Sɔɔŋ Chɔɔmaŋndoŋ
6 Mɛɛ Saa Fɔŋndɔɔ+ faŋa tamasi tasoo o tamasila ŋɔmmɛula wa+ o yauwo hoo choo laŋ, mi tuɛi mi nyaa yoomaa hiɔɔluaa o pilɛ+ deŋi choo choo a diomndo maa letaŋ aa: “Huŋ!” 2 Mɛɛ ya tofa, mi cha so humboo.+ Wana wa ichali lechoo wo ndoo nɔ chiɔuwo* o ba, nduyɛ ma wou ndu mɔsil lemasaa.+ O wa hiouwɔɔ lachi a chɔuwo yomɔɔ haaa mbo chii.+
3 Mɛɛ o faŋa tamasi diiŋ ndɔɔ, mi tuɛi nyɛ yoomaa diiŋ ndɔɔ+ dimioo aa: “Huŋ!” 4 Mi so cheleŋ fula. O wa o siaŋa yɔɔ maa leyiŋ. Ma ke wana wa ichali lechoo wo dioo a muɛi faŋii bɛnduei le kɔl nyuloo faŋaa o lɛŋndeŋ choo, le halikpeŋ mi waŋnda chieeya diuwaŋ vellaa velle.+
5 Mɛɛ o faŋa tamasi yaa ndɔɔ,+ mi tuɛi nyɛ yoomaa yaa ndɔɔ+ dimioo aa: “Huŋ!” Mɛɛ ya tofa, mi cha so tiŋioo. Wana wa ichali lechoo wo ndoo nɔ sekelei* nda tuu nyɔɔŋ ndo o ba. 6 Mi tuɛi diomndo nyaa yoomaa hiɔɔluaa tɛɛŋ aa: “Witiiyoŋ kiloo cha le dinaluɛiye i pilɛ.*+ Baliiyoŋ kiloo le yaa le dinaluɛiye i pilɛ. Tɛɛmbuu chuɛima ɔlifiiyaŋ a muɛiyaŋ te.”+
7 Mɛɛ o faŋa tamasi hiɔɔloo, mi tuɛi nyɛ yoomaa hiɔɔloo+ dimioo aa: “Huŋ!” 8 Mɛɛ ya tofa, mi cha so pupulaa wo. Wana wa ichali lechoo wo ndoo nɔ diolaŋ aa Piɔmndo. Nduyɛ Sɛiyo* wa ndu kɔlaŋ kɔɔli. Lɛŋndeŋ piɔuwo sala hiɔɔlu, ma sɔla kpaayaa buŋgɛi i pilɛ choo, le ma diu waŋnda chieeya a muɛi faŋii vilɛiye, a yiaaŋ,+ a naalaŋ, nduyɛ a visiaa biyaa.+
9 Mɛɛ o faŋa tamasi ŋuɛɛnoo, mi cha kooma wanaa nda dii+ le suɛi Mɛlɛkɛi, a le seile nda timbi leŋ+ nda o bandu luamaa lasalaa+ bɛŋgu. 10 Ma deŋi choo choo kpeleŋ aa: “Mɛlɛka Kpuluŋguma Bɛndoo, wana diandaa a wana tonyaa,+ le vɛɛ kpɛ ŋ cho yɛ chum le ma huŋ kiolu yamɛi, nduyɛ ma miŋgul wanaa cho o lɛŋndeŋ choo wa maa le kooma naŋ?”+ 11 Ma ke wana o wana doma humboo.+ Ma dimul nda le ma chɔɔlu chum le teleŋ biŋgi, haaa mi chaaŋaa ndaa buɛiya a puaapiliaa ndaa, a ndaa nɔ le diyɔɔ maa nda wa siou chiŋa.+
12 Mɛɛ o faŋa tamasi ŋɔmpum ndo, mi cha mi lɛŋndeŋ le nyiiya tau tau. Mi paaleŋ le piimiaa kpilo maa doma biisi nda toosiaa a yiinde* wo. Mi paŋgei bɛɛ diu yɔɔ maa makoŋgo.+ 13 Mi looŋ fula o choo choo niŋ, miŋ deli o lɛŋndeŋ choo mɛɛ hueiyii fuku fukuei hiiluu nuaa yɔm mafikiiyo, mi fikiima piiyaŋ ma chiɛɛluŋ yɛ. 14 Mi choo choo faŋaŋ mɛɛ nda simbul nuaa yauwo yɛ.+ Mi pemboŋ a lɛŋii mɛŋndaŋ ma balu ve kpou faŋaŋ o fondaŋnda ndalaŋ.+ 15 Okoŋ mi masaa o lɛŋndeŋ choo, wanaa bɛnduaa, waŋ bɛnduaa puaa chɔuwa, wanaa sulaa, a wanaa dialuŋ kalaa, chɛ ni, wana baŋaŋ ni, nda kpou ma kɔ viŋi viŋiŋ o buululaŋ niŋ, a o pouta ŋpembulaŋ bɛŋgu.+ 16 A wa pembuŋ bɛndoŋ a poutaŋ dimullo aa: “Del naa choo,+ mi la veŋ naa le wana chal o kpeŋgbei* lemasaa choo wo,+ nduyɛ yɔŋii Saa Fɔŋndɔɔ tusi naa nyɛpalaa choo.+ 17 Kanifuule, paale ndale kɔl tuuleŋ le fuuluu.+ Nɛɛnɛ nɔla yɛ mbo sim?”+