Sɔɔŋ Chɔɔmaŋndoŋ
18 Okoŋ kɔɔli, mi cha maalikɛinɔ cheleŋ fulaa o choo choo niŋ, mbo wa tolɔɔ a kpaaya bɛndoo. Mi paŋgeloo tiu o lɛŋndeŋ choo silɔ a biilu ndɔɔ. 2 Okoŋ mbo deŋi choo choo kpeleŋ aa: “O del! Babilɔŋ Bɛndoo del!+ O simnuŋ chalta nyinaa wɔɔŋnda, a nyinaa nɔɔlɛiyaa suu o suu. Nduyɛ, loŋ youwaa nɔɔlɛiyaa suu o suu waŋnda tul leyɛ wa cho ni.+ 3 Waŋnda o lɛŋnde niŋ kpou kol muɛima ndɔma kaa ihini nɔɔlɛiyaŋ.*+ Nduyɛ masaa o lɛŋndeŋ choo tosa kaa ihini nɔɔlɛiyo a ndu,+ mi yulaa bɛnduaa o chieeŋndo choo sul a nyɛm baa kalaŋ chuaa hoo sɔla o hɔlaa vesɛiyaa nduaa niŋndoŋ.”
4 Okoŋ, mi tuɛi diom cheleŋ o choo choo niŋ aa: “Wanaa niaa, la fula o chiee koŋ niŋ,+ yɔŋii nya wou balaŋ o hakila ndɔlaŋ niŋ, mi nya bɛɛ sɔla kpundɛ cho ndu tolɔɔ choo wo.+ 5 Kanifuule, hakila chioo hoo la lo deŋgelaŋndo haaa mi la fuuluu o choo choo niŋ.+ Nduyɛ Mɛlɛka cho ndu yamɛi kilul le sɔɔŋ wɔɔŋ o tosa woŋ.+ 6 Tosal ndu mɛɛ o tosal chaanda yɛ.+ Mɛɛ o tosal chaanda yɛ, miŋgul ndu maa koŋ bɛmbɔɔ le diiŋ.+ Taala+ o muuliaŋ muɛiyaŋ le chaanda wo, muuliaŋ maŋ taalaa le diiŋ le ndu.+ 7 Le mɛɛ o kelu yoŋgaa a ndupila, nduyɛ siɔmbula cho ndu le nyɛm o sɔla woŋ te yɛ, tusi ndu nyɛ nɛiyaa choo, ma luei ndu mɔnɛi. Kanifuule, o cho dimioo o kɔl niŋ aa: ‘Masa laandoo ya cho ni. I cho wana vii pɔnɔ le. Nduyɛ fɛɛŋ bɛɛ I bii niŋ mɔnɛi le.’+ 8 Le sabu koŋ, o paaleŋ lepilɛ niŋ kpe, kpundɛlaŋ ndaŋ la cho ndu tolɔɔ choo: Piɔmndo, mɔnɛi, a yima bɛnduaŋ. A cho ndu lomɔɔ chilikɔ,+ kanifuule Chɛhowa* Mɛlɛka, o kilul ndu yamɛiyo nɔ kpaayaa.+
9 “Masaa o lɛŋndeŋ choo, a tosa kaa ihini nɔɔlɛiyo* a ndu, ma wa nyɛm o sɔla woŋ tueiyɔɔ yeela wa, a cho chaŋ tau ma bii mɔnɛi, te o wa pɛ ŋɔɔ mi kumnde wa ndu helɔɔ choo. 10 A cho wa isisi kɔɔli kɔɔli a siooŋnde le nyɛ nɛiyaa cho ndu choo wo, ma dimi aa: ‘Kpooko, kpooko, kpooko! Ee Babilɔŋ, num chiee bɛndu nɔ hoo kpaayaa wo,+ a kilul num yamɛi o hawɛiyo* o pilɛ kpe bɛŋgu!’
11 “Yulaa bɛnduaa o lɛŋndeŋ choo bɛɛ, a cho wa chaŋndo ma bii mɔnɛi, kanifuule wana o wana cho lɛ wa wɔŋgula ndalaŋ piondɔɔ le. 12 Laŋ la cho ni, kooliiyoŋ, kaniŋ humboŋ, pouta baa kalalaŋ, yɔɔwalaŋ, kolala kɛndɛ kɛndɛlaŋ, la yim yim ndaŋ, la baa kalalaŋ, la siaŋa sɔɔtɔtɔlaŋ, nyɛm nda toosiaa a yɔmii chuŋ kɛndɛiyoŋ, ŋ nda toosiaa a chiŋuŋ kamaa woŋ, yɔmii baa kalɛi, chiliŋii siaŋɛi,* chiliŋndoŋ, a ŋ nda toosiaa a pou mabuu wo laŋ, 13 a sinamɔŋ, a nyɛm chuŋ kɛndɛŋ fula Iŋdiaa woŋ, a nyɛm chuŋ kɛndɛŋ cheleŋ, a chuɛima chuŋ kɛndiaŋ, a filaŋkiŋsɛŋ, a muɛiyaŋ, a chuɛima ɔlifiiyaŋ, a kolo kɛndɛ kɛndɛ nda toosiaa beediiyo* wo, a witiiyoŋ, a nauwa, a saa, a suaa, a nyɛm suaa naŋndoŋ, a chiaa, a yoomula waŋnda chieeya. 14 Nyɛm kɛndɛ kɛndɛŋ num oo landuŋ kɔl le muŋ ndoŋ hɛluŋ num. Nyɛdiaala yeelɛila numndaŋ, a nyɛm num kɛndɔŋ kpou hɛluŋ num. Fɛɛŋ bɛɛ a chi lɛ muŋ te.
15 “Yulaa bɛnduaa pisi ndu nyɔɔŋ muŋ o ba, ma sul o ndu niŋnda, a cho wa isisi kɔɔli kɔɔli a siooŋnde le nyɛ nɛiyaa cho ndu choo wo, ma chaŋ tau, nduyɛ ma bii mɔnɛi. 16 A cho wa dimioo aa: ‘Kpooko, kpooko, kpooko! Num chiee bɛndoo hoo, num cho hoo o doviaŋ a kolala kɛndɛ kɛndɛlaŋ, la yim yim ndaŋ, a la siaŋa sɔɔtɔtɔlaŋ ndo. Num cho hoo o kɛɛmiaa a kooliiyoŋ, pouta baa kalalaŋ, a yɔɔwala kɛndɛ kɛndɛlaŋ ndo.+ 17 O hawɛiyo o pilɛ kpe bɛŋgu, sulta numndaŋ kpou la tambu!’
“Wanaa kua a dɛndɛla mamɛŋndaŋ nda, a wanaa dɛndɛlaŋ ndaŋ la kua wa, a wanaa tosa wallo o laŋ niŋ nda, a wanaa tosa wallo o mɛŋma ihɛllaŋ choo wa kpou, a cho wa isisi kɔɔli kɔɔli, 18 ma mal yioo kpeleŋ te a che pɛ kumnde helɔɔ teleŋ o cho wa ŋɔɔ wo, ma dimi aa: ‘Mi chiee kuɛɛ kpeekpei wa yɛ vɛlɛ maa chiee bɛndoo hoo?’ 19 Waŋnda haa cho chundoo kɔndɔɔ ma dɔɔnuŋ o lebol, ma chaŋ, ma bii mɔnɛi, ma dimi aa: ‘Kpooko, kpooko, kpooko! Num chiee bɛndoo hoo, num tosa ni mi wanaa nɔ dɛndɛla mamɛŋndaŋ nda kpou sul. Kɛ o hawɛiyo o pilɛ kpe bɛŋgu, ma sɔla tambei!’+
20 “Nya cho o choo choo niŋnda,+ a nya wanaa diandaa,+ a nya kiilaa, a nya wanaa suaa le Mɛlɛka wa, la dɔɔnuŋ nyaale le nyɛ yɔŋnuŋ ndu wo, kanifuule Mɛlɛka chii ndu yamɛi kilul le nya!”+
21 Mi maalikɛinɔ kpaaya bɛndoo chua pou lusulɛi bɛndoo mbo mal ndu o pee mɛŋma ihɛllo niŋ chuuŋ. Mbo dimi aa: “Nuaa nda cho Babilɔŋ chiee bɛndoo chua ni, ma viɔl ndu lɛŋ kpɔl. Fɛɛŋ bɛɛ a chi lɛ niŋ ndu le.+ 22 Wana o wana tuii lɛ niŋ wanaa soliaa ŋchonduaa, a luaa towalaŋ nda, a hɔŋ sɛŋndeŋ nda, a wanaa hɔŋ bululaŋ nda o num niŋ te. Wanaa toosiaa nyɔɔŋ a laba wa, o pilɛ bɛɛ a chi lɛ o num niŋ te. Nduyɛ fɛɛŋ bɛɛ a tuii lɛ niŋ bɔɔluu pouta nda chuii nyɔɔŋ ndaŋ o num niŋ te. 23 Fɛɛŋ bɛɛ wana chi lɛ niŋ paŋgele lambuiyo o num niŋ te. Fɛɛŋ bɛɛ a tuii lɛ niŋ bɔɔluu wana pɔnɔ chua lanɔɔ a wana lanɔ cho challe o nɔɔ wo o num niŋ te. Kanifuule, yulaa num aa bɛnduaa wa laŋgbaa kɛsuŋ kalaa o lɛŋndeŋ choo ni. Nduyɛ ma hui waŋnda o lɛŋnde niŋ kpou a walta nyinaa wɔɔŋnda.+ 24 O chioo hoo niŋ nda saaluŋ kooma wanaa ndaa suaa le Mɛlɛka wa ni, a kooma wanaa diandaa,+ a kooma wana o wana nda dii o lɛŋndeŋ choo.”+