Choobu
32 Okoŋ, puaa yaawa haa hiu lɛ lachi a suɛi o Choobu lo le. Kanifuule, ndoo laalaŋ bɔɔ o sakpoyɛi nduɛi niŋ.*+ 2 Kɛ mi Ɛlihu po Baluakɛ wo, Busaitiinɔɔ,+ fulaa o yuŋgu Luam ndo choo tuulu kɔl tau tau. Mbo tuulu kɔl a Choobu le mɛɛ o wa chɔmndo maa o sandu mbo hiau Mɛlɛka yɛ.+ 3 Mbo tuulu vɛlɛ kɔl tau a chaaŋaa yaawaa Choobu wa, kanifuule a sɔla mulilaŋ le nyunala Choobu laŋ te, nduyɛ ma dimi vɛlɛ maa wana dɛnɛ wɔɔŋndo Mɛlɛka cho ni.+ 4 Ɛlihu bɛɛ ndoo yeema mi ndoo soo o Choobu lo. Kɛ o wa wɔ chumndo le mi chaaŋaa yaawaa Choobu wa soo fɛŋ, kanifuule ndaa chuu ndu o kɔɔ.+ 5 Mɛɛ Ɛlihu che maa chaaŋaa yaawaa Choobu wa nɔ lɛ nyɛ o nyɛ le dimi le, mbo tuulu kɔl. 6 Okoŋ mi Ɛlihu po Baluakɛ wo, Busaitiinɔɔ, kandu suɛi. Mbo dimi aa:
“Feleŋgɔnɔɔ ya cho ni.*
Kaasoŋnda nya cho le ya ni.+
Lelaŋ ya ke nya bɛɛleŋ ni mi meinuŋ,+
I suu a nyɛ ya sina wo okɔɔ le.
7 Mi dimi o kɔl niŋ aa, ‘Kaasoŋnda* soo wɔ,
Nduyɛ mi wanaa nɔ niŋ wɔsioŋ tau wa chɔm taasi ndaa.’
8 Kɛ nyina Mɛlɛkaa,
Te koŋ te hueiyii Mɛlɛka Kpaaya Kpou Kpou Wo yoomu ve ke wanachioo sinapɛŋgoo ni.+
9 Wɔsilaŋ* nɔɔ tau tosa mi waŋndo wa wana taasi le.
O fulawɔ okoŋ kɔɔli, o cho ko kaasoŋnda kinɛi le bii sɔɔŋ bila nyɛkɛndɛi le.+
10 Lelaŋ ya cho nya dimullo ni aa, ‘La yaŋ ya nilaŋ,
Le mi ya bɛɛ dimul nya nyɛ ya sina wo.’
11 I wa chumndo le mi la soo nyɛ nyaa nɔ le dimioo wo.
12 I wa nya nilaŋ yaŋɔɔ yekeŋ,
Kɛ wana o wana nɔla mbo chɔm biondɔŋ Choobu wo le,*
Kɛlɛŋgaa niŋ te mi wana o wana sɛɛŋgiaa sɔɔŋ o dimi woŋ.
13 Lelaŋ la nɔ mi la dimi nuaa aa, ‘Wanaa taasiaa naŋ cho ni.
Mɛlɛka nɔla ni mbo miŋgi Choobu o nɛi, o cho wanachiee le.’
14 O cho o ya lo sanaa le Choobu soo le.
Lelaŋ I cho ndu mulul mɛɛ nya soo o ndu lo yɛ le.
15 A tambu kɔl ma mei doŋ.
A nɔ lɛ nyɛ o nyɛ le dimi le.
16 Mi hiau lachi a nda chumndo, kɛ a hiu lɛ lachi a suɛi le.
Lende koni nda wa niŋ isisi ni, ndaa nɔ lɛ nyɛ o nyɛ le dimi le.
17 Lelaŋ ya bɛɛ I cho isɔɔ.
I cho dimi nyɛ ya sina wo.
18 I nɔ sɔɔŋ tau le dimioo.
Nyina Mɛlɛkaa cho ya nyindɔɔ ni le mi soo.
19 Nyɛ cho ya o kɔl lo cho ko mɛɛ muɛiyaŋ ma wa nuaa ma kindaa kpiŋ yɛ,*
Ɔɔ mɛɛ bɔlɔ mamuɛi sɛnɛiyo kinduŋ nuaa le piɔllo yɛ.+
20 I suaa wɔ le mi sɔla tiŋ fondaa!
I cho isɔɔ le mi mulul nya.
22 I chiee pɛŋ waŋndo saŋgalaa le.
Te I tosa keŋ pɛ, Wana Toosiaa ya wo cho keleŋa chii a ya.