Taitɔɔ
2 Kɛ num Taitɔɔ, hiou lachi a waŋnda pɛɛkoo nyɛ cho sakpo wo.*+ 2 Dimul waŋ piaanduaa kaasoŋnda ma wa sɔɔŋ tosaa tuuleŋ, ma nɔ bɛɛleŋ, ma nɔ taasioo, mi laalaŋ ndaa wa o kala poŋ, nduyɛ ma nɔ kaalaa a biuwɔŋndo. 3 Dimul vɛlɛ waŋ laanduaa kaasoŋnda le ma chɔm kaala ke Mɛlɛka bɛɛleŋ ndaŋ. A wa wanaa balu a chaanda o sondo le. A yiŋnuŋ o mamuɛi niŋ te. Kɛ a nɔ ma wa wanaa pɛɛku nyɛ bɛnda le tosaa wo wa, 4 le halikpeŋ ma sila chuaa laanduaa le ma kaala piaandaa ndaa, ma kaala chuauwaa ndaa, 5 ma nɔ taasioo, ma wa a diandaa o kaalaŋ niŋ, ma chaa chiɛila ndalaŋ biyɔɔ, ma wa wanaa kɛndɛ, ma tusiŋ piaandaa ndaa o ba bɛŋgu.+ Okoŋ, waŋnda dimi sɔɔŋ wɔɔŋndoŋ a diom Mɛlɛkaa okɔɔ le.
6 Dimul vɛlɛ chuaa piaanduaa le ma wa wanaa taasi.+ 7 Numpila kɛsi tamasi kɛndɔɔ o nyɛ o nyɛ niŋ. Pɛɛku waŋnda nyɛ cho sakpo wo, nduyɛ ma chɔm maa nyɛ ŋ cho nda pɛɛkoo wo cho o sɔvɛ.+ 8 Soo diomnda bɛnda laŋ, okoŋ waŋndo nɔla mbo pɛɛsa num le laŋ te.+ O hei niŋ, siɔmbulaŋ la cho wanaa simul numnda biyɔɔ. Kanifuule, a seeluŋ nyɛ o nyɛ wɔɔŋ nda dimi a naa okɔɔ le.+ 9 Dimul chiaa le ma tusiŋ wanaa ndaa banaa o ba bɛŋgu o nyɛ o nyɛ niŋ.+ A tosa nyɛ nɛŋi nda kɔllo wo, nduyɛ a heeluŋ nda le. 10 A chiimbuu nda le.+ Kɛ a tosa mi wanaa ndaa banaa tiindaŋ nda o nyɛ o nyɛ niŋ. O hei niŋ, Mɛlɛka cho wana naa Piŋiaa wo, waŋnda nɔla ma ke pɛɛkula ndɔlaŋ bɛɛleŋ.+
11 Mɛlɛka tosa mi waŋnda cha kɛndɛi nduɛi bɛnduei kpendekele, le mi wana o wana fee sɔla pioŋɔɔ.+ 12 Kɛndɛi hei pɛɛku naa le miŋ mal kaala Mɛlɛka pɛɛsa laŋ, a yeemaŋ chieeŋndoŋ.+ Kɛ miŋ nɔ taasioo, miŋ wa wanaa sakpuaa, nduyɛ miŋ yɔŋguŋ o Mɛlɛka lo o chieeŋndo hoo niŋ.+ 13 Ŋ cho lehɔl o nɛi le mi tiindaŋ kɛndɛ+ naŋ cho hoo chumndo wo peeluŋ. Nduyɛ, le mi Mɛlɛka bɛndoo, a wana naa Piŋiaa Chiisu Kiliti hiŋ o biilu bɛndoo niŋ. 14 Chiisu hoo yɔŋgu yoomu ndɔɔ ni+ le mbo baŋa naa+ miŋ soli balaŋ o yɔŋ wɔɔŋndo tosaa niŋ. Mbo dindi naa le miŋ simnuŋ wanaa nduaa. Hei tosa miŋ nɔ sɛmbɔɔ le wali kɛndɔɔ tosaa.+
15 Hiou lachi a nda sɔɔŋ muŋ pɛɛkoo. Nduyɛ kpaaya o kpaaya cho num o keŋnaŋ,+ soliŋ ndu kpeku le nda dɛɛniaa a nda miŋgioo o nɛi. Chɛl mi wana o wana che num chɔdɔ le.