Walta Kiilaa
11 Mi kiilaa a puaapiliaa wa o Chudiaa niŋnda tuɛi maa wanaa cho ŋChuu le wa bɛɛ chɛl diom Mɛlɛkaa. 2 Mɛɛ Pitɛ hiŋ Chulusalɛm, mi wanaa ndaa yeema mi wanaa cho ŋChuu le wa sɔla hivi chiɛi kɔɔlioo wa+ chiŋalaŋ ndu. 3 Ma dimi aa: “A kuɛ ma luɛi o chiɛi wanaa sɔla hivi chiɛi kɔɔli le wa niŋ, mi la dia nyɛdiaa nya ndaa.” 4 Okoŋ, mi Pitɛ tɛɛsial nda nyɛ o nyɛ yɔŋnuŋ. Mbo dimi aa:
5 “I wa piɛileŋ o chiee bɛndoo niŋ Chopa, mi cha yilaŋnde. Mi cha nyɔɔ tolɔɔ lɛŋ mɛɛ nda saa nuaa kola feŋgbɛ bɛndoo o kpeŋguŋ hiɔɔloŋ ma wa ndu tusioo yɛ, mbo huŋ sim ya ikɛi.+ 6 Mɛɛ ya tofa leniŋ chiŋ, mi cha visiaa peluŋ hiɔɔluaa, visiaa yonduaa, visiaa kua o demboo choo wa, a youwa. 7 Mi tuɛi vɛlɛ mi diomndo dimul la aa: ‘Pitɛ, chɔŋ ma dii ma de!’ 8 Kɛ mi dimi aa: ‘Ɛ ɛ, Masanɔɔ, kanifuule lepilɛ bɛɛ I di wɔ nyɛ sawaa kɛɛ, nduyɛ mbo wa o nɔɔlɛi Mɛlɛka o hɔl lo le.’ 9 Mi tuɛi vɛlɛ diomndo o choo choo niŋ aa: ‘Pɛŋgi nyɛm Mɛlɛka dindi woŋ veeloo nyɛm nɔɔlɛiyoŋ.’ 10 Mi hei yɔŋnuŋ haaa bɛmbɔɔ le yaa, okoŋ mi nyɛ o nyɛ miiŋguŋ o choo choo niŋ. 11 A teleŋ koŋ kinɛi, mi wanaa yaa fula Sisaliaa ma huŋ sim o chiɛi naŋ wa wo. O ya lo ndaa vem nda ni.+ 12 Okoŋ mi nyina diandaa dimul la le miŋ kuɛ naa ndaa, nduyɛ maa ya nɔ kiisaŋ o kiisaŋ te. Mi puaapiliaa ŋɔmpumnda haa bɛɛ kua a ya latulu, miŋ luɛi o chiɛi Kɔniiliɔɔ wo niŋ.
13 “Mi Kɔniiliɔɔ dimul naa a mɛɛ o che maalikɛinɔɔ isisi o ndu lo chiɛiniŋ yɛ. Mbo dimul ndu aa: ‘Viom waŋnda Chopa o Saimɔŋ lo, o nda veelu aa Pitɛ wo.+ 14 O cho num dimul mɛɛ num a yuŋgu numndo nɔla mi la sɔla pioŋɔɔ yɛ.’ 15 Kɛ mɛɛ ya kandu suɛi, mi nyina diandaa tual nda choo, mɛɛ o tol naa choo o kandɔŋndo yɛ.+ 16 Okoŋ mi loonuŋ a nyɛ Masanɔɔ dimi wo. Mbo dimi aa: ‘O mɛŋndaŋ niŋ Chɔŋ yiŋ waŋnda ni,+ kɛ nya a nyina diandaa nya cho yiŋɔɔ sɔla ni.’+ 17 Naa wanaa laalaŋ o Masanɔɔ Chiisu Kiliti niŋnda, nyɛ Mɛlɛka ke naa fondo fuu wo koni o ke nda ni. Wana maavɛɛ ya cho yɛ le mi kuuna Mɛlɛka nyɛ o hɛnaŋndo tosaa?”+
18 Mɛɛ nda tuei sɔɔŋ muŋ, ma pɛŋgi diomndaŋ hiŋaŋndo a ndu, ma saŋgala Mɛlɛka. Ma dimi aa: “Wanaa cho ŋChuu le wa bɛɛ, Mɛlɛka ke nda fondaa le ma wookuŋ ma huŋ sɔla yoomoo.”+
19 Mi wanaa laalaŋaa nda tusi nyɛpalaa choo o piɔm Stiiviŋ ndo kɔɔli wa saŋnuŋ,+ ma kua haaa Foniisiaa, Saipulɔɔ, a Aŋtiɔɔ. Kɛ Chuuwa kinɛi nda wa suɛi Mɛlɛkɛi dimullo ni.+ 20 Mi wanaa laalaŋnda apum fula Saipulɔɔ a Sailuini ma huŋ Aŋtiɔɔ. Okoŋ ma kandu wanaa dimi Kilikiiye wa yooŋgu kɛndɔɔ dimullo a Masanɔɔ Chiisu okɔɔ. 21 Ba Chɛhowa* wo wa nda choo, nduyɛ mi wanaa bɔɔbɔɔ simnuŋ wanaa laalaŋnda, ma tual Masanɔɔ kɔɔli.+
22 Mi kunda wanaa laalaŋnda o Chulusalɛm niŋ tuɛi yooŋgoo hoo, okoŋ ma viam Banabaa+ Aŋtiɔɔ. 23 Mɛɛ o fuuluu mbo cha mɛɛ Mɛlɛka chɔm waŋnda kɛndɛi nduɛi bɛnduei yɛ, mbo duaunuŋ nyaale. Okoŋ mbo kandu nda dɛɛniaa le ma hiou lachi a Masanɔɔ diikɔŋndo a kɔllo kpou.+ 24 Banabaa wa wana kɛndɛ. Ndoo nɔ nyina diandaa, nduyɛ wana laalaŋndo pila o wa ni. Le hei, mi wanaa bɔɔbɔɔ laalaŋ o Masanɔɔ niŋ.+ 25 Okoŋ mbo kua Taasɔɔ le Sɔɔ nuuviaa.+ 26 Mɛɛ o saaluŋ ndu, mbo huŋ a ndu Aŋtiɔɔ. Le wɔsioo kpulukuu, a wa chuuŋgiaŋndo latulu a kunda wanaa laalaŋnda, nduyɛ ma pɛɛku wanaa bɔɔbɔɔ. O Aŋtiɔɔ niŋ Mɛlɛka tosa a sabu ni ma kandu buɛiyaa Chiisu wa veeloo aa Kilisiɔŋnda.+
27 O teleŋ koŋ niŋ, mi wanaa ndaa suaa le Mɛlɛka wa+ fula Chulusalɛm ma huŋ Aŋtiɔɔ. 28 Akabɔɔ wa waŋndo o pilɛ nda tɛɛŋ.+ Sanaa a mala nyina diandaa, mbo dimi maa yima bɛnduaŋ ma cho delɔɔ o lɛŋndeŋ choo.+ Nduyɛ mi i yɔŋnuŋ lende a boondii Kulɔdiɔɔ ve. 29 Mi wanaa laalaŋnda kɛɛsiaa le ma dɔu nyɔɔŋ naapilɛ mɛɛ wana o wana nɔ yɛ,+ le puaapiliaa ndaa wa Chudiaa wa yɔŋndo.+ 30 Nduyɛ ma chuuŋgiaa muŋ, ma viam Banabaa nda Sɔɔ a muŋ le ma kɔ ke bɛnduaa.+