Sam
96 La solul Chɛhowa chondii sɛnɛiye.+
Nya waŋnda o lɛŋndeŋ choo kpou, la solul Chɛhowa chondei!+
2 La solul Chɛhowa chondei. La saŋgala diola ndɔlaŋ.
Lepaa o lepaa, la dimul waŋnda yooŋgu kɛndɔɔ maa ndu cho wana piŋiaa ni.+
3 La dimul waŋnda o lɛŋnde niŋ a naŋɔɔ ndɔ bɛndoo okɔɔ.
Nduyɛ, mi la dimul nda kpou a walta ndɔla kɔndɔfiltaŋ okɔɔ.+
4 Chɛhowa cho o bɛndu, nduyɛ o nɔ mbo sɔla saŋgalaa.
Mɛlɛka waŋnda nɔ ma nɔ siooŋii nduɛi mbo hiou mɛlɛkaa cheleŋnda kpou wo o cho ni.
5 Kanifuule, mɛlɛkaa waŋnda chieeya kpou, mɛlɛkaa fonduaa nda cho ni,+
Kɛ Chɛhowa ndu, ndu toosiaa choo choo ni.+
6 Kpaaya ndɔɔ* a naŋɔɔ ndɔ bɛndoo cho ndu o balaa silɔ.+
Kpaayaa a naŋɔɔ bɛndoo cho o chiɛi ndɔ diandaa niŋ.+
7 Yuŋgulaŋ o lɛŋndeŋ choo kpou, la ke Chɛhowa bɛɛle o nɔ mbo sɔla leŋ.
La ke Chɛhowa bɛɛle o nɔ mbo sɔla leŋ le naŋɔɔ ndɔɔ a kpaaya ndɔɔ.+
8 La ke Chɛhowa bɛɛle diola ndɔlaŋ la nɔ mi la sɔla leŋ.+
La huŋ a kela nyalaŋ o luŋ chiɛi ndɔɔ.
9 La beŋ Chɛhowa wulaŋ* a nyɛla diandaa laŋ lekɔɔ.*
Waŋnda o lɛŋndeŋ choo kpou, la nyiiya ndu lachi!
10 La dimul kaalaŋ kpou aa: “Chɛhowa simnuŋ Masaa!”+
Lɛŋndeŋ le cho le fɛɛŋ a fɛɛŋ, nyɛ o nyɛ nɔla leŋ faŋa o foofo ndɔɔ le.
O cho waŋnda yamɛi kilul o nɛi sakpoo choo.”+
11 Maa choo choo dɔɔnuŋ nyaale, nduyɛ mi lɛŋndeŋ le wa a kɔl kɛndɛ.
Maa pee mɛŋma ihɛllo a nyɛ o nyɛ cho leniŋ deŋi choo choo a bɔɔluu bɛndoo.+
12 Maa yondolaŋ a nyɛ o nyɛ cho leniŋ dɔɔnuŋ nyaale,+
Nduyɛ mi yɔmii cho o bundɛlaŋ niŋnde bɛɛ kpou deŋi choo choo a nyaaloo+
13 Chɛhowa lachi, kanifuule o cho hunɔɔ.*
O cho hunɔɔ le lɛŋndeŋ yamɛi kilullo.