Walta Kiilaa
14 Mɛɛ Pɔɔl nda Banabaa luɛi o chiɛi Chuuwa piɛi Mɛlɛka wo niŋ Akooniɔm, ma dimi suɛi Mɛlɛkɛi nyɛkɛndɛi. Okoŋ mi Chuuwa a Kilikiiya faŋga bɛndoo simnuŋ wanaa laalaŋnda. 2 Kɛ mi Chuuwaa kɛɛ le laalaŋndo wa hiau wanaa cho ŋChuu le wa kɔɔli, ma tosa mi waŋnda haa chua nɛiyɔŋ Pɔɔl nda Banabaa wo.+ 3 Ma viau loŋ tau. Mi Chɛhowa* ke nda kpaayaa le ma soo a kɛndɛi nduɛi okɔɔ a dialuŋ fulaa, nduyɛ ma tosa kaamaalaŋ a kɔndɔfiltaŋ.+ 4 Mi waŋnda o chiee koŋ niŋ piɔuwaŋ tɛɛŋ. Apum wa le Chuuwa, apum wa le kiilaa. 5 Mɛɛ wanaa cho ŋChuu le wa, Chuuwa, a masaa ndaa kɛɛsiaa le nda nyɛpalaa tusioo choo, nduyɛ ma vii vii nda a poutaŋ,+ 6 ma tuɛi a ndi okɔɔ. Okoŋ ma nyaanuŋ o chieeŋ bɛnduŋ wa Likayoniaa woŋ niŋ, Lista a Dɛbi, a o sɔndɔkɔltaŋ o lɛŋnde leŋ niŋ.+ 7 Ma hiau lachi a yooŋgu kɛndɔɔ dimioo loŋ.
8 Po pilɛ wa Lista, wana bɛvɛiyo o wa ni. Chɔŋ a violɔŋ ndɔɔ, le pilɛ bɛɛ o cheŋ o peluŋ ndɔŋ choo le. 9 Mɛɛ Pɔɔl wa suɛi, poo hoo wa ichali mbo wa ndu nilaŋ yaŋɔɔ. Mɛɛ Pɔɔl tofa ndu chiŋ, mbo cha maa o nɔ laalaŋndo, nduyɛ maa laalaŋ ndɔɔ nɔla mbo siŋgi ndu,+ 10 mbo dimi choo choo aa: “Chɔŋ ma sim o peluŋ numndoŋ choo!” Mi poo hoo chaŋ mbo sim, mbo kandu kɔlaŋ.+ 11 Mɛɛ waŋnda che nyɛ Pɔɔl tosa hoo wo, ma deŋi choo choo o Likayoniaŋnde niŋ aa: “Mɛlɛkaa naa simnuŋ maa ŋwaŋnda chiee ma huŋ naa tɛɛŋ!”+ 12 Ma kandu Banabaa veeloo aa Suu, kɛ Pɔɔl ndu aa Hɛmɛsi, kanifuule ndu wa chilaŋ chuaa le suɛi ni. 13 Maaŋ ndaa sooluu Suu wo wa le luɛiyɔɔ o dio kpaki chioo. Okoŋ mi wana soliaa lasalaa le Suu huŋ a nauwa vɛlɛ a bil lapeeŋgoo o yuei le mi ndaa soli salalaŋ nda waŋnda latulu.
14 Kɛ mɛɛ kiilanɔɔ Banabaa nda kiilanɔɔ Pɔɔl tuei a hei okɔɔ, ma sɛɛsiaŋ domalaŋ lekɔɔ, ma luɛi waŋnda tɛɛŋ a kiltaŋ, ma deŋi choo choo aa: 15 “Le yɛɛnɛ nya cho yɛ hei tosaa? Naa bɛɛ waŋnda chieeya koni naŋ cho ni maa nya.+ Yooŋgu kɛndɔɔ naŋ cho nya dimullo ni le mi la mal nyɛm fondoŋ sooluuwo, mi la piɛi Mɛlɛka cho yoomu wo, o toosiaa choo choo, lɛŋndeŋ, pee mɛŋma ihɛllo, a nyɛm cho o muŋ niŋ kpou wo.+ 16 O paandoo niŋ, mi Mɛlɛka chɛl kaalaŋ kpou le ma tosa nyɛ nda yeema wo.+ 17 Kɛ a koŋ kpou, mbo tosal nya sɔɔŋ kɛndɔŋ le nya chɔmndo kpendekele+ wana suu o cho wo. Mbo ke nya piɔɔ fulaa o choo choo niŋ a boonduŋ tɔlɔɔla nyalaŋ la kuam tau wo,+ le mi la sɔla nyɛdiaa mi la de, mi la hini kɔl, nduyɛ mi la wa a kɔl kɛndɛ.”+ 18 A sɔɔŋ nda dimi muŋ ndoŋ kpou, o ve suɛi bɛɛŋ le waŋnda kuunaa salalaŋ solioo le nda le.
19 Mi Chuuwa fula Aŋtiɔɔ a Akooniɔm, ma muli waŋnda kɔltaŋ, okoŋ ma vii vii Pɔɔl a poutaŋ.+ Nduyɛ ma sasu ndu ma soli ndu chiee. Yiyaŋ ndaa wa ni maa o vi.+ 20 Kɛ mɛɛ puaapiliaa balu ndu, mbo chaŋ mbo miiŋgu chiee. Diimandɔɔ, mbo mal le kɔlaŋ Dɛbi nda Banabaa.+ 21 Mɛɛ nda dimi yooŋgu kɛndɔɔ o chiee koŋ niŋ, mi waŋnda apum simnuŋ wanaa laalaŋnda. Okoŋ ma miiŋgu Lista, Akooniɔm, a Aŋtiɔɔ. 22 Ma luei wanaa laalaŋnda loŋ yoomuaŋ,+ ma dɛɛniaa nda le ma lo o laalaŋndo choo. Ma dimi aa: “Ŋ nɔ miŋ keeku o nyɛpalaa bɔɔbɔɔ niŋ, tuupa miŋ luɛi o Masale Mɛlɛkaleŋ niŋ.”+ 23 Ma yulu puaa apum iso le waa bɛnduaa o kunda kɛ kɛ niŋ.+ Ma piɛi, ma bii sumndo,+ nduyɛ ma mal nda Chɛhowa* o ba, kanifuule ndaa laalaŋ o ndu niŋ.
24 Okoŋ, ma keeku Pisidiaa ma huŋ Pamfiliaa.+ 25 Mɛɛ nda dimul waŋnda suɛi Mɛlɛkɛi o Pɛka niŋ, ma kua Ataliaa. 26 Mɛɛ nda chɛŋ loŋ, ma luɛi o dɛndɔɔ niŋ ma miiŋgu Aŋtiɔɔ. Loŋ nda wa ni mi puaapiliaa mal nda Mɛlɛka o ba, le mbo tosal nda kɛndɛi nduɛi bɛnduei le wali nda chii hoo tosa wo.+
27 Mɛɛ nda fuuluu Aŋtiɔɔ, ma chuuŋgiaa kundaa kpou diompilɛ. Okoŋ ma dimul nda sɔɔŋ bɔɔbɔɔ Mɛlɛka tosa o nda niŋ sanaa woŋ, nduyɛ a mɛɛ o kumbul wanaa cho ŋChuu le wa nɛiyo le ma simnuŋ wanaa laalaŋnda yɛ.+ 28 Ma viau loŋ le teleŋ vilɛi nda wanaa laalaŋnda.