Ɛsodɔɔ

18 Okoŋ kɔɔli, mi Chɛtulo, wana soliaa lasalaa Midiaŋ, lefoo Muuse+ tuɛi a nyɛ o nyɛ Mɛlɛka tosal Muuse, vɛlɛ a waŋnda Isɔluɛi okɔɔ, nduyɛ a mɛɛ Chɛhowa soli nda o lɛŋnde Ichipi leŋ niŋ yɛ.+ 2 A teleŋ koŋ, Muuse ndoo chua niŋ Sipoolua laa ndɔ, mbo miŋgi ndu pila o Chɛtulo finya ndɔ lo, 3 latulu a puaa nduaa ŋiɔɔŋnda.+ Puaa nduaa o pilɛ ndoo nɔ diolaŋ ni aa Kɛɛsiɔm.*+ Kanifuule mi Muuse dimi aa, “I simnuŋ miallo o lɛŋnde isumialteŋ niŋ.” 4 Nduyɛ o pilɔɔ ndoo nɔ diolaŋ ni aa Ɛliɛɛsa.* Kanifuule mbo dimi aa, “Mɛlɛka finya nuu cho wana ni malaa ni, o piŋi ya muɛi faŋii Feloo ve o ba wo.”+

5 Okoŋ mi Chɛtulo, lefoo Muuse chua lanɔɔ Muuse a puaa nduaa ŋiɔɔŋnda, ma kua naa Muuse chua o pollo niŋ. Nduyɛ a teleŋ koŋ, Muuse wa o dɔɔŋgɔɔ niŋ o pembii Mɛlɛka tonyaa.+ 6 Mbo yɔŋ yooŋgoo naa Muuse chua aa: “Ya Chɛtulo lefu num,+ I cho hunɔɔ naa num chua a laa num vɛlɛ a puaa num aa ŋiɔɔŋnda.” 7 O lepilɛ niŋ kpe, mi Muuse chaŋ mbo kua lefu ndɔ lachi, mbo kɔ beŋ ndu wulaŋ, mbo sɔsa ndu kuuwo. Okoŋ kɔɔli, ma nyuuniaŋ vellaa velle a ndapila okɔɔ, ma kua o tɛndiiyo niŋ.

8 Mi Muuse doonuŋ lefu ndɔ kona a nyɛ o nyɛ Chɛhowa tosal Feloo a waŋnda Ichipi le Isɔluɛiya.+ Mbo dimul ndu vɛlɛ a sɔɔŋ palaŋ komal nda o nɛi tɛɛŋ ndoŋ kpou okɔɔ,+ vɛlɛ a mɛɛ Chɛhowa piŋi nda yɛ. 9 Mi Chɛtulo duaunuŋ nyaale a nyɛ o nyɛ kɛndɛ Chɛhowa tosal Isɔluɛiya, le nda piŋioo waŋnda Ichipi o ba. 10 Okoŋ, mi Chɛtulo dimi aa: “Saŋgalaa cho le Chɛhowa, Mɛlɛka piŋi nya waŋnda Ichipi a Feloo o ba, nduyɛ mbo soli nya o saŋga nya wa Ichipi o ba bɛŋgu wo. 11 Suŋ suŋ niŋ, I sina niŋ kɛsɛ maa Chɛhowa nɔ kpaayaa mbo hiau mɛlɛkaa tuaa kpou.+ Kanifuule, I tuei nyɛ o tosal wanaa ndaa simul wanaa nduaa a yoŋgaa wa.” 12 Okoŋ mi Chɛtulo, lefoo Muuse soli sala luamaa a salala cheleŋ o Mɛlɛka lo. Nduyɛ mi Elɔŋ a waŋ banaa o Isɔluɛi niŋ kpou dia nyɛdiaa latulu a lefoo Muuse, Mɛlɛka tonyaa lachi.

13 Diimandɔɔ, mi Muuse chal le waŋnda sɔɔŋ dimioo tɛɛŋ maa paandu. Nduyɛ, chɔŋ idiiyo haaa mi le del doŋ, waŋnda wa tuŋ hunɔɔ ma sim ndu lachi. 14 Mɛɛ lefoo Muuse che nyɛ o nyɛ Muuse wa tosaa le waŋnda, mbo nyuna ndu aa: “Yɛɛnɛ ŋ cho yɛ hoo waŋnda tosallo? Le yɛɛnɛ ŋ challɛ nuaa numpilɛ kpe mi waŋnda huŋ num simndaŋ lachi, chɔŋ idiiyo haaa mi le del doŋ?” 15 Mi Muuse mulul lefu ndɔ aa: “A cho hunɔɔ naa ya chua, kanifuule a yeema mi nyunal nda le nɛi chɔmaa Mɛlɛkaa. 16 Te suɛi del pɛ, naa ya chua nda huŋ a ndi ni, okoŋ mi kelu nda yamɛi tɛɛŋ. Nduyɛ, ya koni chɔm nda nyɛ Mɛlɛka tonyaa dimi a ndi okɔɔ wo vɛlɛ a sawala ndɔlaŋ ni.”+

17 Mi lefu ndɔ dimul ndu aa: “Nyɛ ŋ cho hoo tosaa wo bɛnda kposoŋ te. 18 A cho numpila yɔɔkpiaa, nduyɛ ma yɔɔkpiaa waŋnda haa. Kanifuule wali ŋ cho hoo tosaa wo hiou num mayoomu, nduyɛ a nɔla ma tosa ndu numpilɛ le. 19 Yaŋ ya nilaŋ. I cho num silaa ke, nduyɛ Mɛlɛka cho wa latulu a num.+ Num wa sondo suaa le waŋnda haa Mɛlɛka tonyaa lachi,+ nduyɛ ma wa hunɔɔ a sɔɔŋ ndaŋ o Mɛlɛka tonyaa lo.+ 20 Num wa nda pɛɛkoo nyɛ sawala Mɛlɛka laŋ la dimi wo,+ ma chɔm nda nɛi nda nɔ ma kuɛ choo wo, vɛlɛ a wali nda nɔ ma tosa wo. 21 Hɛli puaa suliŋ,+ ma nɔ siooŋii Mɛlɛkɛi, ma wa puaa wana nɔla ma tiindaŋ, nduyɛ ma tul kafalaŋ leyɛ wa+ waŋnda tɛɛŋ. Okoŋ ma siiŋguu nda masaa waŋnda choo. Mi apum waŋnda waapilɛ wa nda o ba bɛŋgu, apum waŋnda kɛmɛ, apum waŋnda beleŋuɛɛnu, apum ŋwaŋ tɔ.+ 22 Nduyɛ, mi nda wa waŋnda sɔɔŋ pɔmpɔmbɔŋ toosiaa tɛɛŋ. Suɛi kɛ kɛ komal nda pɛ ma nɔla ndi toosiaa le, a hiŋ a ndi naa num chua.+ Tosa lende le mi la piɔuwaŋ wallo hoo vellaa velle nya ndaa.+ 23 Te a tosa lende pɛ mbo wa hɛnaŋ Mɛlɛkaa, a cho hiu saŋga le, nduyɛ wana o wana cho miiŋgu o ndu lo bɛɛ a kɔl hiniaa.”

24 Mi Muuse yaŋ lefu ndɔ nilaŋ, nduyɛ mbo tosa nyɛ o nyɛ o dimul ndu. 25 Mi Muuse hɛli puaa suliŋ nda o Isɔluɛi niŋ kpou, okoŋ mbo siiŋguu nda masaa waŋnda choo. Masaa apum waŋnda waapilɛ wa nda o ba bɛŋgu ni, apum waŋnda kɛmɛ, apum waŋnda beleŋuɛɛnu, apum ŋwaŋ tɔ. 26 Okoŋ, ma wa waŋnda sɔɔŋ pɔmpɔmbɔŋ toosiaa tɛɛŋ. Nduyɛ suɛi kɛ kɛ ndaa bumba pɛ toosiaa, a hiŋ a ndi naa Muuse chua.+ 27 Okoŋ kɔɔli, mi Muuse choŋguŋ lefu ndɔ,+ mbo miiŋguŋ o lɛŋnde ndɔleŋ niŋ.