋaa Amɔluaitiiya bɛɛ kpou. O cho a muɛi faŋ ɔɔ a chiɔu le nya yem nda le.+ 13 Mɛɛ nuaa ya looku nya ke lɛŋnde nya saŋga le leŋ te leŋ a chieeŋ nya teŋgul te woŋ ni,+ okoŋ mi la chal loŋ. La cho niŋ hau kilepiiyaŋ a ɔlifiima nya tol te waŋ dioo.’+

14 “Lelaŋ la nɔ siooŋnde le Chɛhowa, nduyɛ mi la piɛi ndu a kɔllo kpou a o tonyaa choo.+ La faŋa mɛlɛkaa finyaa nyaa mamaa ndaa sooluu teleŋ nda wa o Pee Bɛndoo* leeloo a Ichipi wo,+ okoŋ mi la piɛi Chɛhowa. 15 Kɛ te la che ndi pɛ iwɔɔŋ le Chɛhowa piɛiyo, mɛɛ la hɛli hau a ba nya mɛlɛka nya cho piɛiyo.+ O wa mɛlɛkaa finyaa nyaa mamaa ndaa sooluu o Pee Bɛndoo* leeloo wa,+ ɔɔ mɛlɛkaa Amɔluaitiiya, wanaa nya cho o lɛŋnde ndaleŋ niŋnda ni, la hɛli.+ Kɛ ya a wana o wana cho o yuŋgu nuu niŋ, Chɛhowa naŋ cho piɛi ni.”

16 Okoŋ, mi waŋnda kpou dimi aa: “Ŋ yeema pɛŋ mi i del naa o kɔl le Chɛhowa malɔɔ, miŋ muliŋ mɛlɛkaa cheleŋnda sooluuwo le. 17 Chɛhowa Mɛlɛka naa, ndu soli naa a finyaa naa o chɛleŋ niŋ+ Ichipi ni,+ mbo tosa sɔɔŋ kɔndɔfiliŋ bɛndoŋ muŋ naa o hɔl.+ Mbo manda naa o tiŋ vilɛiyo hoo niŋ, wanaa naŋ kei tɛɛŋ nda a tosal naa nyɛ o nyɛ le.+ 18 Wanaa wa o lɛŋndeŋ ndeŋ niŋ naa lachi wa, mi Chɛhowa soli nda kpou a Amɔluaitiiya latulu le naa. Lelaŋ, naa bɛɛ Chɛhowa naŋ cho piɛi ni, kanifuule ndu cho Mɛlɛka naa ni.”

19 Okoŋ, mi Chɔɔsuaa dimul nda aa: “La nɔla mi la piɛi Chɛhowa le, kanifuule Mɛlɛka diandaa o cho ni.+ Mɛlɛka yeema miŋ piɛi ndu ndupilɛ kpe* wo o cho ni.+ Nduyɛ te la tosa keŋ te, o mel nya le nila kalula nyalaŋ a hakila nyalaŋ te.+ 20 Te la mal pɛ Chɛhowa mi la muliŋ mɛlɛkaa nya sina le wa sooluuwo, a sɔɔŋ kɛndɛŋ o tosal nya muŋ ndoŋ kpou, o cho nya mululaŋ mbo chii nya paku.”+

21 Kɛ mi waŋnda dimul Chɔɔsuaa aa: “Sako, Chɛhowa naŋ cho piɛi ni!”+ 22 Okoŋ, mi Chɔɔsuaa dimul nda aa: “Nyapila dimi ni maa Chɛhowa nya cho piɛi ni.+ Lelaŋ, nyapila cho lesei.” Mi waŋnda muli aa: “Naapila ŋ cho lesei.”

23 “Mɛɛ la faŋa mɛlɛkaa nya sina le wa nya tɛɛŋ, mi la muli kɔlta nyalaŋ kpou o Chɛhowa, Mɛlɛka Isɔluɛiya lo.” 24 Mi waŋnda dimul Chɔɔsuaa aa: “Ŋ cho Chɛhowa Mɛlɛka naa piɛi, nduyɛ miŋ tuei ndu diom!”

25 Okoŋ, mi Chɔɔsuaa yii kpemaa a waŋnda o paale leŋ choo Siɛkɛm loŋ, nduyɛ mbo kɛsul nda sawaa. 26 Mi Chɔɔsuaa poonyiaa diomndaŋ ndaŋ o yau laSawa Mɛlɛkaa niŋ.+ Nduyɛ mbo chua pou bɛndoo,+ mbo kɛsi ndu o yɔm bɛndu cho o fondaŋ diandaa Chɛhowa wo ikɛiyo.

27 Mi Chɔɔsuaa lo okoŋ mbo dimul waŋnda kpou aa: “La che pouwo hoo, ndu cho wa seiyo le naa ni.+ Kanifuule, o tuei nyɛ o nyɛ Chɛhowa dimul naa. Te o yɔŋ pɛ mi la kɛɛ Mɛlɛka nyaa, pouwo hoo cho nya seileŋ timbul ni.” 28 Okoŋ, mi Chɔɔsuaa mal waŋnda, mi wana o wana miiŋgu o ndu lo.*+

29 Okoŋ kɔɔli, mi buɛi Chɛhowa wo, Chɔɔsuaa po Nuŋ ndo wu mɛɛ o fuuluu wɔsilaŋ 110.+ 30 Ma kumbu ndu o lɛŋnde ndɔleŋ niŋ Timinati-sɛlua,+ o tanda ŋpemboo Ifiluem, Pembii Kaasi Ve ba luaŋ ndo. 31 Mi Isɔluɛiya hiau lachi a Chɛhowa piɛiyo o palɛi Chɔɔsuaa ve niŋ kpou. Ma hiau lachi a hei tosaa o palɛi waŋ bɛnduaa Chɔɔsuaa mɛi yoomu, ma cha sɔɔŋ Chɛhowa tosa le Isɔluɛiya woŋ niŋ.+

32 Boondii Isɔluɛiya wa fulaa Ichipi ve, ma chua paala Choosɛ laŋ+ ma kuaŋnuŋ a laŋ. Ma kumbu paalaŋ ndaŋ Siɛkɛm, naa Chekɔpu pendu buŋgɛi lelɛŋnde puaa Hemɔɔ,+ finyaa Siɛkɛm o ba wa. Le kaniŋ humboŋ 100+ Chekɔpu pendu leŋ ni. Nduyɛ, le puaa Choosɛ wa le wa niŋ ni.+

33 Mi Ɛlieesa po Elɔŋ ndo bɛɛ wu,+ okoŋ ma kumbu ndu o Pembii Finihaasi po ndɔ ve.+ Pembei hei Finihaasi sɔla o lɛŋnde ŋpembuleŋ Ifiluem ni.