Choobu
36 Mi Ɛlihu hiau lachi a dimioo aa:
2 “Yandii chɔɔlu wɔ ya biuwɔŋ mi soo.
I nɔ wɔ sɔɔŋ cheleŋ Mɛlɛka yeema ya mi dimul num ndoŋ.
3 I cho isɔɔ nyɛkɛndɛi le ma bii nyɛ ya sina wo bila.
Nduyɛ, I cho num chɔm maa wana sakpoo Wana Toosiaa ya wo cho ni.+
4 Diomnda ya cho dimioo laŋ la cho lachoo le.
Wana cho walaŋ nduyɛ mbo nɔ kɔl kaloo wo+ o ba la fula ni.
5 A tonya, Mɛlɛka nɔ kpaayaa,+ nduyɛ o kɛɛ wana o wana le.
Kpaaya bɛndu o nɔ le sɔɔŋ biyɔɔ bila wo* cho bɔɔ.
6 O manda yoomula wanaa dɛnɛ wɔɔŋnda le.+
Kɛ mbo kilul wanaa cho o saŋgaa niŋnda yamaŋ o nɛi sakpoo choo.+
7 O feŋa hɔlte ndɔleŋ wanaa sakpuaa choo le.+
Mbo siiŋguu nda masaa,+ nduyɛ ma sɔla bɛɛleŋ le fɛɛŋ a fɛɛŋ.
8 Kɛ te a wa pɛ a biyaa o yɔlɔŋ,
Nduyɛ mi yuei nyɛpalaa kaya kayaŋ nda,
9 Mi Mɛlɛka chɔm nda nyɛ nda tosa wo,
Mbo chɔm nda maa a tosa hakioo le mɛɛ nda tosa kaa heelaŋndo yɛ.
10 Mbo tosa ma yaŋ nilaŋ o silaa,
Nduyɛ mbo dimul nda le ma mulul yɔŋnda ndala wɔɔŋndaŋ kɔɔ.+
11 Te a diikuŋ pɛ nduyɛ ma piɛi ndu,
Nyɛ o nyɛ ve nda lepɛŋ o yoomula ndalaŋ niŋ te,
Nduyɛ a cho wa a kɔl hiniaa o yoomula ndalaŋ niŋ.+
12 Kɛ te a diikuŋ te, a cho nda diyɔɔ a muɛi faŋnde.*+
Nduyɛ a wu lende, a kindu kɔl te.
13 Wanaa sina Mɛlɛka le wa kɛsiŋ suɛi nɛyaŋnde o kɔl ni.
A cheŋ o ndu lo le mala le, o yɔŋ bɛɛ mbo tusi nda nyɛpalaa choo.
14 Ma sɔla piɔmndo o feleŋgɔyɛi ndɛi niŋ,+
Nduyɛ o yoomu ndaa niŋ kpou, a waŋ piaanduaa hini a chaaŋaa ndaa waŋ piaanduaa o maaŋndaŋ niŋnda nda wa ni.+
15 Kɛ mi Mɛlɛka* chiindiaa wanaa cho o saŋgaa niŋnda, a teleŋ nda cho o saŋgaa niŋndo.
Mbo tosa ma yaŋ ndu nilaŋ a teleŋ nda wa o nyɛpalaa niŋndo.
Nduyɛ mi nyɛdiaa kɛndɛ kɛndɔɔ wa o tibii* numndo choo le num kɔllo dɛɛniaa.+
17 Okoŋ, a cho hini kɔl a yamɛi nda kilul niŋ wanaa dɛnɛ wɔɔŋnda ve,+
Boondii nda cho yamaŋ kiolɔɔ, nduyɛ mi sɔɔŋ dimiŋ o nɛi sakpoo choo ve.
18 Kɛ wa yekeŋ, yɔŋii kɔl tuuwo nyindu num ma dimi suɛi wɔɔŋnde.*+
Chɛl mi luɛiyɔɔ niŋndo faŋa num o nɛi tonyaa choo le.
19 Baa chaŋ ŋ cho le malaa wo,
Ɔɔ fafala ŋ cho wo tosa niŋ pa ma fula o nyɛ nɛiyaa niŋ?+
20 Nɔ yeemɛi le mi nyumndaŋ ma tol,
Teleŋ waŋnda wu o lepilɛ niŋ kpe wo le.
21 Wa yekeŋ yɔŋii ŋ luei balaŋ o dɛnɛ wɔɔŋndo niŋ,
Le mɛɛ ŋ yeema saŋga le yɛ.+
22 Le mɛɛ Mɛlɛka cho wana kpaaya bɛndu yɛ o sɔla saŋgalaa ni.
Nduyɛ, wana pɛɛkaa kuɛɛ cho yɛ maa ndu?
23 Nɛɛnɛ chɔm* yɛ Mɛlɛka nyɛ o nɔ le tosaa wo?+
Ɔɔ nɛɛnɛ dimul lɛ ndu aa, ‘Nyɛ ŋ tosa hoo wo bɛnda le’?+
24 Puɛɛnuŋ le walta Mɛlɛka laŋ saŋgalaa le.+
Kanifuule, wanaa bɔɔbɔɔ soli niŋ chondoŋ a laŋ okɔɔ.+
25 Waŋnda chieeya kpou che niŋ waltaŋ ndaŋ,
Kɛ kɔɔli kɔɔli koni nda cha laŋ ni.
26 A tonya, Mɛlɛka cho o bɛndu mbo hiau mɛɛ naŋ sina yɛ.+
Wana o wana nɔla ma sina wɔsila o chii niŋ ndaŋ pɛŋgu le.+
27 Mbo naŋ mɛŋndaŋ mi ma hel o haŋgul,+
Mi haŋgul koŋ kɔ kilaŋ mbo simnuŋ piɔɔ,
28 Okoŋ mi piɔɔ koŋ sia o lɛŋndeŋ choo,+
Mi waŋnda chieeya kpou sɔla mɛŋndaŋ.
29 Nɛɛnɛ bii yɛ bila mɛɛ yumbu yumboo pɛŋgɛlaŋ yɛ,
30 Tofawɔ mɛɛ o pɛŋgɛla nyɛ teŋgaa lechoo yɛ,+
Vɛlɛ a mɛɛ o kumbu pee mɛŋma ihɛl yiŋgilɛi bɛndoo kpu yɛ.
31 A nyɔɔŋ muŋ o ke waŋnda nyɛm nda hauba woŋ ni,
Nduyɛ mbo ke nda nyɛdiaa o hɔbɛi.+
32 Mbo bii taŋndeŋ a bala ndɔlaŋ,
Nduyɛ mbo yɔŋ ndeŋ naa o yeema mi le kuɛ wa.+
33 Mi taŋma nduaŋ ma chɔm wana suu o cho wo,
Hali chɔluaa bɛɛ ma sina wana* cho hunɔɔ wo.