Habakuku
2 I cho hiouwɔɔ lachi a simndaŋ o fondaŋ ni mɛŋgɛlaa.+
I cho helɔɔ tema o fondaŋ kala kalaa choo mi sim.
I cho hiouwɔɔ lachi a tofaa mi che nyɛ o yeema ya mi dimi wo.
Nduyɛ, mi yiyaŋ a nyɛ ya cho ndu mulul lo te o miŋgi ya pɛ o nɛi.
2 Okoŋ, mi Chɛhowa mulul la aa:
“Poonyiaa nyɛ ŋ che o yilaŋnde niŋndo nyɛkɛndɛi o pouta yɛndɛlaŋ* choo.+
Okoŋ, te waŋndo wa pɛ diomndaŋ veeloo choo choo, la pala ndu veelu le.*+
3 Kanifuule, teleŋndo cho niŋ o kɛsiaa le yilaŋnde hei.
Teleŋ koŋ cho kiltaŋ kpeekpei o mɛɛlulaŋ, nduyɛ i cho peelɔŋ.
O yɔŋ bɛɛ mbo dɔɔnuŋ tamala,* hiou lachi a chumndo!+
Nyɛ o nyɛ ŋ che, o nɔ le yɔŋnɔŋndo.
Nduyɛ, a teleŋndo kpafii o cho yɔŋnɔŋ ni!
4 Wana cho hoo mbo nɔ yoŋgaa wo,
O cho wana sandu a ndupila le o cho le.
Kɛ wana cho sakpo wo cho wa yoomu le laalaŋ ndɔɔ.+
5 A tonya, mɛɛ muɛiyaŋ ma laasiaa wana yɛ,
Lende koni wana heelaŋndo sɔla batiuwaa le ni.
Yeemɛi bɛnduii o nɔ ve cho ko mɛɛ Sɛiyo* cho nuaa yɛ, o pim te.
Mɛɛ piɔmndo nɔ kɔl hiniaa le yɛ, lende koni ndu bɛɛ nɔ kɔl hiniaa le ni.
O cho hiouwɔɔ lachi a lɛŋnde kpou chuuŋgiaa naapilɛ,
Nduyɛ mbo wa vɛlɛ waŋnda kpou chuuŋgiaa le ndupila.+
6 Nda kpou cho wa tamasioo chuaa a ndu okɔɔ, nduyɛ ma suaa o talelaŋ niŋ.+
A cho wa dimioo aa:
‘Kpundɔɔ cho le wana sul hoo a nyɛm pilaŋ ndoŋ.
Lɔɔ kuɛɛ hei cho yɛ mɛɛlu?
Waŋndo hoo, kueela o bii laŋ bɛɛ, la hiou ndu mayoomu!
7 Wanaa wuu num kueelaŋ nda cho chɔnɔŋ o lepilɛ niŋ kpe.
A cho chɔnɔŋ nduyɛ ma hiiluu num woŋa woŋa.
Nyɛ o nyɛ ŋ nɔ, a cho num ndu puŋga o ba.+
8 Waŋnda kpou cho hunɔɔ nyɛm num ndoŋ puŋga,
Kanifuule, a del niŋ lɛŋii faŋga faŋga choo ma puŋga nyɛm ndaŋ,+
Nduyɛ ma wa keiyo kooma waŋnda chieeya tɛɛmbuuwo.
Hei cho vɛlɛ yɔŋnɔŋ le mɛɛ ŋ tɛɛmbuu nyɔɔŋ o lɛŋndeŋ choo,
Ma tɛɛmbuu chieeŋ bɛndoŋ a wanaa cho o chieeŋ muŋ niŋnda yɛ.+
9 Kpundɔɔ cho le wana cho hoo sul dɛnɛ wɔɔŋndo nuuviaa le chiɛi ndɔɔ wo.
Kanifuule, o yeema mbo taŋgul waŋnde ndɔleŋ choo choo pɔ pɔ,
Le halikpeŋ mbo hɛluŋ dɛnɛ palaa.
10 Kɛ nduyɛ, a nuuviaa siɔmbulaŋ le chiɛi numndo.
A chua hakioo a numpila le mɛɛ ŋ diu diu wanaa faŋga faŋga yɛ.+
11 Pou cho bɛɛ o chiɛiyo wo cho koŋul choo choo kpeleŋ a chaŋndo.
Okoŋ, mi yɔmii cho o yindɔɔ ve o pilɛ saala ndu diom.
12 Kpundɔɔ cho le wana kila chioo a kooma waŋnda chieeya wo,
A wana taŋgul ndu o kafalaŋ choo wo!
13 Chɛhowa, Mɛlɛka puaa chɔuwa* cho tosa mi yiŋndeŋ le lom nyɛ o nyɛ waŋnda cho nuuviaa.
Nduyɛ, mi saŋga lɛŋnde cho wo simnuŋ nyɛ fondoo.+
14 Kanifuule, sinapɛŋgu cho a tɔɔmayɛi Chɛhowa ve okɔɔ wo cho tiu ba o ba fee o lɛŋndeŋ choo,
Mɛɛ mɛŋndaŋ ma cho nuaa o pee mɛŋma ihɛllo niŋ yɛ.+
15 Kpundɔɔ cho le wana tuulu hoo kɔl,
Mbo ke chaaŋaa nduaa muɛiyaŋ le ma kol mi ma bii nda wo,
Le halikpeŋ mbo che nda tumnda fondo!
16 Num bɛɛ a cho hunɔɔ tambu labɛɛ, mi tɔɔ numndo nyum.
A cho maŋ kolɔɔ mi waŋnda che num fondo, nduyɛ ma sina maa a sɔla bɛɛ hivi chiɛi kɔɔli le.
Num bɛɛ cho hunɔɔ kolɔɔ o taala Chɛhowa bii o ba ndɔ kɛndɔɔ wo niŋ.+
Siɔmbulaŋ la cho num tolɔɔ, nduyɛ mi tɔɔ numndo nyum pɔli.
17 Kpundɛla ŋ mal o lɛŋnde Lebanɔŋ ndeŋ niŋndaŋ la cho num tolɔɔ choo.
Nduyɛ, dɛnɛ palaa luei visiaa yonduaa siooŋnde wo cho num komal,
Kanifuule, a cho keiyo kooma waŋnda chieeya tɛɛmbuuwo,
Ma wa kpundɛlaŋ mɛlioo o lɛŋndeŋ choo,
O chieeŋ bɛndoŋ niŋ, a wanaa cho o chieeŋ muŋ niŋnda choo.+
18 Te waŋndo chii pɛ piɔmndo siɔlɔɔ,
Tɔnɔ yɛɛ kpeekpei piɔm koŋ nɔ yɛ?
Tɔnɔ yɛɛ cho yɛ o piɔm nda toosiaa a chiliŋnde* wo niŋ, vɛlɛ a wana pɛɛku waŋnda choolaŋ ndo?
O toosiaa mɛlɛkaa fonduaa suu le wa.
Tɔnɔ yɛɛ o cho yɛ sɔla te o dɔu pɛ tiindaŋndo o nda niŋ?+
19 Kpundɔɔ cho le wana dimul piɔm nda toosiaa a yɔmndo wo aa, “Tiondu!”
Ɔɔ mbo dimul pou nɔla mbo soo le wo aa, “Chɔŋ ma pɛɛku naa!”
Piɔmnda haa te a toosiaa nda pɛ, ma kumbu nda a kooliiye vɛlɛ a kanii humbuei.+
Nduyɛ, yoomu bɛɛ cho nda niŋ te.+
20 Kɛ Chɛhowa cho o chiɛi ndɔ diandaa niŋ.+
Lɛŋndeŋ kpou le nɔ mi le mei doŋ ndu o hɔl!’”+