Sam
O wana sim lachi le chondei yo lo. A mɛɛ Kititi* chomul lɛ. Chondii Deeve ve.
8 Oo Chɛhowa Masa naa, nuawɔ se mɛɛ diola numndaŋ la cho diola tɔɔma bɛndu o lɛŋndeŋ choo kpou yɛ!
A kɛsi bɛɛle numndeŋ filioŋ mbo hiau choo choo!+
2 A chɔm kpaaya numndo kpendekele a nyɛ chuaambuaa a chɛlɛkpiaa dimi wo,+
Le halikpeŋ yaamɔɔnɔ dɛnɛ wɔɔŋ simul num ndo,
O nɔla mbo dimi nyɛ o nyɛ le.
3 Te I tofa pɛ choo choo mi che walta ŋ tosa a bala numndaŋ ndaŋ,*
Mi tofa paŋgei a looŋ ŋ toosiaa woŋ,+
4 Vɛɛ kpɛ wanachioo cho yɛ le ma handu ndu kɔllo choo?
Vɛɛ kpɛ po wanachioo cho yɛ le ma buulaŋ a ndu?+
5 Mɛɛ ŋ toosiaa ndu yɛ, maalikɛiya hiou ndu ko chobe,
Ma ke ndu bɛɛleŋ a biiloo.
6 Ma ke ndu kpaayaa nyɛm ŋ toosiaa a bala numndaŋ ndoŋ choo.+
Ma kɛsi nyɔɔŋ muŋ kpou o peluŋ ndɔŋ bɛŋgu.
7 Saa, chuiŋnda, nauwa,
Visiaa yonduaa,+
8 Youwaa balu o choo choo niŋnda, suuwa o pee mɛŋma ihɛllo niŋ,
Vɛlɛ a nyɛ o nyɛ balu o peela mɛŋma ihɛllaŋ niŋ.
9 Oo Chɛhowa Masa naa, nuawɔ se mɛɛ diola numndaŋ la cho diola tɔɔma bɛndu o lɛŋndeŋ choo kpou yɛ!