Maatiu
11 Mɛɛ Chiisu chii kiilaa nduaa 12 nda sila, mbo faŋaŋ o fondaŋ koŋ, mbo kua waŋnda pɛɛkoo a nda yooŋgoo dimullo o chieeŋ cheleŋ niŋ.+
2 Kɛ Chɔŋ wa o chiɛi manyumndo niŋ+ mbo tuɛi a walta Kiliti laŋ okɔɔ, okoŋ mbo viam buɛiyaa nduaa+ 3 le ma kɔ nyuna ndu aa: “Baa num cho Wana Nɔ le Hunɔɔ Wo ni, ɔɔ ŋ nɔ miŋ chum le wana cheleŋ?”+ 4 Mi Chiisu mulul nda aa: “La kɔ doonuŋ Chɔŋ kona a nyɛ nya cho tueiyɔɔ, nduyɛ mi la wa chɔɔ wo:+ 5 Wanaa sumɛiya cho niŋ chɔɔ,+ mi wanaa bɛvɛiya wa kɔlaŋ. Wanaa nɔ lɛlɔŋ nda+ cho sioŋgɔɔ, mi wanaa nila baŋulɛiya wa niŋ tueiyɔɔ. Wanaa vi wa cho miiŋgoo yoomu, mi wanaa bala fonduaa wa yooŋgu kɛndɔɔ tueiyɔɔ.+ 6 Kɔl kɛndɔɔ cho le wana nɔ kiisaŋ a ya okɔɔ le wo.”*+
7 Mɛɛ buɛiyaa Chɔŋ nda wa miiŋgoo, mi Chiisu kandu suɛi o faŋgaa lo a Chɔŋ okɔɔ aa: “Yɛɛnɛ nyaa nɔ yɛ o kɔl maa la cho lakɔ chɔ o pollo niŋ?+ Baa saya hueiye muuluu wo?+ 8 Nɛɛnɛ nyaa nɔ yɛ o kɔl maa la cho lakɔ chɔ? Baa waŋndo o doviaŋ o nyɛla kɛndɛ kɛndɛlaŋ niŋ? Wanaa doviŋ lende wa, o chiɛila masaa niŋ wana saaluŋ nda ni. 9 Mɛɛ nɛɛnɛ nyaa kuɛ yɛ niko nuuviaa? Baa wana suaa le Mɛlɛka wo? A tonya mi dimul nya, o hiou bɛɛ wana suaa le Mɛlɛka wo.+ 10 A wana koŋ okɔɔ i poonyiaŋ ni aa: ‘I cho buɛi nuu viomɔɔ, mbo kɔ toosiaa pɔɔ nɛiyo num lachi!’+ 11 A tonya mi dimul nya, wana o wana fula wana lanɔɔ o ipulu, o kɛ kɛ cho mbo hiou Chɔŋ Wana Yiŋaa le. Kɛ wana hiou dɔɔnaŋ o Masale Mɛlɛkaleŋ niŋndo hiou ndu.+ 12 Chɔŋ a boondii Chɔŋ Wana Yiŋaa mbo huŋ bii a paale hauleŋ, waŋnda cho kindiŋndo le Masale Mɛlɛkaleŋ sɔlaa, nduyɛ wanaa vi ŋdial te wa cho leŋ sɔlaa.*+ 13 Wanaa ndaa suaa le Mɛlɛka wa a Sawalaŋ kpou la lo dimioo a nyɛ yɔŋnuŋ niŋ ndo okɔɔ haaa mi Chɔŋ huŋ.+ 14 Nduyɛ, la laalaŋ ɔɔ la laalaŋ te, wana koŋ cho ‘Ilaicha ni, o ndoo nɔ le hunɔɔ wo.’+ 15 Num o num nɔ pɛ nila tuɛiyaa isɔɔ, mɛɛ yaŋ nilaŋ.
16 “A nɛɛ yaa ya cho yɛ waŋnda teleŋndo hoo tuu?+ Waŋnda haa cho ko maa chuaambuaa cho ichali o luŋ ma wa chaaŋaa ndaa nda pisul la veeloo wa. 17 Okoŋ ma wa dimioo aa: ‘Ŋ hɔŋ sɛŋndeŋ le nya, kɛ la yi le. Miŋ koŋul a yeelaŋ, kɛ la bii imɔnɔ le.’ 18 Lende koni, mɛɛ Chɔŋ hiŋ, o ve nyɛdiaa dio ɔɔ mamuɛi kolɔɔ le. Kɛ mi waŋnda dimi aa, ‘Nyina wɔɔŋndo cho ndu kɔɔli ni.’ 19 Mɛɛ Po wanachioo hiŋ mbo wa nyɛdiaa dioo a kolɔɔ,+ mi waŋnda dimi aa, ‘Hoo ndu wana lepuloo a wana kolaa mamuɛiyo o cho ni. Wanaa biyaa paawaa* a wanaa lahakiaa chaaŋ nda o cho ni.’+ Kɛ a koŋ kpou, sɔɔŋ waŋndo tosa woŋ chɔm ni maa o nɔ taasioo.”+
20 Okoŋ kɔɔli, mi Chiisu pɛɛsa wanaa wa o chieeŋ o tosa walta kɔndɔfiltaŋ ndoŋ niŋ nda, le mɛɛ nda kɛɛ le wookɔŋndo yɛ. 21 Mbo dimi aa: “Kpundɔɔ cho le nya waŋnda Kɔluesiŋ! Nyɛpalaa cho le nya waŋnda Bɛtisaida! Kanifuule, te walta kɔndɔfilta tosaŋ o nya lo chiee laŋ laa tosaŋ Taaya a Saidɔŋ pɛ, sindɛ pa nda wa wookɔŋ ni, mi ndaa wounuŋ nyɛla labɛkilaŋ, nduyɛ mi ndaa chal o pultaŋ niŋ.+ 22 Kɛ mi dimul nya, o Paale Kɔɔsɔleŋ choo, i cho wa ikala kpoke le nya mbo hiou Taaya a Saidɔŋ.+ 23 Nya waŋnda Kepaaniɔm yɛ,+ la yiyaŋ pa maa la cho sɔla heeloo haaa mi la fuuluu o choo choo niŋ? Sako. O Sɛiyo* niŋ nya cho tolɔɔ ni!+ Kanifuule, te walta kɔndɔfilta tosaŋ o nya lo chiee laŋ laa tosaŋ Sodɔm pɛ, maa chiee koŋ cho wɔ paale hauleŋ ndeŋ. 24 Kɛ mi dimul nya, o Paale Kɔɔsɔleŋ choo, i cho wa ikala kpoke le nya, mbo hiou Sodɔm.”+
25 A boondii keŋ mi Chiisu dimi aa, “Finya nuu, Masanɔɔ le choo choo a lɛŋndeŋ kpou, I mel num balikaa waŋnda kpou o hɔl, le mɛɛ ŋ viŋ wanaa taasiaa a wanaa sinaa dɛniaa sɔɔŋ muŋ, ma chɔm muŋ chuaambuaa pɔmbuaa yɛ.+ 26 A tonya, Finya nuu, hɛnaŋ numndo tosaŋ hoo ni. 27 Finya nuu chua nyɔɔŋ kpou mbo ke ya.+ Wana o wana sina ya* nyɛkɛndɛi le, mɛɛ Finya nuu.+ Wana o wana sina Finya nuu nyɛkɛndɛi le, mɛɛ ya. Nduyɛ wana o wana ya yeema pɛ, I chɔm ndu wana Finya nuu cho wo.+ 28 Nya cho a yɔkpaa nduyɛ mi la wa a wolɔɔla lusulɛilaŋ nda, la huŋ naa ya chua, mi la huŋ sɔla pɛŋgioo. 29 La chua wolɔɔla nilaŋ,* mi la sɔla pɛɛkoo ya o ba, okoŋ la cho pɛŋgioo sɔla o yoomula nyalaŋ niŋ. Kanifuule, I cho wana vi kɔl a wana tusiaŋ.+ 30 Wolɔɔla nilaŋ la lusul te, nduyɛ bɔndii nuu choŋnuŋ fefele.”