Tɛsaloniaŋ Diiŋ Ndɔɔ
2 Puaapiliaa, a hunɔɔ Masanɔ naa Chiisu Kiliti wo okɔɔ,+ nduyɛ a mɛɛ o chuuŋgiaa niŋ naa kpou ndupila ikɛi yɛ,+ ŋ cho nya nyɔɔloo maa 2 o yɔŋ bɛɛ mi waŋndo dimul nya yooŋgu cho maa o Mɛlɛka lo o chɛŋ ni wo,+ ɔɔ yooŋgu sondoo, ɔɔ mbo poonyiaa yauwo le chɔmndo maa naa o ba o fula ni, mbo dimi maa paale Chɛhowa*+ leŋ le cho niŋ naŋ, la chɛl mi kɔlta nyalaŋ la laasiaŋ, ɔɔ mi la buulaŋ a suɛi hei okɔɔ le.
3 La chɛl mi wana o wana hui nya o nɛi o nɛi niŋ te. Kanifuule, tuupa mi paale leŋ le hiŋ, mɛɛ mi wanaa simul Mɛlɛka wa,+ a wana dɛnɛ wɔɔŋndo chɔɔmuŋ kpendekele.+ Mɛlɛka chii wana dɛnɛ wɔɔŋ koŋ yamɛi kilul le tambei sɔlaa.+ 4 Wana simulaa hoo heeluŋ filioŋ mbo hiau nyɛ o nyɛ waŋnda chua maa mɛlɛka, ɔɔ nyɛm nda sooluu woŋ. Okoŋ mbo luɛi o chiɛi Mɛlɛkaa niŋ mbo chal, mbo chɔm kpendekele maa mɛlɛka o cho ni. 5 La loonuŋ maa teleŋ ya wa nya tɛɛŋndo, mi yaa dimul nya sɔɔŋ muŋ.
6 Nduyɛ, la sina nyɛ cho wana koŋ kuunaa hunɔɔ suŋ suŋndo, haaa mi boondii o nɔ le hunɔɔ ve i fuuluu. 7 A tonya, dɛnɛ wɔɔŋ waŋndo hoo, o cho maa suɛi viaŋnaŋnde wo cho niŋ yɔŋnɔŋndo.+ Nduyɛ, dɛnɛ wɔɔŋndo hoo cho lo o kumbaa haaa mi wana cho ndu kuunaa wo faŋaŋ ndu o nɛi. 8 Okoŋ kɔɔli, wana dɛnɛ wɔɔŋndo hoo cho chɔɔmɔŋ, mi Masanɔɔ Chiisu dii ndu a kpaaya cho ndu fula o sondo wo.+ Chiisu cho hei tosa teleŋ hunɔɔ ndɔɔ cho chɔɔmɔŋ+ kpendekele wo. 9 A kpaaya Setana+ wo wana dɛnɛ wɔɔŋndo hoo huŋ niŋ ni. A kpaaya koŋ o wa niŋ walta kɔndɔfiltaŋ, sɔɔŋ lachoowaŋ, a kaamaalaŋ tosaa ni.+ 10 Wanaa nɔ le hunɔɔ tambei sɔlaa wa, o cho nyɛ o nyɛ tosa le nda huiyo,+ kanifuule a chɛl tonyaa nduyɛ ma kaala ndu le ma sɔla pioŋɔɔ le. 11 Lelaŋ Mɛlɛka chɛl ni le mi kpaaya laasiaa wana wo hui nda, okoŋ ma laalaŋ sɔɔŋ lachoowaŋ.+ 12 Wanaa kɛɛ le tonyaa laalaŋndo, kɛ ma kaala yɔŋ wɔɔŋndo tosaa wa kpou, Mɛlɛka cho nda hunɔɔ yamɛi kilul.
13 Lelaŋ puaapiliaa naa, nya Chɛhowa* kaala haa wa, ŋ nɔ miŋ wa ndu balikaa mello lɔɔlɔɔ le nya. Kanifuule, o kandɔŋndo di Mɛlɛka hɛli nya ni+ le pioŋɔɔ sɔlaa.+ Okoŋ mbo dindi nya a nyina ndɔ diandaa, le laalaŋ nya dɔu o tonyaa niŋndo. 14 O veelu nya le mi la sɔla pioŋɔɔ sanaa a yooŋgu kɛndɛ naŋ dimul nya wo. O tosa hei le halikpeŋ mi nya bɛɛ sɔla biiloo maa Masanɔ naa Chiisu Kiliti.+ 15 Lelaŋ puaapiliaa, la sim yi,+ nduyɛ mi la bii sɔɔŋ naŋ pɛɛku nya woŋ kpiŋ.+ O wa ŋ naŋ pɛɛku nya a lasondo woŋ, ɔɔ ŋ naŋ poonyial nya woŋ. 16 Mɛlɛka, o cho Finya naa wo kaala naa.+ Le kɛndɛi nduɛi bɛnduei, mbo dɛɛniaa naa kɔllo le fɛɛŋ a fɛɛŋ, nduyɛ mbo ke naa tiindaŋndo.+ Ŋ cho piɛileŋ maa ndu nda Masanɔ naa Chiisu Kiliti, 17 a dɛɛniaa nya kɔltaŋ, nduyɛ ma luei nya yoomuaŋ, le halikpeŋ mi la wa walta kɛndɛlaŋ tosaa a sɔɔŋ kɛndɔŋ dimioo teleŋ o teleŋ.